မိုးမောက်မြို့နယ်မှ စစ်ဘေးတိမ်းရှောင်နေရသည့် ပြည်သူများ၏ ကျေးရွာအတွင်း စစ်ကောင်စီ တပ်ဖွဲ့တို့၏ စခန်းချ နေထိုင်မှုများကြောင့် စစ်ဘေးရှောင်များ နေရပ်ပြန်ရန် ခက်ခဲနေကြောင်း သတင်းသိရသည်။
ပြီးခဲ့သည့် ၂၀၂၁ ခုနှစ်၊ မတ်လကတည်းက မိုးမောက်မြို့နယ်တွင် KIA တပ်ဖွဲ့နှင့် စစ်ကောင်စီတပ်ဖွဲ့တို့ စစ်ရေး ပြင်းထန်လာခဲ့ပြီး သျှမ်းလူထုနေထိုင်သည့် ကျေးရွာပေါင်း (၅၀)နီးပါးက ရွာလုံးကျွတ်ထွက်ပြေး လာခဲ့ရာ စစ်ကောင်စီတပ်ဖွဲ့တို့က ကျေးရွာအတွင်း နေရာယူတပ်စွဲထားခြင်း ဖြစ်ကြောင်း သိရသည်။
“မြို့သစ်၊ စီဟက်၊ ကုန်းလော့ စတဲ့ ရွာဘက်တွေမှာ တိုက်ပွဲအကြီးအကျယ်ဖြစ်တော့ ဒေသခံတွေက ရွာလုံးကျွတ် ထွက်ပြေးလာခဲ့ရတယ်၊ အခုအဲ့နေရာတွေက frontline of battles (စစ်ရေးတင်းမာသည့်မြေပြင်) လိုဖြစ်နေတာ၊ တချို့ရွာတွေမှာ ဗမာစစ်တပ်နေတယ်၊ တချို့ရွာတွေကျတော့ PDF တွေ KIA တွေ နေနေကြတယ်၊ ဒါကြောင့် မပြန်နိုင်ကြသေးဘူး” ဟု အခြေအနေအများကို သိရှိရသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီတို့ တပ်စွဲစခန်းချထားသည့် ကျေးရွာအများစုသည် သျှမ်းလူထုနေထိုင်ရာ ကျေးရွာများ ဖြစ်ကြပြီး တိမ်းရှောင်နေရသည့် ဒေသခံများအနေဖြင့်လည်း ဝမ်းစာရှာဖွေရေးအတွက် အခက်အခဲရှိနေမှု ကြောင့် နေရပ်ပြန်ချင်နေကြောင်း သိရသည်။
“သူတို့စရောက်တုန်းက အဆင်ပြေတဲ့ ဘုန်းကြီးကျောင်းတွေမှာပဲ နေကြရတာပေါ့၊ အဲ့နောက်တော့ Camps တွေ လုပ်ပြီး နေကြရတယ်၊ ဒါပေမဲ့သူတို့အရပ်မဟုတ်တော့ ဝမ်းစာအတွက် အလုပ်မရှိ၊ ခက်ခဲနေကြတော့ ပြန်ချင် ကြတာပေါ့၊ ဒါပေမဲ့စစ်သားတွေက ရွာထဲရှိနေတော့ မပြန်ရဲကြဘူး” ဟု အထက်ပါ ပုဂ္ဂိုလ်က ဆက်လက်ပြောပြ သည်။
လက်ရှိတွင် ဒေသအတွင်းပစ်ခတ်မှုများ ငြိမ်သက်နေသော်လည်း တစ်ဖက်နှင့် တစ်ဖက် စစ်ရေးတင်းမာမှုများရှိ နေသည့်အပြင် စစ်ကောင်စီတပ်သားတို့၏ ရမ်းသမ်းပစ်ခတ်မှု၊ ပြည်သူပိုင် ကြက်၊ဝက်၊နွား နှင့် ပစ္စည်းဥစ္စာ အိုး အိမ် စည်းစိမ်များကို ဖျက်ဆီး သတ်ဖြတ်ယူဆောင်စားသောက်မှု စသည့် အကြမ်းဖက်လုပ်ရပ်များရှိနေသည့် အတွက် ဒေသခံများက စိုးရိမ်ထိတ်လန့်နေကြောင်းလည်း သိရသည်။
မိုးမောက်မြို့နယ်အတွင်း KIA နှင့် အကြမ်းဖက်စစ်ကောင်စီတို့ မိုးမောက်မြို့နယ်တွင် စစ်ရေးပြင်းထန်နေစဥ် တွင် စစ်ကောင်စီမှ ရဟတ်ယာဉ်သုံးကာ လေကြောင်းလိုင်းဖြင့်ပစ်ခတ်မှုကြောင့် အရပ်သားနေအိမ် များစွာ ပျက်စီးခဲ့ရကြောင်းလည်း သိရသည်။
