မူဆယ်မြို့နယ်တိုက်ပွဲကြား စကစ ပေါ်တာဆွဲသွားသည့် သျှမ်းလူငယ် ၂ဦး ကျည်ထိသေဆုံး

0

သျှမ်းပြည်မြောက်ပိုင်း မူဆယ်မြို့တွင် ဖြစ်ပွားခဲ့သည့် တိုက်ပွဲကြောင့် TYN (Tai Youths Network) မှ အလုပ် အမှုဆောင် အဖွဲ့ဝင်တစ်ဦးအပါအဝင် အရပ်သား သျှမ်းလူငယ်နှစ်ဦး ကျည်ထိမှန် သေဆုံးခဲ့ကြောင်း စုံစမ်းသိရသည်။

စကစ ပေါ်တာဆွဲခံရပြီး ကျည်ထိသေဆုံးသွားသည့် သျှမ်းလူငယ် ၂ဦး ရုပ်အလောင်း

မေလ ၄ ရက် ညနေ ၅ နာရီဝန်းကျင်တွင် မူဆယ်မြို့နယ် မော်တောင်းကျေးရွာအနီးတွင် TNLA တပ်ဖွဲ့ နှင့် စစ်ကောင်စီတို့ တိုက်ပွဲဖြစ်ပွားပြီး စစ်ကောင်စီဘက်မှ တပ်ဖွဲ့ဝင် ၁၂ ယောက် ကျဆုံးခဲ့ရသည့်အပြင် ပေါ်တာဆွဲခံရသည့် သျှမ်းလူငယ်နှစ်ဦးလည်း အသက်ဆုံးရှုံးလိုက်ရကြောင်း သိရသည်။

“ကျဆုံးသွားတဲ့သူက TYN ကအလုပ်အမှုဆောင်အဖွဲ့ဝင်တစ်ယောက်နဲ့ သူ့သူငယ်ချင်းတစ်ယောက်ပါ၊ သူတို့က မူဆယ်ကို ကားနဲ့သွားနေတဲ့အချိန် စစ်ကောင်စီစစ်ကြောင်းရဲ့ ပေါ်တာဆွဲခံလိုက်ရတာပေါ့နော်၊ မော်တောင်းရွာ အနီးမှာ TNLA က စောင့်ပြီး တိုက်ခိုက်တော့ အဲ့စစ်ကောင်စီတပ်ဖွဲ့ရော ပေါ်တာဆွဲခံလိုက်ရတဲ့ ကျနော်တို့ သျှမ်း လူငယ်နှစ်ယောက်လည်း ကျဆုံးခဲ့ရတယ်၊ စစ်ကောင်စီက ၁၂ ယောက်လို့ သိရတယ်” ဟု TYN က အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတို့၏ ပေါ်တာဆွဲခြင်းခံရပြီး TNLA တို့ ပစ်လိုက်သည့် လက်နက်ကြီးကြောင့် ထိမှန်သေဆုံးသွားရသည့် TYN အလုပ်အမှုဆောင် နှင့် သူငယ်ချင်းဖြစ်သူတို့၏ ရုပ်အလောင်းကို မူဆယ်မြို့မှ ပရဟိတ လူမှုကူညီရေးအသင်းများက သွားရောက်သယ်ဆောင်ခဲ့ရကြောင်း သိရသည်။

“တိုက်ပွဲက နာရီဝက်လောက်ကြာတယ်၊ TNLA ဘက်က လက်နက်ကြီးနဲ့ လှမ်းပစ်တဲ့ အသံရော စက်သေနတ်သံ တွေရော ကြားနေရတယ်၊ တိုက်ပွဲသံတွေငြိမ်သွားတော့ ၁၀၅ မိုင်က ပရဟိတအဖွဲ့တွေနဲ့ တချို့ပြည်သူတွေ သွားကြည့်တော့ အဲ့လို သေဆုံးမှုတွေတွေ့ရတာပဲ၊ ကျဆုံးသွားရတဲ့ သျှမ်းလူငယ်နှစ်ဦးရဲ့ ရုပ်အလောင်းကို မူဆယ်က ရင်ခွဲရုံမှာ ပို့ထားတယ်လို့သိရတယ်” ဟု လည်း တိုက်ပွဲအတွင်း ကျဆုံးသူ သျှမ်းလူငယ် ၏ သူငယ်ချင်းဖြစ်သူက သျှမ်းသံတော်ဆင့် ပြောသည်။

ထို တိုက်ပွဲဖြစ်စဥ်များနှင့် ပက်သက်ပြီး ဒေသခံများကို ဆက်သွယ်မေးမြန်းရာ TNLA တပ်ဖွဲ့တို့သည် မော်တောင်းကျေးရွာအနီးရှိ တောင်ကုန်းတစ်ခုပေါ်တွင် နေရာယူထားခြင်းဖြစ်ပြီး စစ်ကောင်စီတပ်သား ပေါ် တာဆွဲလာသည့် အရပ်သားပြည်သူကားကို ပစ်ခတ်ခြင်း ဖြစ်ကြောင်း မော်တောင်းကျေးရွာ ဒေသခံများထံမှ သိရသည်။

ထို့အပြင် တိုက်ပွဲအတွင်း ကျဆုံးခဲ့သည့် TYN မှ အလုပ်အမှုဆောင်အဖွဲ့ဝင်သည် သျှမ်းပြည်ညီညွှတ်ရေး ကော်မတီ (CSSU) မှ အဖွဲ့ဝင် တစ်ဦးဖြစ်ပြီး၊ ရပ်ရွာအရေး၊ စစ်ဘေးရှောင်အရေးကို ကူညီလုပ်ဆောင်နေသည့် လူငယ်ဖြစ်သည်။

တအာင်းအမျိုးသားလွတ်မြောက်ရေးတပ်မတော် (TNLA) တို့မှ စစ်ကောင်စီ မှ ပေါ်တာဆွဲပြီး အရပ်သားတင်ဆောင်လာသည့် ကားယာဥ်များပါမချန် တိုက်ခိုက်ပစ်ခတ်မှုနှင့် စစ်ကောင်စီတပ်ဖွဲ့တို့၏ အကြမ်းဖက်လုပ်ရပ်များဖြစ်သည့် လမ်းသွားလမ်းလာပြည်သူ့ ယာဥ်များကို ပေါ်တာဆွဲမှုကြောင့် အပြစ်မဲ့ သျှမ်းလူငယ် နှစ်ဦး အသက်ဆုံးရှုံးလိုက်ရသည်။

Leave a Comments