သျှမ်းပြည်တောင်ပိုင်း တောင်ကြီးမြို့နယ် အေးသာယာမြို့ နောင်အင်ဘောလုံးကွင်းအတွင်းသို့ စစ်ကောင်စီ ရဟတ်ယာဥ်နှစ်စီးရောက်ရှိလာကြောင်း ဒေသခံများက သျှမ်းသံတော်ဆင့်ကို ပြောသည်။
ယနေ့ ဧပြီလ ၈ ရက်နေ့ နံနက် ၈ နာရီဝန်းကျင်အချိန်မှ စတင်ကာ စစ်ကောင်စီ ရဟတ်ယာဥ်နှစ်စီးသည် အေးသာယာမြို့ နောင်အင်ဘောလုံးကွင်းအတွင်းသို့ ရှေ့ဆင့်နောက်ဆင့် ဆင်းလာကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“မနက် ၈ နာရီလောက်က စရောက်လာပါတယ်၊ မဆင်းခင်မှာတော့ နှစ်ပတ်သုံးပတ်လောက် လှည့်ကြည့်နေ သေးတယ်၊ ပြီးမှ ဆင်းလာတာ၊ အဲ့ကနေ ကားနဲ့ တောင်ကြီးမြို့ပေါ်ကို ပြန်တက်သွားကြပါတယ်“ ဟု အေးသာယာမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ရဟတ်ယာဥ်နှင့်အတူ ဒုတိယဗိုလ်ချုပ်မှူးကြီး စိုးဝင်းလည်း လိုက်ပါလာသည်ဟု ဒေသခံများ ပြောဆိုကြသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပါ။
စစ်ရဟတ်ယာဥ်သည် တောင်ကြီးမြို့ရှိ အရှေ့ပိုင်းတိုင်းစစ်ဌာနချုပ် (ရပခ) အတွက် ကိုဗစ်ကာကွယ်ဆေးများ လာရောက်ပို့ဆောင်သည်ဟုလည်း သတင်းရရှိသည်။
“အေးသာယာ နဲ့ စက်မှုဇုန်ကြားမှာ ရဟတ်ကွင်း ရှိတယ်၊ ရပခမှာလည်း ဆင်းလို့ရတယ်၊ အဲ့နေရာတွေမှာ ဘာလို့မဆင်းပဲ ဒီနေရာမှာ လာဆင်းလဲဆိုတာတော့ မသိဘူး၊ နေ့လည် ၁ နာရီလောက်တော့ ပြန်သွားတယ်” ဟု အထက်ပါ ဒေသခံအမျိုးသားက သျှမ်းသံတော်ဆင့်ကို ပြောသည်။
ယင်းရဟတ်ယာဥ်နှင့်အတူ မည်သူလိုက်ပါလာခြင်းနှင့် မည်သည့်ကိစ္စကြောင့် ရောက်လာခြင်းတို့ကို သျှမ်းသံတော်ဆင့်မှ ဆက်လက်စုံစမ်းနေဆဲဖြစ်ပါသည်။
ယခုရက်ပိုင်းအတွင်းတွင် သျှမ်းပြည်တောင်ပိုင်း ရပ်စောက်မြို့ရှိ ဗထူးတပ်သို့ စစ်တိုက်ရဟတ်ယာဉ်များ ၄ စီး ထက်မနည်း ဆင်းလာသည့် အပြင် ယနေ့ ဧပြီလ ၈ ရက်နေ့တွင်လည်း စစ်ရဟတ်ယာဥ် ၂ စီး အေးသာယာမြို့သို့ ရောက်ရှိလာခြင်း ဖြစ်သည်။
