မူဆယ်ခရိုင်အတွင်း တရက်တည်း တိုက်ပွဲ နှစ်ကြိမ် ဖြစ်

0

သျှမ်းပြည်မြောက်ပိုင်း မူဆယ်ခရိုင်အတွင်း ယမန်နေ့ (မေလ ၈ )ရက် ညနေခင်း အချိန်ပိုင်းအတွင်း စစ်ကောင်စီတို့သည် တိုင်းရင်းသား လက်နက်ကိုင်တပ်ဖွဲ့များနှင့် ထိတွေ့တိုက်ပွဲ နှစ်နေရာဖြစ်ပွားခဲ့ကြောင်း သတင်းသိရသည်။

စစ်ကောင်စီ

ပြီးခဲ့သည့် မေလ ၈ ရက် ညနေပိုင်း ၅ နာရီကျော်ဝန်းကျင်တွင် သျှမ်းပြည်မြောက်ပိုင်း သန္နီမြို့ အလွန် မန်ပိန်းကျေးရွာ အနီး၌ အာဏာသိမ်း စစ်ကောင်စီတပ်ဖွဲ့နှင့် ဒေသခံပြည်သူ့ကာကွယ်ရေး၊တိုင်းရင်းသားလက်နက်ကိုင် တပ်ပေါင်းစုတို့ တိုက်ပွဲဖြစ်ပွားခဲ့ကြောင်း သတင်းသိရသည်။

“အရင်က လမ်းမကြီးအနီးမှာပဲ ထိတွေ့တိုက်ပွဲဖြစ်ပွားခဲ့ပေမဲ့မနေ့ညက တိုက်ပွဲကတော့ လမ်းမကြီးကနေ အသံ တွေကြားရတာပါ၊ စစ်ကောင်စီ နဲ့ MNDAA၊ TNLAတို့က ထိတွေ့တိုက်ပွဲဖြစ်တယ်လို့ပြောတယ်၊ တချို့ ကလည်း PDF ပါပါတယ်လို့ ပြောပါတယ်၊ အသေးစိတ်တော့ မသိရဘူး၊ ပစ်ခတ်သံတွေက နာရီဝက်နီးပါးကြာတယ်” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။ 

ထိုတိုက်ပွဲဖြစ်ပွားနှင့် ပက်သက်ပြီး ထိခိုက်ကျဆုံးမှုများ၏ အရေအတွက်နှင့် ဖြစ်ပွားရသည့် အကြောင်းအရင်း အသေးစိတ် မသိရှိရသော်လည်း ကွတ်ခိုင်မြို့နယ် နှင့် မဘိမ်းမြို့အနီးပတ်ဝန်းကျင်ရှိ ဒေသများသည် ပစ်ခတ်သံ များ မကြာခဏကြားရလေ့ရှိသည့် ဒေသဖြစ်ကြောင်း ဒေသခံများက ပြောသည်။ 

အလားတူပင် သျှမ်းပြည်မြောက်ပိုင်း မူဆယ်မြို့အနီး မော်တောင်းကျေးရွာအနီးမှာလည်း စစ်ကောင်စီနှင့် တိုင်းရင်းသားလက်နက်ကိုင်တပ်ဖွဲ့ တစ်ခုတို့ ထိတွေ့တိုက်ပွဲဖြစ်ပွားခဲ့ကြောင်း ဒေသခံများထံမှ သတင်းသိရသည်။

“မော်တောင်းကျေးရွာအနီးမှာ စစ်ကောင်စီတို့ တိုက်ပွဲထပ်မံဖြစ်ပါတယ်၊ ပြီးခဲ့သည့် တစ်ပတ်က တိုက်ပွဲဖြစ် ကတည်းက အဲ့အနီးမှာ ဆို စစ်ကောင်စီကင်းပုန်းစခန်းရှိတယ်လို့ သိရပါတယ်၊ မနေ့ညကတော့ ဘယ်အဖွဲ့ နဲ့ ပစ်ခတ်မှု ဖြစ်သလဲ ဆိုတာ မသိရဘူး၊ ညလည်းမှောင်နေတော့ ဘယ်သူမှ မထွက်ရဲကြဘူး”ဟု မော်တောင်း ကျေးရွာအနီး ဒေသခံတစ်ဦးက သျှမ်းသံတော်ဆင့်ကို ပြောသည်။ 

အဆိုပါမော်တောင်းကျေးရွာအနီးသည် ပြီးခဲ့သည့် မေလ ၄ ရက်နေ့မှာလည်း စစ်ကောင်စီတပ်ဖွဲ့နှင့် TNLA  တို့ တိုက်ပွဲဖြစ်ပွားခဲ့ပြီး စစ်ကောင်စီတို့ ပေါ်တာဆွဲခေါ်ဆောင်လာသည့် သျှမ်းလူငယ်နှစ်ဦးလည်း ကျဆုံးခဲ့ရသည့် ဖြစ်စဥ် ဖြစ်ပွားခဲ့ပါသည်။

အာဏာသိမ်းစစ်ကောင်စီတို့သည် နိုင်ငံတော်အာဏာသိမ်းပြီးနောက်ပိုင်း သျှမ်းပြည်မြောက်ပိုင်းအတွင်းတွင် တိုင်းရင်းသားလက်နက်ကိုင်တပ်ဖွဲ့များနှင့် ထိတွေ့တိုက်ပွဲဖြစ်ပွားမှုများ ပိုမိုများပြားလာသည့် အပြင် ဒေသခံပြည်သူ့ကာကွယ်ရေးတပ်ဖွဲ့များနှင့်လည်း ရင်ဆိုင်တိုက်ခိုက်နေရကြောင်း သိရသည်။

Leave a Comments