သျှမ်းပြည်တောင်ပိုင်း ရွာငံမြို့နယ် လယ်ကိန်းကျေးရွာတွင် အမျိုးသမီး ၄ ယောက် အပါအဝင် စုစုပေါင်း ဒေသခံ ၃၄ ဦး ကို စစ်ကောင်စီတပ်ဖွဲ့က ဖမ်းဆီးထားကြောင်း စုံစမ်းသိရှိရသည်။
ပြီးခဲ့သည့် ဧပြီ ၂၆ ရက်တွင် အင်အား ၁၀၀ နီးပါးရှိသည့် စစ်ကောင်စီ စစ်ကြောင်းသည် ရွာငံမြို့နယ် လယ်ကိန်းကျေးရွာထဲသို့ ဝင်လာပြီး အမျိုးသမီး ၄ ဦးအပါအဝင် ဒေသခံ ၃၄ ဦးကို ဖမ်းဆီးခေါင်ဆောင်သွားကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြီးခဲ့တဲ့ ၂၆ ရက် ညနေပိုင်းမှာ ရွာထဲကို စစ်ကြောင်းဝင်လာပြီး ရွာထဲက ပြည်သူတွေကိုလာဖမ်းတယ်၊ ဘာကြောင့်ဖမ်းလဲဆိုတာ မသိရဘူး၊ ဒလန်လည်းပါတော့ အိမ်ထဲဝင်ဖမ်းတာ၊ တချို့က ထွက်ပြေးလွတ်သွားပေမဲ့ ၃၄ ယောက်လောက် ဖမ်းခံထားရတယ်၊ အမျိုးသမီး ၄ ယောက် နဲ့ အမျိုးသား ၃၀ ယောက်လောက် ဖမ်းထားတယ်” ဟု အထက်ပါ လူငယ်အမျိုးသားက သျှမ်းသံတော်ဆင့်ကို ပြောသည်။
စစ်ကောင်စီတပ်သားတို့သည် လယ်ကိန်းကျေးရွာသား ၃၀ ဦးကို စစ်သားတစ်ချို့ပါသည့် ကားနှစ်စီး နှင့် အတူ ကလောမြို့သို့ ခေါ်ဆောင်သွားပြီး အမျိုးသမီး ၄ ဦးကို ၎င်းတို့စခန်းချထားရာ ရွာအနီးမှ စခန်းတွင်း ခေါ်ဆောင်ထားကြောင်း ဒေသခံများက ပြောသည်။
“ဖမ်းဆီးတဲ့ ရွာသားတွေကို ကလော ပို့လိုက်တယ်၊ အမျိုးသမီးတွေတော့ မပါသွားဘူး၊ သူတို့ရွာအနီးက စခန်းအနီးမှာပဲ ခေါ်ထားသေးတယ်လို့ သိရတယ်၊ အဲ့စခန်းမှာ အရင်နေ့တုန်းက ထမင်းဟင်းချက်ဖို့ ခေါ်သွားတဲ့ ဒေသခံ အမျိုးသမီးတချို့လည်း ရှိနေတယ်” ဟု လယ်ကိန်းကျေးရွာ အနီးရှိ နဘန်းကြီး ကျေးရွာသားတစ်ဦးက ပြောသည်။
လယ်ကိန်းကျေးရွာသည် အိမ်ခြေ ၃၀၀ ကျော်ရှိသည့် ရွာကြီးတစ်ရွာဖြစ်သည့်အပြင် စစ်တပ်မှ နိုင်ငံတော် အာဏာသိမ်းယူမှု မဖြစ်ပွားခင် နှင့် ရွာငံမြို့နယ်အတွင်း စစ်ကြောင်းထိုးမှု မဖြစ်ပွားခင်တွင် အေးချမ်းလှသည့် ကျေးရွာဖြစ်ကြောင်း သိရသည်။
လက်ရှိတွင် စစ်ကောင်စီတပ်ဖွဲ့တို့သည် ရွာငံမြို့ အရှေ့ဘက်ရှိ အုပ်တွင်းကျေးရွာ၊ ထမင်းပေါင်းကျေးရွာ၊ ကြံတောကျေးရွာ နှင့် ပေါစောကျေးရွာတို့မှာလည်း စစ်သားအင်အားများစွာဖြင့် ဖြန့်ကျက်နေရာယူထား ကြောင်းလည်း သိရသည်။
“အင်အားက ၁၀၀ ရှိနေပါတယ်၊ စစ်ကောင်စီတွေက ရွာသားတွေ ဖမ်းပြီးလမ်းပြလုပ်ခိုင်းတာ ရှိတယ်၊ ရွာသားတော်တော်များများတော့ ထွက်ပြေးနေကြပြီ၊ ဒီနေ့ကတော့ အုပ်တွင်းကျေးရွာမှာ ရှိနေတယ်၊ လူမနေပဲ ထွက်ပြေးနေတဲ့ ရွာသားတွေရဲ့ အိမ်ထဲဝင်ပြီး တန်ဖိုးကြီးတဲ့ပစ္စည်းတွေ ဖုန်းတွေ ယူသွားတယ်” ဟု ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဧပြီလ ၁၇ ရက်တွင်လည်း ပဲရင်းတောင်ကျေးရွာမှ ရွာသား ၆ ဦးကို PDF နှင့် ဆက်စပ်သည် ဆိုသည့် စွပ်စွဲချက်များဖြင့် စစ်ကောင်စီက သတ်ဖြတ်လိုက်ကြောင်းလည်း သိရသည်။
လက်ရှိ ရွာငံမြို့နယ်အတွင်းတွင် စစ်ကောင်စီတပ်သားတို့၏ လူမဆန်သည့် အကြမ်းဖက် လုပ်ရပ်များကြောင့် ဒေသခံပြည်သူများ ၈၀၀ ခန့် ထွက်ပြေးတိမ်းရှောင်နေကြရပြီး ဒေသခံပြည်သူ့ ကာကွယ်ရေး တပ်ဖွဲ့များနှင့် စစ်ရှောင်တို့အတွက် အရေးပေါ် ကူညီထောက်ပံ့မှုများလိုအပ် နေကြောင်းသိရသည်။
Leave a Comments