သျှမ်းပြည်တောင်ပိုင်း ဖယ်ခုံမြို့နယ် ရွှေပြည်အေးကျေးရွာသားတစ်ဦး စစ်ကောင်စီ ဖမ်းဆီးသွားပြီး (၂)လကျော် ကြာအထိ အဆက်အသွယ်မရသေးကြောင်း စုံစမ်းသိရှိရသည်။
ဖမ်းဆီးခံရသည့် ဦးဟန်ဝင်း အသက် (၃၈)နှစ်ကို ၂၀၂၂ ဖေဖော်ဝါရီ ၂၈ ရက်နေ့က စစ်ကောင်စီတို့ ကျေးရွာအတွင်း ဝင်ရောက်လာပြီး ပြည်သူ (၅)ဦးကို ဖမ်းဆီးထားပြီး (၄)ဦးကို လွှတ်ပေးကာ ဦးဟန်ဝင်းကို ဆက်လက်ဖမ်းဆီးထား ကြောင်း သိရသည်။
“သူတို့ဝင်လာဖမ်းတုန်းက (၅)ယောက် ဖမ်းတာ။ အဲနေ့မှာဘဲ (၄)ယောက် ပြန်လွတ်ပေးလိုက်တယ်။ အခုက ဦးဟန်ဝင်း ကို ဖမ်းထားတာ ပြန်မလွတ်လာသေးဘူး။ အဆက်သွယ်လည်းမရတော့ဘူး။ ဘယ်နားရှိနေလဲ၊ ဘယ်ကို ခေါ်သွားလဲဆိုတာ ကျနော်တို့လည်း မသိရသေးဘူး” ဟု ရွှေပြည်အေးကျေးရွာမှ အမည်မဖော်လိုသည့် ဒေသခံ အမျိုးသားက ပြောသည်။
ဦဟန်ဝင်း သည် ရွှေပြည်အေးကျေးရွာ ဒေသခံ ၁၉ ယောက် ဖမ်းဆီးခံရပြီးနောက်ပိုင်း ဖမ်းဆီးခံရသူတစ်ဦး ဖြစ်သည်။
ထို့အပြင် ဒိုင်းကာအဖြစ် ဖမ်းဆီးခံရသည့် ရွှေပြည်အေး ဒေသခံ ၁၉ ဦးသည် ၂ ဦး သေဆုံးသွားပြီး ကျန်ရှိနေသည့် ၁၇ ဦးကို တောင်လေးလုံးထောင်တွင် ပို့ဆောင်ထားပြီးဖြစ်ကြောင်း သိရသည်။
“ရွှေပြည်အေး တွေ အကုန်ပေါင်းရင် ၂၀ ယောက်လောက် ဖမ်းခံထားရတယ်။ အဲ့ထဲမှာ ၂ ယောက်သေသွားတာ။ နောက်မှ တစ်ယောက်ကို ထပ်ဖမ်းသွားတာ။ ၁၇ ယောက်ကတော့ တောင်လေးလုံးထောင်မှာ။ ဘာအမိန့်မှလည်း မချသေးဘူး” ဟု အထက်ပါ ဒေသခံအမျိုးသားက ပြောသည်။
ထိုဖမ်းဆီးခံထားရပြီး လူသားဒိုင်းအဖြစ် ခေါ်ဆောင်သွားသည့်သူများကို စစ်ကောင်စီ အုပ်စုက နိုင်ငံတော် ပုန်ကန်မှုဖြင့် အမှုဖွင့် တရားစွဲထားကြောင်း သိရသည်။
ထိုသူများသည် ကျေးရွာမှ ထွက်ပြေးတိမ်းရှောင်ရန် ခက်ခဲသည့်သူများဖြစ်ကြောင်း၊ ရွာစောင့်အနေဖြင့် ရွာတွင်း နေထိုင်ခဲ့သည့်သူများသာဖြစ်ကြောင်း သိရသည်
