သျှမ်းပြည်မြောက်ပိုင်း နောင်ချိုမြို့နယ် ဆမ္မဆယ်ကျေးရွာက စက်သုံးဆီဆိုင်မှ လူငယ် (၂) ဦးကို အမည်မသိ လက်နက်ကိုင်တပ်ဖွဲ့မှ ဖမ်းဆီးသွားကြောင်း စုံစမ်းသိရသည်။
ယနေ့ (မေ ၃)ရက် နေ့လည် ၁၂ နာရီဝန်းကျင်တွင် အမည်မသိ လက်နက်ကိုင်အဖွဲ့စည်းတစ်ခုမှ ဆမ္မဆယ်ကျေးရွာအတွင်းရှိ ဆီဆိုင်ပိုင်ရှင်၏ သားနှင့် မြေးဖြစ်သူ အမျိုးသမီးကို လက်နက်အပြည့်စုံဖြင့် လာရောက်ဖမ်းဆီးသွားကြောင်းသိရသည်။
“ လူ (၅) ယောက်လောက် ကားတစ်စီးနဲ့ လာဖမ်းသွားတာ။ ဘယ်အဖွဲ့စည်းက လာဖမ်းသွားလဲတော့မသိဘူး။ သေနတ်တွေလည်းပါတယ်။ ကျေးရွာတွင်းရှိ ဆီဆိုင်တစ်ခုရဲ့ သားနဲ့ မြေးဖြစ်သူကို လာဖမ်းသွားတာ။ ဘာကြောင့်ဖမ်းလဲခုထိတော့ အသေးစိတ်မသိရသေးဘူး” ဟု နောင်ချိုမြို့နယ်ရှိ အမျိုးသားတစ်ဦးက ပြောသည်။
အဆိုပါ ဖမ်းဆီးခံရသည့် လူငယ် ၂ ဦးသည် အသက် (၂၀) ဝန်းကျင်သာရှိပြီး အမျိုးသား တစ်ဦး နှင့် အမျိုးသမီး တစ်ဦး ဖြစ်ကြောင်းသိရသည်။
Leave a Comments