သျှမ်းတောင် ရွာငံမြို့နယ် လွှစင်ကျေးရွာရှိနေအိမ်များကို သင်္ကြန်အကြိုနေ့ (ဧပြီ ၁၃)ရက် မနက် ၁နာရီ ၀န်းကျင်တွင် စစ်ကောင်စီ အုပ်စုမှ မီးရှို့ဖျက်ဆီးခဲ့ကြောင်း စုံစမ်းသိရသည်။
စစ်ကောင်စီ အုပ်စု မီးရှို့ဖျက်ဆီးလိုက်သည့် နေအိမ် (၂)လုံးရှိပြီး၊ အသက်မပြည့်ကလေးတစ်ဦးအပါအ၀င် လူငယ် ၂ဦးကို ဖမ်းဆီးသွားကြောင်း ရွာငံမြို့နယ်မှ အမည်မဖော်လိုသည့် လူငယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
” မနက် ၁နာရီမှာ ကားသုံးစီးနှင့် လာရှို့သွားတာ။ လူကတော့ အထိအခိုက် မရှိဘူး။ အိမ်နှစ်လုံးနှင့် အိမ်ထဲရှိ ပစ္စည်းအကုန်ပါသွားတာ။ မနေ့ညကပဲ ရွာက လူငယ်နှစ်ယောက်နှင့် ကလေးတစ်ယောက် ကို ရှောင်နေတဲ့ နေရာအထိ လာဖမ်းသွားတယ်” ဟု အမည်မဖော်လိုသည့် လူငယ်တစ်ဦးက ဆိုသည်။
ယခုရက်ပိုင်း စစ်ကောင်စီ အုပ်စုသည် ရွာငံမြို့နယ် လွှစင်ကျေးရွာမှ လူငယ်စုစုပေါင်း ၆ဦးဖမ်းဆီးသွားခဲ့ပြီး၊ ထိုထဲတွင် အသက် (၁၆)နှစ်အရွယ် လူငယ်တစ်ဦးလည်းပါ၀င်ကြောင်း သိရသည်။
ထို့အပြင် ဧပြီ ၁၂ရက် တွင်လည်း ရွာငံမြို့နယ် နွားဘန်းကြီးကျေးရွာမှ CDM လုပ်ထားသည့် ကျောင်းဆရာမ နေအိမ်ကိုလည်း စစ်ကောင်စီ မှ မီးရှို့ဖျက်ဆီးခဲ့ကြောင်း နွားဘန်းကြီးကျေးရွာမှ အသက် ၃၀အရွယ်ရှိ အမျိုးသားတစ်ဦးက ပြောသည်။
“ CDMဆရာမကို လာဖမ်းတာ။ ဆရာမရော သူ့အမျိုးသား ကိုအေးရွှေ က အိမ်မှာမရှိကြဘူး။ အဲ့ဒါနဲ့ စကစ က မီးရှို့ဖျက်ဆီးလိုက်တာ။ သူတို့တွေအိမ်မှာ မရှိတာ ၅ လလောက်ရှိပြီ။ အရင်ကတော့ လာလာချောင်းတယ်” ဟု ၎င်းက ပြောသည်။
CDM လုပ်ဆောင်ထားသည့် ဆရာမ၏ နေအိမ်ကို မီးမရှို့ခင်တွင် ၎င်းအိမ်အနီးလမ်းရှိ လမ်းသွားလမ်းလာ များအား ပိတ်ဆို့စစ်ဆေးခဲ့ပြီး လူရှင်းသွားသည့်အချိန်တွင် ဓာတ်ဆီလောင်းကာ မီးရှို့ဖျက်ဆီးခဲ့ခြင်းဖြစ်ကြောင်း သိရသည်။
ရွာငံမြို့နယ်အတွင်း စစ်ကောင်စီ အုပ်စုသည့် နေ့စဥ်ဆက်တိုက် ဖမ်းဆီးခြင်း၊ နေအိမ်မီးရှို့ဖျက်ဆီးခြင်းကို ရက်ဆက်တိုက်ပြုလုပ်လာသဖြင့် ပြည်သူများက ရွာထဲတွင် မနေရဲကာ ထွက်ပြေးတိမ်းရှောင်ရန် စစ်ကောင်စီကို ဆက်လက် တော်လှန်နေကြကြောင်းသိရသည်?
Leave a Comments