သျှမ်းပြည်အရှေ့ပိုင်း တာချီလိတ်မြို့ မြန်မာ – ထိုင်းနယ်စပ် ဂိတ်တံခါး ပိတ်ထားနေမှုကြောင့် မြန်မာဘက်မှ နယ်စပ်ဒေသခံများအတွက် ကုန်သွယ်ရေး စီးပွားရေးအပြင် ပညာရေး၊ကျန်းမာရေး အပိုင်းများလည်း ထိခိုက်မှုရှိကြောင်း စုံစမ်းသိရသည်။
ပြီးခဲ့သည့် မေလ ၁ ရက်တွင် ထိုင်းအစိုးရဘက်မှ လေကြောင်း၊ ရေကြောင်းနှင့် ကုန်းလမ်းများမှ နယ်စပ်ဂိတ် များကို ပြန်လည်ဖွင့်လှစ်ကြောင်း ကြေညာချက် ထုတ်ပြန်ပြောဆိုထားသော်လည်း မြန်မာ နှင့် နယ်နမိတ်ချင်းထိ စပ်နေသည့် တာချီလိတ် နယ်စပ်ဂိတ် ဖွင့်လှစ်ရန် မပါခဲ့ကြောင်း ပြည်သူများက ပြောဆိုနေကြသည်။
“ကျနော်တို့ ဒေသခံတွေ အနေနဲ့တော့ ဒီနယ်စပ်တံခါးကို မြန်မြန်ဖွင့်စေချင်တယ်၊ ဒီတံခါးမဖွင့်လို့ ကျနော်တို့က ပစ္စည်းတစ်ခုခုလိုချင်လို့ ဆိုရင်လည်း မှာနေရတယ်၊ ပိုက်ဆံကုန်ရတယ်၊ အချိန်လည်းကြာတယ်၊ လူကိုယ်တိုင် သွားရတာလောက် အဆင်မပြေဘူး” ဟု တာချီလိတ်မြို့မှ အမျိုးသားတစ်ဦးက သျှမ်းသံတော်ဆင့်ကို ပြောသည်။
မြန်မာ-ထိုင်းနယ်စပ် နှစ်နိုင်ငံ ချစ်ကြည်ရေးတံတား အမှတ် (၁) တံတား ပိတ်ထားမှုကြောင့် တာချီလိတ်ဘက်မှ ဒေသခံပြည်သူများအတွက် ကုန်သွယ်ရေး၊ စီးပွားရေး ကဏ္ဌများအပြင် ကျန်းမာရေးနှင့် ပညာရေးအပိုင်းမှာလည်း ထိခိုက်နစ်နာမှုများရှိနေကြောင်း တာချီလိတ်မြို့နေ အသက် ၃၀ အရွယ် အမျိုးသမီးတစ်ဦးက ပြောသည်။
“ဒီတာချီလိတ်ဘက်ကနေ တံတားကိုကျော်ပြီး အဲ့ထိုင်းဘက် ကျောင်းသွားတက်တဲ့ ကလေးတော်တော်များ ရှိနေ တယ်၊ အခု တံတားက ပိတ်ထားတော့ ကလေးတွေက ကျောင်းလည်း မတက်ရဘူး၊ ပြီးတော့ နာမကျန်း ပြည်သူတွေက အဲ့ဘက် ဆရာဝန်တွေ ဆေးခန်းတွေနဲ့ ချိတ်ပြီး ကုသမှုခံယူတာမျိုးတွေလည်း မရနိုင်တော့ဘူး၊ ဒါတွေက နည်းတဲ့ထိခိုက်မှု မဟုတ်ပါဘူးလေ “ ဟု ၎င်းအမျိုးသမီးက ပြောသည်။
ထို့ပြင် မြန်မာ – ထိုင်းနယ်စပ် တံခါးမဖွင့်သေးဘဲ ဆက်လက်ပိတ်ထားနေသေးသည့် အခြေအနေသည် ပြည်သူ့ကာကွယ်ရေးတပ်ဖွဲ့များ အတွက် လက်နက်ခဲယမ်းတင်သွင်းမှု လွယ်ကူလာမှာကို စစ်ကောင်စီတို့ စိုးရိမ်နေခြင်းဖြစ်သည်ဟု ယူဆကြောင်း တာချီလိတ်မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီဘက်က လက်နက်တွေတင်သွင်းမှု ပိုများလာမှာကို စိုးရိမ်တာလည်း ဖြစ်နိုင်တယ်၊ ဘာဖြစ်လို့လည်း ဆိုရင် PDF တွေအတွက်လည်း လက်နက်တွေက လိုအပ်နေတာဆိုတော့ စစ်ကောင်စီတွေက ဒါကို တားဆီး ပိတ်ပင် ချင်နေတာလည်း ဖြစ်နိုင်တယ်” ဟု တာချီလိတ်မြို့ခံ အမျိုးသားတစ်ဦးက ပြောသည်။
ပြီးခဲ့သည့် ဧပြီလ ၂၅ ရက်တွင် ထိုင်းအစိုးရဘက်မှ မြန်မာ – ထိုင်းနယ်စပ်မှ ထိုင်းဘက်တံတားကို သန့်ရှင်းရေးများ လုပ်ဆောင်နေသည်ကို မြင်တွေ့ခဲ့ရသော်လည်း ယနေ့အထိ ဆက်လက်ပိတ်ထားကြောင်း သတင်းသိရသည်။
မယ်ဆိုင် – တာချီလိတ် နယ်စပ်ဂိတ်တံတားသည် ပြီးခဲ့သည့် ၂၀၂၀ မတ်လအတွင်းမှ စတင်ကာ ကိုဗစ် – ၁၉ ရောဂါ ပျံ့နှံ့ကူးစက်မှုကြောင့် ပိတ်ထားခဲ့ရပြီး ရောဂါအခြေအနေအပါအဝင် နိုင်ငံရေးအခြေအနေများကြောင့် ယနေ့အချိန်အထိ ၂ နှစ်ကျော်ကြာ ပိတ်သိမ်းထားရကြောင်းလည်း သိရသည်။
Leave a Comments