သျှမ်းပြည်တောင်ပိုင်း ရွာငံမြို့နယ် လွှစင်ကျေးရွာတွင် စစ်ကောင်စီ နှင့် ရွာငံ PDF တို့ တိုက်ခိုက်ပစ်ခတ်မှု ဖြစ်ပွားခဲ့ပြီး စစ်ကောင်စီဘက်မှ တပ်သား (၄)ဦး သေဆုံးကာ ဒေသခံလူငယ်များကို လိုက်လံဖမ်းဆီးနေကြောင်း စုံစမ်းသိရသည်။
ပြီးခဲ့သည့် ဧပြီလ ၉ ရက်နေ့ ညနေပိုင်း ၄ နာရီဝန်းကျင် ရွာငံမြို့နယ် လွှစင်ကျေးရွာအနီးတွင် ပစ်ခတ်တိုက်ခိုက်မှု ဖြစ်ပွားရာ စစ်သား ၄ ဦး ကျဆုံးခဲ့ရပြီး ပြည်သူ့ကာကွယ်ရေး ပူးပေါင်းတပ်ဖွဲ့များအနေဖြင့် အထိခိုက်မရှိ ပြန်လည်ဆုတ်နိုင်ခဲ့ကြောင်း သိရသည်။
“လွှစင်နဲ့ တောင်ပိုကွဲကျေးရွာအနီးက စစ်ကောင်စီယာဥ်တန်းကို PDF တွေက လာစောင့်ပြီး အပြန်အလှန် ပစ်ခတ် မှုဖြစ်ခဲ့တာ၊ စစ်ကောင်စီဘက်က ၄ ဦးသေတယ်၊ PDF တွေတော့ အထိအခိုက်မရှိ ပြန်ဆုတ်နိုင်ခဲ့တယ်၊ စစ်သား အလောင်းတွေက သူတို့လူပဲ ပြန်သယ်သွားတာပါ” ဟု ပူးပေါင်းတပ်ဖွဲ့ဝင်များနှင့် ဆက်စပ်သူတစ်ဦးက သျှမ်းသံတော်ဆင့်ကို ပြောသည်။
ထိုပစ်ခတ်မှုများဖြစ်ပွားပြီး ခဏအကြာတွင် ရွာငံမြို့နယ်မှ မြင်းကျဒိုး ကျေးရွာအနီးတွင်လည်း ပစ်ခတ်သံ ၁၅ ချက်ထက်မနည်း ကြားရကြောင်းလည်း ဒေသခံများက ပြောသည်။
ပစ်ခတ်မှုများဖြစ်ပွားပြီးနောက် တဲ့လုကျေးရွာသို့ စစ်ကောင်စီ ကား ၃ စီးနှင့် အင်အား ၆၀ ဝန်းကျင်ခန့် ရောက်ရှိလာပြီး လွှစင်ကျေးရွာ၊ မြင်းကျဒိုးကျေးရွာနှင့် အနီးပတ်ဝန်းကျင်မှ ကျေးရွာများသို့ အင်အားဖြန့်ကျက်ကာ ဒေသခံလူငယ်များကို ဖမ်းဆီးမှုများရှိနေကြောင်း သတင်းသိရသည်။
“ဧပြီလ ၉ ရက်နေ့မှာ ပစ်ခတ်သံနှစ်ကြိမ်ကြားလိုက်ရတယ်၊ တစ်ကြိမ်က ဒီ မြင်းကျဒိုးရွာကပေါ့နော်၊ အဲ့နောက်တော့ တဲ့လုရွာကို စစ်ကောင်စီအင်အားတော်တော်များများရောက်လာတယ်၊ ကားကို ရွာထဲမှာထားပြီးတော့ တချို့စစ်သားတွေက ခြေကျင်နဲ့ တခြားကျေးရွာဘက်ကို ထွက်သွားတယ်၊ လူငယ်တွေကို ဖမ်းတာတွေ ရှိနေတယ်” ဟု တဲ့လုကျေးရွာမှ အသက် ၂၇ နှစ် အရွယ်ရှိ လူငယ်အမျိုးသားတစ်ဦးက ပြောသည်။
ဧပြီလ ၉ နှင့် ၁၀ ရက်နေ့ အတွင်း စစ်ကောင်စီတပ်သားတို့၏ ဖမ်းဆီးမှုကို ခံရသူများတွင် နို့စို့အရွယ် ကလေးငယ် အပါအဝင် နွားဘန်းကြီးကျေးရွာမှ ၈ ဦး၊ လယ်ကိုင်းကျေးရွာမှ ၂ ဦးနှင့် လွှစင်ကျေးရွာမှ လူငယ် ၂ ဦးတို့ဖြစ်ကြောင်း သိရသည်။
လက်ရှိတွင် ရွာငံမြို့နယ်အတွင်းရှိ ကျေးရွာနှင့် နေရာတော်တော်များများတွင် စစ်ကောင်စီတပ်သားတို့မှဖြန့်ကျက် နေရာယူထားပြီး ပြည်သူများနှင့် လူငယ်လူရွယ်များကို သံသယမှုဖြင့်ဖမ်းဆီးမှုများ၊ နေအိမ်များကိုဖောက်ထွင်း ဝင်ရောက်ခြင်း၊ ချိတ်ပိတ်ခြင်းများ နေ့စဥ်ရက်ဆက်ရှိနေကြောင်းလည်း သိရသည်။
ရွာငံမြို့နယ်အတွင်းတွင် စစ်ကောင်စီတပ်သားတို့နှင့် ဒေသခံပြည်သူ့ကာကွယ်ရေး ပူးပေါင်းတပ်ဖွဲ့တို့က စစ်ရေး တင်းမာမှုများ ရှိနေသည့် အပြင် စစ်ကောင်စီတပ်သားတို့မှ ပြည်သူများအား မတရားနှိပ်စက်ဖမ်းဆီးမှုများကို ဟန့်တားရန်အတွက် တခြားတော်လှန်ရေးအင်အားစုများလည်း ထကြွတားမြစ်ပေးရန် ဒေသခံပူးပေါင်းကာကွယ် ရေးတပ်ဖွဲ့များက တောင်းဆိုကြသည်။
