သျှမ်းပြည်တောင်ပိုင်း ရွာငံမြို့နယ်အတွင်း စစ်ကောင်စီဘက်မှ အင်အား အဆက်မပြတ် ဖြည့်တင်းမှုများရှိနေပြီး ထိုးစစ်ဆင်တိုက်ခိုက်မှုများ ဖြစ်လာနိုင်သောကြောင့် ဒေသခံပြည်သူများ ထွက်ပြေးတိမ်းရှောင်နေရကြောင်း စုံစမ်းသိရှိရသည်။
ပြီးခဲ့သည့် ဧပြီ ၂၀ ရက် နေ့ခင်းပိုင်းတွင် နဘန်းကြီးကျေးရွာအတွင်းမှ PDF စခန်းတစ်ခုကို စစ်ကောင်စီတို့ တွေ့ရှိပြီး တိုက်ခိုက်နှိမ်နင်းခဲ့ရာမှ စတင်ကာ ယနေ့အချိန်အထိ စစ်အင်အားဖြည့်တင်းမှုများ နှင့် ရွာဘေးပတ်လည်တွင် အင်အားဖြန့်ကျက်နေရာယူမှုများ လုပ်ဆောင်လာကြောင်း ဒေသခံများက ပြောဆိုကြသည်။
“သူတို့က မနေ့ကလည်း စစ်အင်အားဖြည့်တယ်၊ ဒီနေ့လည်း နဘန်းကြီးကျေးရွာထဲကို ကား ၃၀ ကျော် ထပ်ဖြည့်ထားတယ်၊ ရွာထဲ ရွာပြင်နဲ့ပတ်ပတ်လည်မှာရော နေရာယူထားတာ၊ တောထဲကို ဝင်ရှာတဲ့သူလည်း ရှိတယ်၊ သူတို့က ဒီအနီးမှာ PDF ထပ်ရှိနေသေးတယ်လို့ ထင်ပုံပဲ” ဟု ရွာသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ပြီးခဲ့သည့် ဧပြီ ၂၁ ရက် ညပိုင်းတွင် နဘန်းကြီးကျေးရွာမှ ကိုသက်ဦး၏ နေအိမ်ကို လည်းကောင်း၊ ယနေ့ ဧပြီ ၂၂ ရက် နံနက်အစောပိုင်းတွင် ပဲရင်းဝောာင် ကျေးရွာမှ ဦးနေဝင်း၏ နေအိမ်ကို လည်းကောင်း စစ်ကောင်စီတို့က မီးရှို့ဖျက်ဆီးခဲ့ကြောင်း သိရသည်။
“ညသန်းခေါင်အချိန် ၁ နာရီကျော်ကျော်လောက်မှာ သေနတ်ပစ်သံ ငါးချက်ကြားရတယ်၊ နောက်တော့ ဦးနေဝင်းရဲ့ အိမ်ကို မီးလောင်တိုက်လိုက်တာပဲ၊ အိမ်ရှင်တွေက သေလားရှင်လားတော့ မသိရဘူး၊ ပြီးတော့ နဘန်းကြီးရွာဘက်က လက်နက်ကြီးတွေကျတယ်လို့ ပြောတယ်၊ ကျနော်တို့ကတော့ အသံကြားရတာ” ဟု ပဲရင်းတောင် ရွာသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတို့သည် ယနေ့ ဧပြီ ၂၂ ရက်နေ့ နံနက် ၆ နာရီမှ စတင်ကာ နဘန်းကြီးကျေးရွာအတွင်းသို့ လက်နက်ကြီးဖြင့် အဆက်မပြတ်ပစ်ခတ်နေကြောင်းလည်း ဒေသခံများက ပြောသည်။
ယင်းကဲ့သို့ ကြုံတွေ့နေရသည့် စစ်ကောင်စီတပ်ဖွဲ့တို့၏ အကြမ်းဖက် လုပ်ရပ်များကြောင့် ဒေသခံရွာသားများ ကြောက်လန့်ကာ ဘေးပတ်ဝန်းကျင်ရှိ ကျေးရွာများနှင့် တောထဲသို့ ထွက်ပြေးတိမ်းရှောင်နေကြကြောင်း သိရသည်။
“တချို့ကတော့ အမျိုးတွေရှိတဲ့ အရပ်ဆီ သွားကြတယ်၊ တချို့ကလည်း တောထဲမှာ ပုန်းရှောင်နေကြရတယ်၊ အများဆုံးကတော့ နဘန်းကြီး၊ ပဲရင်းတောင်၊ သဲဖွက်ရွာ၊ လွှစင်ရွာက ဒေသခံတွေဖြစ်တယ်၊ အခုဆို ပြည်သူ ၃၀၀/ ၄၀၀ လောက်က ထွက်ပြေးတိမ်းရှောင်နေကြပြီဗျ” ဟု ပဲရင်းတောင်ကျေးရွာမှ လူငယ်တစ်ဦးက ပြောသည်။
ရွာငံမြို့နယ်အတွင်းမှ ထွက်ပြေးတိမ်းရှောင်နေရသည့် ပြည်သူများ ခန့်မှန်းခြေ ၄၀၀ နီးပါးရှိလာပြီ ဖြစ်သည့် အတွက် ကူညီထောက်ပံ့ရေးနှင့် နေရာစီစဥ်ပေးမှုများကို အနီးပတ်ဝန်းကျင်ရှိ ပြည်သူများ ဝိုင်းဝန်းကူညီ ပေးကြရန် တောင်းဆိုလိုကြောင်းလည်း ဒေသခံများက တောင်းဆိုထားသည်။
Leave a Comments