သျှမ်းပြည်မြောက်ပိုင်း တန့်ယန်းမြို့တွင် လုယက်ဓားပြတိုက်ယူမှု တစ်ခု ဖြစ်ပွားခဲ့ပြီးနောက် ဒေသခံပြည်သူများ အနေဖြင့် စိုးရိမ်မှု မြှင့်တက်နေကြောင်း သတင်းသိရသည်။
ပြီးခဲ့သည့် ဧပြီလ ၂၉ ရက်နေ့တွင် သူငယ်ချင်းဖြစ်သူ၏ မင်္ဂလာဆောင်မှ ပြန်လာသည့် အမျိုးသား လူငယ်တစ်ဦးသည် တန့်ယန်းမြို့ အမှတ် ၅ ရပ်ကွက်ရှိ ရွှေမောင်းကျောင်း အပေါ်ဘက်လမ်းအနီးတွင် ဓားပြတိုက် လုယက်တိုက်ခိုက် ခံခဲ့ရကြောင်း ဒေသခံများက ပြောသည်။
“သူက သူငယ်ချင်း မင်္ဂလာဆောင်ကနေ ပြန်လာတာ၊ ရွှေမောင်းကျောင်းရဲ့ အပေါ်ဘက်လမ်းကြားအရောက်တော့ Mark II ခဲရောင်တစ်စီးက ရှေ့ကနေ တားရပ်ပြီး လူ ၇ ယောက်က ဆင်းလာတယ်၊ ၃ ယောက်က ကားနား ရပ်ထားတယ်၊ ၄ ယောက်က သူ့ကိုကားပေါ်က ဆွဲဆင်းပြီး သူ့ပိုက်ဆံတွေ အကုန်ယူသွားတယ်” ဟု အဆိုပါ အမျိုးသားနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
နောက်မှ လိုက်လာသည့် ဆိုင်ကယ် မီးရောင်ကြောင့် ယင်းလုယက်သူတစ်စုတို့သည် ပိုက်ဆံနှင့် ကားထဲမှ တန်ဖိုး ကြီး ပစ္စည်းများကို ယူဆောင်ကာ အမြန်ပြန်ထွက်သွားကြောင်း ၊ လူကို အန္တရာယ်ပြုခြင်း မရှိကြောင်း သိရသည်။
ထို့အပြင် လာရောက်လုယက်သူတို့သည် အမျိုးသားများ ဖြစ်ကြပြီး စုစုပေါင်း ၇ ယောက် နှင့် သျှမ်းစကားပြောဆိုမှုလည်း မရှိကြောင်း အဆိုပါ ပုဂ္ဂိုလ်က ပြောသည်။
“နောက်က လိုက်လာတဲ့ ဆိုင်ကယ်မီးရောင်ကြောင့်ပဲ သူသက်သာသွားတယ်ပြောရမှာပေါ့၊ အိမ်ပြန်ရောက်တော့ လိပ်ပြာတောင်ပြန်ခေါ်ယူရတယ်၊ မိသားစုတွေက ရပ်ကွက်ရုံးကို သွားပြီး အကြောင်းကြားပြီးပြီ၊ မြို့နယ် ရဲစခန်းကိုလည်း တိုင်ထားတယ်၊ အခုထိ ကျူးလွန်သူကို ဖမ်းမိတယ်လို့ မကြားရသေးဘူး” ဟု ၎င်းက ဆက်ပြောသည်။
တန့်ယန်းမြို့နယ်အတွင်း ယခုလို အုပ်စုဖွဲ့ ကားဖြင့်လုယက်မှုသည် ပထမဆုံးအကြိမ် ဖြစ်နေပြီး နယ်မြေခံရဲတို့မှ ထိရောက်သည့် အရေးယူမှုများ မလုပ်ဆောင်နိုင်ရာ ယင်းဖြစ်စဥ် ဖြစ်ပွားခဲ့ပြီးနောက် ရပ်ကွက်အလိုက် ပြည်သူများက မိမိတို့ ရပ်ကွက်လုံခြုံရေးအတွက် အလှည့်ကျ ကင်းစောင့်မှုများ ပြုလုပ်ရန်လည်း စီစဥ်နေကြကြောင်း လည်း သိရသည်။
“ရဲတွေဘက်ကစုံစမ်းပေးမယ်ပြောထားပေမဲ့ ပြည်သူတွေက စိုးရိမ်ကြတယ်လေ၊ မိန်းကလေးတွေဆိုလည်း အပြင်တခါထွက်ဖို့ အများကြီး စဥ်းစားရပြီ၊ အဲ့ဒါကြောင့် သက်ဆိုင်ရာ ရပ်ကွက်အလိုက် အလှည့်ကျ ကင်းစောင့် တာတွေ လုပ်ဖို့ လိုအပ်လာတာပေါ့” ဟု အမှတ် ၅ ရပ်ကွက်မှ အမည်မဖော်လိုသူ ရပ်မိရပ်ဖ တစ်ဦးက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်း သျှမ်းပြည်အပါအဝင် မြန်မာနိုင်ငံတစ်ဝှမ်းလုံး၌ တရားဥပဒေ စိုးမိုးမှု နည်းပါးလာသည့်အပြင် ဒေသအတွင်း အုပ်စုဖွဲ့ ခိုးယူလုယက်မှုများနှင့် ခြိမ်းခြောက်သတ်ဖြတ်မှုများက တစ်နေ့တစ်ခြား များပြားလာကြောင်း သတင်းသိရသည်။
