သျှမ်းပြည်မြောက်ပိုင်း နောင်ချိုမြို့နယ်တွင် ယနေ့(ဧပြီ ၂၀)ရက် မနက်ပိုင်းတွင် ဗုံးပေါက်ကွဲမှုနှင့် အတူ သေဆုံးခဲ့ရသော လူငယ်နှစ်ဦး၏ နေအိမ်များကို စစ်ကောင်စီတပ်သားများက ဝိုင်းဝန်းပိတ်ဆို့ကာ ရှာဖွေ စစ်ဆေးနေကြောင်း သတင်းသိရသည်။

နောင်ချိုုဒေသခံပြည်သူ့ကာကွယ်ရေးတပ်ဖွဲ့ဝင်နှစ်ဦး (NH PDF) သည် စစ်ကောင်စီတပ်ဖွဲ့နှင့် ဆက်စပ်ပက်သက် သူများကို သတိပေးမစ်ရှင်ဆောင်ရွက်မှုမှ လက်ကျန်ဗုံးများကို ဆိုင်ကယ်နှင့်အတူသယ်ဆောင်လာစဥ် ဗုံးပေါက် ကွဲမှုနှင့်ကြုံတွေ့ရကြောင်း NH PDF အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

“စကစတွေကို ဗုံးခွဲသတိပေးတဲ့ မစ်ရှင်တစ်ခုကနေ ပြန်လာတဲ့အချိန် သူတို့လက်ထဲ ကျန်နေတဲ့ လက်လုပ်မှိုင်း က ပေါက်ကွဲသွားတာပါ၊ ကျဆုံးသူတစ်ဦးက မြေစာရင်းဦးစီးဌာနကနေ CDM ပြုလုပ်ထားတဲ့သူပါ၊အခု ကျဆုံး သူတွေရဲ့ အိမ်ကို စကစတွေ ဝင်စစ်ပါတယ်။ သူတို့နှစ်ယောက်လုံးက နောင်ချိုက ပါပဲ” ဟု NH PDF တပ်ဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။

အဆိုပါ ကျဆုံးသူ နှစ်ဦးအနက် တစ်ဦးသည် နောင်ချိုမြို့ ပန်ဟတ်ရပ်ကွက်တွင် နေထိုင်သည့် CDM မှ လက်နက်ကိုင် တော်လှန်ရေးတပ်သား PDF ဖြစ်လာသူ တစ်ဦးဖြစ်ပြီး တခြားတစ်ဦးကို အတည်ပြုပြောဆိုရန် အတွက် စုံစမ်းနေသေးကြောင်းလည်း ၎င်းက ပြောသည်။

လက်ရှိတွင် ပန်ဟတ်ရပ်ကွက်တွင် နေထိုင်ခဲ့ဖူးသသည့် ကျဆုံးသွားခဲ့သူ မြေစာရင်းဦးစီးဌာနမှ CDM သမား၏ နေအိမ် နှင့် အနီးပတ်ဝန်းကျင်ကို စစ်ကောင်စီတပ်သားတို့ ရှာဖွေစစ်ဆေးခဲ့ပြီး ကင်းပုန်းများချထား လျက်ရှိသည့် အတွက် ကျန်ရစ်သူ မိသားစုများ၏ အခြေအနေကိုလည်း စိုးရိမ်ရကြောင်း သတင်းသိရသည်။

နောင်ချိုပြည်သူ့ကာကွယ်ရေးတပ်ဖွဲ့ဝင်မှ အဖွဲ့ဝင်တစ်ဦးသည် ပြီးခဲ့သည့် မတ်လ ၈ ရက်နေ့တွင် စစ်ကောင်စီတို့ ၏ ဖမ်းဆီးခြင်းကို ခံရပြီး ယနေ့အချိန်အထိ သတင်းအစအန နှင့် အဆက်အသွယ်မရရှိသေးကြောင်းလည်း သိရသည်။