သျှမ်းပြည်တောင်ပိုင်း မိုင်းကိုင်မြို့နယ် တုံလောကျေးရွာအုပ်စု တွန်ကျိုင်းကျေးရွာမှ ဒေသခံ (၂) ဦး အမဲလိုက်ရန် သွားနေစဉ် မြေမြုပ်မိုင်းနင်းမိပြီး တစ်ဦး သေဆုံးသွားကြောင်း စုံစမ်းသိရှိရသည်။
ပြီးခဲ့သည့် ဧပြီ (၁၆) ရက် သင်္ကြန်အတက်နေ့တွင် အသက် (၄၀) ကျော်အရွယ် လုံးဆမ် နှင့် လုံးလမ် တို့ (၂) ဦး အမဲလိုက်သွားရာ မြေမြုပ်မိုင်း နင်းမိခဲ့ပြီး လုံးဆမ်မှာ ဒဏ်ရာ ပြင်းထန်သည့်အတွက် သေဆုံးသွားခဲ့ရပြီး လုံးလမ်သည် ခြေထောက်တွင် ဒဏ်ရာပြင်းထန်ပြီး ဆေးကုသမှု ခံယူနေကြောင်း နီးစပ်သူ တစ်ဦးက ပြောသည်။
“ဘယ်အဖွဲ့ထောင်ထားတဲ့ မိုင်းတော့မသိရဘူး။ အမဲလိုက်ဖို့ တောထဲတောင်မရောက်သေးဘူး ခြံတွေနားပဲရောက်သေးတာ ထိသွားတယ်။ ဘယ်နှစ်ယောက်သွားလဲတော့ ကျနော်လဲ မသိရဘူး။ အရင်ကတော့ ကျနော်တို့သွားရင် (၁၅) ယောက်လောက်သွားကြတယ်” ဟု တွန်ကျိုင်းဒေသခံ အမျိုးသားတစ်ဦး က သျှမ်းသံတော်ဆင့် ကိုပြောသည်။
ထိုမြေမြုပ်မိုင်းကြောင့် အမျိုးသားတစ်ဦးသေဆုံးခဲ့ပြီး၊ မိုင်းစထိမှန်ထားပြီး နမ့်လန်ဆေးရုံသို့ ဆေးကုသမှု ခံယူသည့် လုံးလမ်သည် လက်ရှိမှာ နေအိမ်သို့ ပြန်လည်ရောက်ရှိပြီဖြစ်ကြောင်း မိသားစုနှင့် နီးစပ်သူ တစ်ဦးကပြောသည်။
“ဖြစ်တဲ့နေ့က နမ့်လန်ဆေးရုံကို ခေါ်သွားတယ်။ ခုတော့ အိမ်ကိုပြန်ခေါ်လာပြီ။ ဒဏ်ရာတော့မသက်သာသေးဘူး။ ဘာလို့ ပြန်ခေါ်လာလဲတော့ ကျနော်တို့လဲ သေချာမသိဘူး။ခြေထောက်မှာ ဒဏ်ရာပြင်းထန်တဲ့အတွက် ခြေထောက်ဖြတ်ရမှာ စိုးရိမ်တာလဲ ပါမယ်ထင်တယ်” ဟု မိသားစုနှင့် နီးစပ်သူ အမျိုးသား တစ်ဦးကပြောသည်။
တုံလောကျေးရွာအုပ်စု တွန်ကျိုင်းကျေးရွာတွင် ယခုလိုဖြစ်စဉ်မျိုးသည် ပထမဆုံးဖြစ်စဉ်ဖြစ်ပြီး ဒေသခံများ ရှာဖွေစားသောက်ရန်အတွက် စိုးရိမ်ထိတ်လန့်နေကြကြောင်း ဒေသခံများက ပြောဆိုကြသည်။
“အရင်တုန်းက တစ်ခါမှ မကြုံဖူးဘူး။ ဒေသခံတွေ ထိတ်လန့်နေကြတယ်။ ရှေ့ဆက် ဒီလိုအမဲလိုက်ဖို့ ခြံသွားဖို့ ဆိုတာ အခက်ခဲဖြစ်လာမယ်။ ဒီလိုမြေမြုပ်မိုင်း ထပ်သွားနင်းမိမှာ စိုးရိမ်တယ်” ဟု တွန်ကျိုင်းဒေသခံ တစ်ဦးကပြောသည်။
မိုင်းကိုင်မြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS) နှင့် သျှမ်းပြည်တိုးတက်ရေးပါတီ၊သျှမ်းပြည်တပ်မတော် (SSPP) တို့ ပြီးခဲ့သည့် ၂၀၂၁ ခုနှစ် အောက်တိုဘာလမှ စတင်ပြီး စစ်ရေးတင်းမာကာ တိုက်ပွဲများဖြစ်ပွားပြီး ဒေသခံ အများအပြား နေရပ်သို့ ထွက်ပြေးတိမ်းရှောင်ခဲ့ရခြင်း၊ မြေမြုပ်မိုင်းကြောင့် မကြာခဏ ဒေသခံများ ထိခိုက်ဒဏ်ရာရရှိသူများလည်း ရှိခဲ့သည်။
Leave a Comments