သျှမ်းပြည်မြောက်ပိုင်း နယ်ခမ်းမြို့နယ်ရှိ မန့်ဟောင်းကူးတိုဆိပ်တွင် ပိုင်ရှင်မဲ့ လူငယ် အမျိုးသား အလောင်းတစ်လောင်း တွေ့ရှိခဲ့ကြောင်း စုံစမ်းသိရှိရသည်။
ယမန်နေ့ ဧပြီ (၂၆) ရက် ညနေပိုင်းမှာ မန့်ဟောင်းကူးတိုဆိပ်မှာ တွေ့ရှိခဲ့ပြီး ထိုလူငယ်အမျိုးသား၏ ရုပ်အလောင်းသည် ပုပ်ပွနေသဖြင့် ခွဲခြားမသိ နိုင်ကြောင်း နမ့်ခမ်းပရဟိတအသင်း NMBG ကပြောသည်။
“ဘယ်နေ့ကတည်းက မျောလာတဲ့ အလောင်းလည်းတော့မသိရဘူး။ ပိုင်ရှင်မဲ့ဖြစ်နေတယ်။ မနေ့တော့ တစ်ညထားလိုက်တယ်။ ဒီမနက်မှာသဂြိုလ်ပေးလိုက်ပြီ။ အလောင်းက အနံ့တော်တော်ထွက်နေပြီ” ဟု နမ့်ခမ်းပရဟိတအသင်း တစ်ဦး ကပြောသည်။
မူဆယ်မြို့တွင် အသက် (၁၃) နှစ်အရွယ် အမျိုးသားတစ်ဦး ရေနစ်သေဆုံးသွားပြီး ယမန်နေ့ထိ အလောင်းရှာမတွေ့သေးသဖြင့် နမ့်ခမ်းပရဟိတအသင်းကို ဆက်သွယ်အကူညီတောင်းကာ ပရဟိတအသင်းမှ လိုက်လံရှာဖွေပြီး ၎င်းအလောင်းကို တွေ့ရှိခဲ့ကြောင်း NMBG တစ်ဦးက သျှမ်းသံတော်ဆင့် ကိုပြောသည်။
“ကျနော်တို့ ရှာတွေ့တဲ့အလောင်းကို ပြတော့ သူ့မိဘတွေက မဟုတ်ဘူးလို့ပြောတယ်။ အလောင်းက ပုပ်ပွနေပြီ အားကစားဘောင်းဘီကလွဲပြီး ဘာသက်သေအချက်လက်မသိနိုင်တော့ဘူး။ မူဆယ်ဘက်က သူတို့ကလေးမဟုတ်ဘူးဆိုတော့ ဘယ်သူ့ကလေးမှန်းလည်းမသိရဘူး။ ပိုင်ရှင်မဲ့ဖြစ်နေတော့ ကျနော်တို့လဲ မီးသဂြိုလ်ပေးလိုက်တယ်” ဟု နမ့်ခမ်းပရဟိတအသင်း တစ်ဦးက သျှမ်းသံတော်ဆင့် ကိုပြောသည်။
ဧပြီ (၂၂) ရက်နေ့က မူဆယ်မြို့ရှိ ရွှေလီမြစ်အတွင်း ကလေးငယ်တစ်ဦးရေထဲ ပျောက်ဆုံးသွားပြီး ယနေ့ထိ အလောင်းရှာမတွေ့ခြင်း၊ အလားတူ သင်္ကြန်အတွင်း မူဆယ်မြို့ ရွှေလီမြစ် တွင် အမျိုးသားတစ်ဦး ရေထဲ ပျောက်ဆုံးသွားပြီး ရှာဖွေတွေ့ရှိခဲ့ခြင်း မရှိသေးကြောင်း သိရှိရသည်။
Leave a Comments