သျှမ်းပြည်တောင်ပိုင်း ပင်းတယမြို့နယ်အတွင်းရောက်ရှိနေသည့် ကရင်နီစစ်ဘေးရှောင်များသည် စိုးရိမ်စိတ်များ စွာဖြင့် နေရပ်သို့ ပြန်သွားကြောင်း သတင်းသိရသည်။

ပြီးခဲ့သည့် ဧပြီလ ၁၀ နှင့် ၁၁ ရက်နေ့တို့တွင် ပင်းတယမြို့နယ်ရောက် ကရင်နီစစ်ရှောင်များတချို့သည် နေရပ်ပြန်လိုသည့်အတွက်ကြောင့် ဒေသတွင်း ပရဟိတသမားများ ပူးပေါင်းပြီး စစ်ရှောင်များကို နေရပ် ပြန်ပို့ပေးကြောင်း လူမှုကူညီရေးအသင်းဝင်တစ်ဦးက သျှမ်းသံတော်ဆင့်ကို ပြောသည်။

“စစ်ရှောင်တချို့က နေရပ်ပြန်ကြတယ်ဆိုလို့ ကျနော်တို့နဲ့ တခြားပရဟိတတွေပေါင်းပြီးတော့ စစ်ရှောင်တွေကို နေရပ်ပြန်ပို့ပေးကြပါတယ်၊ ကျနော်တို့က စစ်ရှောင်တွေကို ဆောင်းပြောင်းအထိပဲပို့ပေးနိုင်ပါတယ်၊ ကျန်တာကတော့ ဖယ်ခုံနဲ့ မိုးဗြဲဘက်က တခြားလူမှုရေးအသင်းတွေကို လာကြိုခိုင်းရတာပေါ့” ဟု အထက်ပါ လူမှုကူညီရေး အသင်းဝင်က သျှမ်းသံတော်ဆင့်ကို ပြောသည်။

နေရပ်ပြန်သည့် စစ်ရှောင်များအနက် တချို့စစ်ရှောင်များအတွက် စားနပ်ရိက္ခာများကိုလည်း ထောက်ပံ့ ပေးရကြောင်း စစ်ရှောင်များကို နေရပ်ပြန်ပို့ပေးသည့် ပရဟိတသမားများထံမှ သိရသည်။

“ပြန်တဲ့ စစ်ရှောင်တွေထဲက တချို့ဆို ဆန်လည်းမရှိလို့ ဆန်အိတ်တွေနဲ့ တခါတည်း ပို့ပေးရတာရှိတယ်၊ ပြီးတော့ မရှောင်လာနိုင်ဘဲ ဖယ်ခုံမြို့ထဲက ဘုန်းကြီးကျောင်းမှာ ရှိတဲ့ စစ်ရှောင်တွေအတွက်လည်း ရိက္ခာတွေ ပို့ပေးရတာ ရှိတယ်၊ ဒီပြန်သွားတဲ့ စစ်ရှောင်တွေက အများစုက ဖယ်ခုံ၊ မိုးဗြဲဘက်ဖြစ်ပါတယ်” ဟု ၎င်းက ပြောသည်။

လက်ရှိတွင် ပင်းတယမြို့ထဲ ရောက်ရှိနေသည့် ကရင်နီ စစ်ရှောင် ၆၀၀ ကျော်အနက် တိုက်ပွဲငြိမ်သက်နေသည့် ဒေသများမှ စစ်ရှောင် ၂၀၀ ခန့်က နေရပ်ပြန်သွားကြခြင်း ဖြစ်ကြောင်းသိရသည်။

“နယ်မြေငြိမ်တဲ့ ဒေသက သူတွေပဲ ပြန်ကြတာပေါ့၊ တချို့ဒေသက ရွာထဲ တိုက်ပွဲမဖြစ်ပေမဲ့ ရွာအနီးမှာတော့ တိုက်ပွဲဖြစ်နေသေးလို့ စိုးရိမ်စိတ်တော့ ရှိတာပေါ့နော်၊ ဒါပေမဲ့ အိမ်ကိုလည်း ပြန်ချင်နေကြတယ်ဆိုတော့ စိုးရိမ် စိတ်တွေနဲ့ သူတို့ကို ပြန်ပို့ပေးရတယ်၊ အခုက ၂၀၀ ကျော်ပြန်သွားပြီ” ဟု လူမှုကူညီရေးအသင်းဝင်က သျှမ်းသံတော်ဆင့်ကို ပြောသည်။

သျှမ်း-ကယားနယ်စပ် ဖယ်ခုံ၊ မိုးဗြဲဘက်တွင် တိုက်ပွဲအခြေအနေများ ငြိမ်သက်နေသော်လည်း စစ်ကောင်စီတို့၏ အင်အားဖြည့်တင်းမှုများက ဆက်လက်ရှိနေကြောင်း သိရသည်။