ထိုင်းနိုင်ငံ ချင်းမိုင်မြို့မှ မြန်မာကောင်စစ်ဝန်ချုပ်ရုံး သံဝန်ထမ်းအမျိုးသမီး ဒေါ်မြသိင်္ဂီသည် CDM လှုပ်ရှားမှုမှာ ပူးပေါင်းပါဝင်လာကြောင်း စုံစမ်းသိရသည်။

ဒေါ်မြသိင်္ဂီသည် မေ (၃)ရက်မှစတင်ပြီး CDM တွင် ပူးပေါင်းပါ၀င်ကြောင်း ၎င်း၏ လူမှုကွန်ရက်စာမျက်နှာတွင် အသိပေး ကြေညာထားလိုက်သည်။

” ရွေးကောက်ခံအစိုးရ ရဲ့ စေလွှတ်မှုနဲ့ ထိုင်းနိုင်ငံမှာ မြန်မာနိုင်ငံကိုယ်စားပြု တာဝန်ထမ်းဆောင်နေတဲ့ သံဝန်ထမ်းတစ်ဦးဖြစ်တာကြောင့် မတရား အာဏာသိမ်းထားတဲ့ စစ်အုပ်စုရဲ့လက်အောက်မှာ ဆက်လက်တာဝန်မထမ်းဆောင်လို့တဲ့အပြင် နိုင်ငံတကာ စာမျက်နှာမှာလည်း တရားမဝင် စစ်အုပ်စုကို ကိုယ်စားပြုဖို့ ဆန္ဒမရှိတာကြောင့် CDMလုပ်လိုက်တာ” ဟု ဒေါ်မြသိင်္ဂီ က ၎င်း၏ လူမှုကွန်ရက်စာမျက်နှာတွင်ရေးသားထားသည်။

အဆိုပါ တရားမဝင် စစ်အုပ်စုကို ကိုယ်စားပြုရန် ဆန္ဒမရှိခြင်း၊ ဒီမိုကရေစီ ပြန်လည်ရရှိရန်အတွက် ကြိုးပမ်းလျက်ရှိသည့် မြန်မာနိုင်ငံ ပြည်သူများအပေါ် ဖမ်းဆီးသတ်ဖြတ် နှိမ်နင်းမှုများကို လုံးဝ လက်ခံနိုင်ခြင်း မရှိသည့်အတွက် CDM လုပ်ဖော်ကိုင်ဘက် ဝန်ထမ်းများနှင့် အတူ ပြည်သူ့ဘက်မှ ရပ်တည်ပြီး Civil Disobedient Movement (CDM) တွင် ပါဝင်သွားမည် ဖြစ်ကြောင်းလည်း သူမက ရေးသားထားသည်။

ပြည်သူ့ဝန်ထမ်းတစ်ဦးဖြစ်သည့်အတွက် ပြည်သူ ဓမ္မဘက်မှသာ အခိုင်အမာရပ်တည်သွားမည်ဖြစ်ပြီး တရားမျှတမှု၊ ဖြောင့်မတ်မှန်ကန်မှုနှင့် အမှန်တရားတို့ကို အလိုရှိကြောင်း ဒေါ်မြသိင်္ဂီ က ဆိုသည်။

ရွေးကောက်ခံ အရပ်သားအစိုးရ ကိုဖြုတ်ချပြီး အာဏာသိမ်းလိုက်သည့် စစ်တပ်၏ လုပ်ရပ်ကို လက်မခံနိုင်သည့်အတွက် CDM လှုပ်ရှားမှုကို အာဏာသိမ်းပြီး ရက်ပိုင်းအကြာတွင် ဌာနအသီးသီးက ဝန်ထမ်းတွေဟာ ဆောင်ရွက်ခဲ့ကြသည်။