သျှမ်းပြည်တောင်ပိုင်း ဆီဆိုင်မြို့နယ် နောင်ကျောကျေးရွာအုပ်စုအတွင်းတွင် မိုးသည်းထန်စွာရွာသွန်းမှုနှင့် လေပြင်းတိုက်မှုကြောင့် နေအိမ်နှင့် အဆောက်အအုံများ ပျက်စီးဆုံးရှုံးကြောင်း သတင်းသိရသည်။
ပြီးခဲ့သည့် မေလ ၁ ရက်နေ့တွင် မိုးသည်းထန်စွာ ရွာသွန်းမှုနှင့် လေပြင်းများတိုက်မှုကြောင့် နေအိမ် အဆောက်အအုံများ ၁၀ လုံးနီးပါး နှင့် စာသင်ကျောင်းဆောင်တစ်ဆောင် ထိခိုက်ပျက်စီးရကြောင်း ဒေသခံအမျိုးသား တစ်ဦးက ပြောသည်။
“နေအိမ်ပျက်စီးတာတွေတော့တော်တော်များများရှိပါတယ်၊ စာသင်ကျောင်းကတော့ ခေါင်မိုးတွေ သွပ်မိုးတွေ လန်ထွက်သွားတာ၊ အိမ်တချို့လည်း ထရံကွာတာ ခေါ်မိုးလန်တာတွေ ဖြစ်တယ်၊ စုစုပေါင်း အိမ် ၇ လုံးလို့သိရပါတယ်” ဟု နောင်ကျောဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ မိုးသည်းထန်စွာ ရွာသွန်းမှုနှင့် လေပြင်းတိုက်မှုကြောင့် ထိခိုက်ပျက်စီးမှုများသည် စုစုပေါင်းတန်ဖိုး ကျပ်သိန်းပေါင်း ၃၃ သိန်းကျော်ခန့်ရှိမည်ဟု ခန့်မှန်းကြောင်းနှင့် နေအိမ်ပျက်စီးခံရသည့် တချို့သော ပြည်သူများ နေအိမ်ပြန်လည်ပြုပြင်ရန်အတွက် အကူညီလိုအပ်ကြောင်းလည်း သိရသည်။
“အိမ်တစ်လုံးဖြစ်ဖို့ဆိုတာ မလွယ်ဘူးလေ၊ အခုလို ကုန်ဈေးနှုန်းတွေ တက်နေတဲ့အချိန်ဆို ပိုဆိုးတာပေါ့၊ ဒါကြောင့် တချို့လည်းဆွေမျိုးတွေဆီ ချေးငှားရတာတွေ ၊ တချို့လည်း အခက်အခဲရောက်နေရဆဲပဲ၊ ဟိုတစ်နေ့က ထွေအုပ်လား ပြန်/ဆက်လား မသိဘူး စာရင်းတောင်းလာတယ်၊ ကူညီဖို့ဖြစ်မလားတော့ သိဘူး” ဟု အထက်ပါ ဒေသခံက ပြောသည်။
လေပြင်းကြောင့် ထိခိုက်ဆုံးရှုံးမှု ရှိသည့် ကျေးရွာများသည် နောင်ကျောကျေးရွာအုပ်စု လွယ်ဆောင်ကျေးရွာ၊ နောင်ရင်းဒုံကျေးရွာ၊ နားသံကျေးရွာတို့မှ ဒေသခံများဖြစ်ကြကြောင်း သိရသည်။
