သျှမ်းပြည်မြောက်ပိုင်း မူဆယ်ခရိုင် မုံးပေါ်တိုက်နယ်အတွင်းတွင် စစ်ကောင်စီ နှင့် ကိုးကန့်တပ်ဖွဲ့ (MNDAA) တို့ တိုက်ပွဲဖြစ်ပွားရာ စစ်ကောင်စီတပ်ဖွဲ့တို့ ပစ်လိုက်သည့် လက်နက်ကြီးကြောင့် ကျေးရွာအနီးပတ်ဝန်းကျင် မီးလောင်ကျွမ်း နေကြောင်း သတင်းသိရသည်။

ယနေ့ ဧပြီလ ၂၇ ရက်  မွန်းလွဲပိုင်း ၁ နာရီဝန်းကျင်မှ ယခုသတင်းရေးသားနေချိန်အထိ မုံးပေါ်တိုက်နယ်အတွင်း တိုက်ပွဲပြင်းထန်ခဲ့ပြီး စစ်ကောင်စီတို့ပစ်လိုက်သည့် လက်နက်ကြီး ကျည်ဆန်ကြောင့် နောင်ခမ်းကျေးရွာ အနောက်ဘက်ရှိ ကြံခင်းကိုမီးလောင်ရာမှ ယခုတွင် ကျေးရွာအနီးပတ်ဝန်းကျင်ထိ မီးလောင်ကျွမ်း လာနေကြောင်း ဒေသခံတစ်ဦးက သျှမ်းသံတော်ဆင့်ကို သတင်းပေးပို့လာသည်။

“စစ်ကောင်စီတွေက တောင်ကုန်းတစ်ခုပေါ်မှာ တစ်ဖွဲ့နဲ့ နောင်ခမ်းရွာရဲ့ အရှေ့ဘက်မှာ တစ်ဖွဲ့ နေရာယူထားတယ်၊ MNDAA တွေက လယ်ထဲမှာနေရာယူထားတယ်၊ ဒီနောင်ခမ်းရွာရဲ့ အရှေ့ဘက်မှာ နေရာယူထားတဲ့ စစ်ကောင်စီတပ်ဖွဲ့ပစ်လိုက်တဲ့ လက်နက်ကြီးက ကြံခင်းတွေ၊ လက်ဖက်ခြံတွေထဲကျပြီး မီးလောင်တာ၊ အခုမီးက ရွာအစပ်တွေထဲအထိ လောင်ကျွမ်းနေပြီ” ဟု အခင်းဖြစ်ပွားသည့်နေရာမှ ဒေသခံအမျိုးသား တစ်ဦးက သျှမ်းသံတော်ဆင့် ကို ပြောသည်။

လက်ရှိတွင် မီးညွှန့်များသည် ကျေးရွာအနီးတစ်ဝိုက် လောင်ကျွမ်းလာနေသည့်အတွက် နောင်ခမ်း ကျေးရွာမှ ဒေသခံများသည် မုံးပေါမြို့ရှိ ဈေးရပ်ကွက်သို့ ထွက်ပြေးတိမ်းရှောင် နေရကြောင်းလည်း သိရသည်။

“ကျနော်တို့လည်း ရွာကထွက်လာပြီး အဝေးကနေ အခြေအနေကို ကြည့်နေရပါတယ်၊ အနီးကပ်တော့ သွားမ ကြည့်ရဲဘူး၊ တိုက်ပွဲလည်းရှိတယ်ဆိုတော့ မီးလောင်ကျွမ်းမှု အခြေအနေတွေကို မသိရသေးဘူး၊ မီးခိုးတွေ မီးညွှန့်တွေပဲ မြင်ရတယ်”ဟု အထက်ပါ အမျိုးသားက ပြောသည်။

အာဏာသိမ်းစစ်ကောင်စီတို့သည် သျှမ်းပြည်မြောက်ပိုင်း မူဆယ်ခရိုင် မုံးပေါ်တိုက်နယ်အတွင်း၌ KIA တပ်ဖွဲ့၊ MNDAA တပ်ဖွဲ့ကဲ့သို့သော တိုင်းရင်းသားလက်နက်ကိုင်များနှင့် ထိတွေ့တိုက်ပွဲများ မကြာခဏ ဖြစ်ပွားလေ့ရှိပြီး လက်ရှိအချိန်ထိ အင်အားဖြည့်တင်းကာ ထိုးစစ်ဆင်တိုက်ခိုက်မှုများ ပြုလုပ်နေခြင်း ဖြစ်ကြောင်းသိရသည်။

တိုင်းရင်းသားလက်နက်ကိုင်များနှင့် တိုက်ပွဲဖြစ်ပွားသည့် နေရာများတွင် စစ်ကောင်စီဘက်မှ စစ်ကူအင်အား အမြောက်အများဖြင့် အကြိမ်ကြိမ် အင်အားဖြည့်ကာ ထိုးစစ်ဆင်ခဲ့သော်လည်း စစ်ကောင်စီဘက်သာ အထိနာခဲ့ကြောင်းလည်း သိရသည်။

ယနေ့ ဖြစ်ပွားသည့် မုံးပေါ်တိုက်နယ်မှ တိုက်ပွဲဖြစ်ပွားမှု နှင့် မီးလောင်ကျွမ်းမှု အခြေအနေများ၏ နောက်ဆက်တွဲများကို သျှမ်းသံတော်ဆင့်မှ ဆက်လက်စုံစမ်းနေလျက်ရှိပါသည်။