သျှမ်းပြည်အရှေ့ပိုင်း တာလေမြို့နယ် မိုင်းလင်းကျေးရွာအုပ်စုအတွင်း လေပြင်း၊ မိုးကြီး ကျရောက်တိုက်ခတ်မှုကြောင့် နေအိမ်တစ်ချို့ ပျက်စီးသွားကြောင်း စုံစမ်းသိရှိရသည်။

ယမန်နေ့ (ဧပြီ ၁၀)ရက် ညနေ ၅ နာရီဝန်းကျင် မိုင်းလင်းကျေးရွာအုပ်စု နမ့်ခမ်းကျေးရွာ၊ နားဟိုင်းနွဲ့ကျေးရွာ၊ ကျတော်ကျေးရွာ တို့တွင် လေပြင်းဝင်ရောက်တိုက်ခတ်မှုကြောင့် နေအိမ်တစ်ချို့ နှင့် လယ်ယာများ ပျက်စီးသွားကြောင်း မိုင်းလင်းဒေသခံများ ပြောပြချက်အရ သိရသည်။

“ဟုတ်တယ်။ မနေ့က လေကြီးတိုက်တာ။ အိမ်တွေက ပျက်စီးသွားတာရှိတယ်။ တစ်ရွာထဲဖြစ်တာမဟုတ်ဘူး။ စုစုပေါင်း ဘယ်နှအိမ်လောက်ပျက်စီးလည်းတော့ မသိဘူး။ ၁၀ အိမ်ထက်မနည်း ပျက်စီးသွားတယ်။ ပြီးတော့ စိုက်ပျိုးထားတဲ့ အပင်တွေ၊ ဟင်းရွက်တွေလည်း အကုန်ပျက်စီးသွားတယ်” ဟု မိုင်းလင်း ဒေသခံ အမျိုးသားတစ်ဦးက ပြောသည်။

မိုင်းလင်းကျေးရွာအုပ်စုထဲတွင် ယခင်က လေပြင်းတိုက်မှုဖြစ်ပွားခဲ့ဖူးသော်လည်း ယခုကဲ့သို့‌ နေအိမ်ပျက်စီးသည်အထိ မဖြစ်ဖူးခဲ့ပေ။

“အဲဒီနေရာတွေမှာက ရွှေတူးတဲ့နေရာဖြစ်တယ်။ အခုလည်း ရွှေတူးနေသေးတယ်။ အရင်ကလည်း ဒီလိုမျိုး လေတိုက်ဖူးတယ်။ ဒါပေမဲ့ ဘာမှ မဖြစ်ဘူး။ သူတို့ ရွှေတူးတာကြောင့် သဘာဝကနေ မထိန်းသိမ်းနိုင်လို့ အခုလို လေကြီးတာလည်း ဖြစ်နိုင်တယ်” ဟု ၎င်းက ဆိုသည်။

အလားတူ လွန်ခဲ့သည့် ဧပြီ (၆)ရက်နေ့တွင်လည်း သျှမ်းပြည်မြောက်ပိုင်း သီပေါမြို့နယ် မန်ဆန်းကျေးရွာအုပ်စု မန်နားကျေးရွာတွင် ရုတ်တရက်လေပြင်းတိုက်ခတ်မှုကြောင့် ဘုန်းကြီးကျောင်း၊ ဆွမ်းစားကျောင်းဆောင်၊ ဥပုဒ်သည်ဇရပ် နှင့် လူနေအိမ်တစ်ချို့ ပျက်စီးဆုံးရှုံးခဲ့ကြောင်း သိရသည်။