သျှမ်းပြည်မြောက်ပိုင်း သီပေါမြို့ရှိ မြို့လယ်ရပ်ကွက် မှ TV နှင့် စလောင်းများကို ပြုပြင်သည့် နေအိမ်မှ မီးစတင်လောင်ရာ နေအိမ် ၂ လုံး မီးလောင်ကျွမ်းခဲ့ကြောင်း စုံစမ်းသိရသည်။

ယနေ့ (မေလ ၅) ရက် မွန်းလွဲ ၂ နာရီဝန်းကျင်တွင် TV နှင့် စလောင်းများ အပါအဝင် လျှပ်စစ်ပစ္စည်းများ ပြုပြင်ရေး လုပ်ငန်းလုပ်ကိုင်သည့် နေအိမ်တစ်ခု နှင့် တစ်ဝန်းတည်းအတူရှိနေသည့် ကပ်လျက်အိမ်တစ်လုံးပါ မီးလောင်ကျွမ်းခြင်း ဖြစ်ကြောင်း သတင်းသိရသည်။

“မီးဘာကြောင့်လောင်ရလဲ ဆိုတာတော့ မသိရပါဘူး၊ ကျနော်တို့ရောက်သွားအချိန်မှာ မီးတောက်နေပြီ၊ မီးညွှန့် လည်း ကြီးနေတယ်၊စလောင်းတွေ TV တွေပြင်တဲ့ အိမ်နဲ့ သူ့ကပ်လျက် တစ်ဝန်းထဲက အိမ်ကိုမီးလောင်သွားတာ၊ လူထိခိုက်မှုတော့ မရှိပါဘူး”ဟု မီးငြိမ်းသတ်မှုတွင် ပါဝင်သည့် နယ်စည်းမခြား လူမှုကူညီရေးအသင်းဝင် တစ်ဦး က သျှမ်းသံတော်ဆင့်ကိုပြောသည်။

ထို့အပြင် အဆိုပါ မီးလောင်မှုဖြစ်ပွားသည့် နေရာသည် သီပေါ် မြို့လယ်ရပ်ကွက်မှ မူကြိုကျောင်းနှင့်လည်း အလွန်နီးကပ်နေသည့်အတွက် ကလေးငယ်များနှင့် ဆရာ/ဆရာမများက ကလေးငယ်များဘေးကင်းအောင် ကြိုးစား လုပ်ဆောင်ခဲ့သည့်အတွက် လူထိခိုက်မှု မရှိကြောင်း ဒေသခံတစ်ဦးက ပြောသည်။

မီးလောင်မှုဖြစ်ပွားသည့် နေအိမ်တွင် အိမ်ရှင်နှင့် မိသားစုဝင်များ ဘေးလွတ်ရာသို့ အချိန်မီ ထွက်ပြေး နိုင်ခဲ့သော်လည်း တန်ဖိုးကြီးပစ္စည်းနှင့် တခြား မည်သည့်ပစ္စည်းမှ ယူဆောင်နိုင်ခဲ့ခြင်းမရှိကြောင်း သိရသည်။

“အကုန်လုံးပြာကျသွားတာပါ၊ ဘာပစ္စည်းမှ မရလိုက်ခဲ့ရဘူး၊ လူတော့ အချိန်မှီထွက်လာနိုင်ခဲ့တယ်” ဟု အထက်ပါ လူမှုကူညီရေးအသင်းက သျှမ်းသံတော်ဆင့်ကို ပြောသည်။

လက်ရှိအချိန်သည် နွေရာသီပွင့်လင်းရာသီ ရောက်လာပြီ ဖြစ်သည့်အတွက် မီးဘေးအန္တရာယ်များ အထူး သတိပြုကြရန်လည်း မီးသတ်တပ်ဖွဲ့နှင့် လူမှုကူညီရေးအသင်းများက သတိပေးပြာဆိုထားသည်။