သျှမ်းပြည်တောင်ပိုင်း ရွာငံမြို့နယ် ပဲရင်းတောင်ရွာသားများကို စစ်ကောင်စီတပ်သားများနှင့် ၎င်းတို့၏ လက်အောက်ခံ ပျူစောထီးများက ဖမ်းဆီးခေါ်ဆောင်သွားပြီး အကြောင်းမဲ့ သတ်ဖြတ်လိုက်ကြောင်း သတင်းသိရသည်။

ပြီးခဲ့သည့် ဧပြီလ ၁၇ ရက်တွင် ပဲရင်းတောင်ကျေးရွာမှ ရွာသား ၆ ဦးကို ဒလန်သတင်းပေးမှုကြောင့် ဖမ်းဆီး ခေါ်ဆောင်သွားပြီးနောက် သတ်ဖြတ်ခံလိုက်ရခြင်း ဖြစ်ကြောင်း ဒေသခံရွာသားတစ်ဦးက သျှမ်းသံတော်ဆင့် ကို ပြောသည်။

“သူတို့ ၆ ဦးက ပဲရင်းတောင် ဒေသခံစစ်တွေပါ၊ အရင်နေ့တွေတုန်းက သူတို့ရှောင်တိမ်းခဲ့သေးတယ်၊ ဒါပေမဲ့ ၁၇ ရက်နေ့မှာ အိမ်ကို ပြန်လာတဲ့အချိန် အဖမ်းခံလိုက်ရတာပါ၊ ၁၉ ရက်နေ့မှာတော့ ရွာရဲ့အနောက်ဘက် ကွင်းပြင် ထဲမှာ သူတို့ကို သတ်ပြစ်လိုက်တာ၊ ပုံတွေက စစ်တပ်ရဲ့ Telegram Channel မှာတက်လာတယ်” ဟု ပဲရင်းတောင်ရွာသားတစ်ဦးက သျှမ်းသံတော်ဆင့်ကို ပြောသည်။

ဖမ်းဆီးသတ်ဖြတ်ခံရသူများသည် ပဲရင်းတောင်ကျေးရွာ ဒေသခံ ကိုတင်ဖေ ၊ ကိုလှစိုး ၊ ကိုထွန်းဦး ၊ မောင်သက် အောင် ၊ ကိုမျိုးထွေး ၊ ကိုဝင်းနိုင် တို့ဖြစ်ကြပြီး အလောင်းများကိုလည်း စစ်ကောင်စီတပ်ဖွဲ့တို့မှ ကားတာယာ များဖြင့် မီးရှို့သွားကြောင်း သတင်းသိရသည်။

ယင်းကဲ့သို့ ပဲရင်းတောင်ရွာသားများ သတ်ဖြတ်ခံရခြင်းနှင့် ပက်သက်ပြီး အပြစ်မဲ့ ဒေသခံပြည်သူများကို အကြမ်းဖက် စစ်ကောင်စီက PDF ဟု အမည်တပ် စွပ်စွဲကာ သတ်ဖြတ်ခဲ့ခြင်းဖြစ်ကြောင်း ရွာငံပြည်သူ့ ကာကွယ်ရေးတပ်ဖွဲ့ (YPDF) က ယနေ့ ဧပြီလ ၂၂ ရက်တွင် ထုတ်ပြန်ခဲ့သည်။

ယင်းဖြစ်စဉ်များအပေါ် စစ်ကောင်စီ Telegram Channel များတွင် ပဲရင်းတောင်ကျေးရွာမှ PDF အလောင်း ၆ လောင်း၊ တူမီး ၂ လက်၊ လက်လုပ်ဗုံး ၄ လုံး၊ မှန်ပြောင်း ၁ လက် သိမ်းဆည်းရမိခဲ့ကြောင်း ဝါဒဖြန့် ဖော်ပြခဲ့သည်။

လက်ရှိ ရွာငံမြို့နယ်အတွင်းတွင် စစ်ကောင်စီတပ်သားတို့၏ လူမဆန်သည့် အကြမ်းဖက် လုပ်ရပ်များကြောင့် ဒေသခံပြည်သူများ ၄၀၀ ခန့်ထွက်ပြေးတိမ်းရှောင်နေကြရပြီး ဒေသခံပြည်သူ့ ကာကွယ်ရေးတပ်ဖွဲ့များနှင့် စစ်ရှောင်တို့အတွက် အရေးပေါ် ကူညီထောက်ပံ့မှုများလိုအပ် နေကြောင်းသိရသည်။