သျှမ်းပြည်တောင်ပိုင်း ရွာငံမြို့နယ် ပဲယင်တောင်ကျေးရွာ၊ သာစည်ကျေးရွာနှင့် တခြားသော ကျေးရွာများတွင် တပ်စွဲထားသည့် စစ်ကောင်စီတပ်မှ ရွာသားများကို အတင်းအဓမ္မ ဖမ်းဆီးခေါ်ဆောင်သွားပြီး ချက်ပြုတ်ကျွေးမွေးခိုင်းကြောင်း စုံစမ်းသိရသည်။
ယမန်နေ့ ဧပြီလ ၆ ရက် နေ့ခင်းပိုင်းတွင် ရွာငံမြို့ ပဲယင်တောင်ကျေးရွာမှ သက်လတ်ပိုင်း ရွာသားများကို စစ်ကောင်စီတို့က လာရောက်ခေါ်ဆောင်သွားကြောင်း ဒေသခံရွာသားတစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီတွေက ရွာဦးဘုန်းကြီးကျောင်းထဲမှာ စခန်းချထားတာပေါ့၊ လဆန်းပိုင်း ကတည်းက ဒီဘုန်းကြီးကျောင်းကို ရောက်လာတယ်၊ အခုက လူလတ်ပိုင်း လေးငါးယောက်ကို ခေါ်ပြီးသူ့တို့ကို ချက်ပြုတ် ကျွေးမွေးဖို့ ခေါ်ထားတယ်၊ မနေ့ကလည်း နောက်ထပ်နှစ်ယောက်ထပ်လာခေါ်သွားတယ်၊ အဲ့ထဲမှာ အမျိုးသမီးနှစ်ယောက်ပါတယ်” ဟု ပဲယင်တောင်ကျေးရွာမှ အသက် ၂၅ နှစ်အရွယ် လူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သားတို့၏ ရွာသားများကို ဖမ်းဆီးရိုက်နှက်ခြင်းများနှင့် ရွာထဲ စခန်းချနေထိုင်မှုကြောင့် ရွာသား တချို့ကြောက်လန့်ကာ ထွက်ပြေးတိမ်းရှောင်နေသည့်သူများလည်း ရှိနေရာ ပဲယင်တောင်ရွာသားများကို လက်ခံပေးမှုများ မပြုလုပ်ရန် ပတ်ဝန်းကျင်များကို ခြိမ်းခြောက်ပြောဆိုထားကြောင်းလည်း သတင်းသိရသည်။
“ပဲယင်တောင်ရွာရဲ့ တောင်ဘက် ငါးမိုင်လောက်အကွာမှာ စစ်ဆေးရေးဂိတ်ရှိတယ်၊ အဲ့ဒီက စစ်သားတွေက ပဲယင်တောင် ရွာသားဆိုရင် တခါတည်း ဖမ်းပြီး စစ်ဆေးတာရှိတယ်၊ ပြီးတော့ တိမ်းရှောင်နေတဲ့ တခြား ရွားသားတွေ ပြန်လာဖို့ ပြောတယ်၊ ပဲယင်တောင်ရွာသားဆိုရင် လက်မခံဖို့လည်း ဘေးရွာတွေကို ခြိမ်းခြောက်ထားတာ ရှိတယ်” ဟု အထက်ပါ ပုဂ္ဂိုလ်က ပြောသည်။
လက်ရှိ ပဲယင်တောင်ကျေးရွာမှ ဘုန်းကြီးကျောင်းအတွင်း တပ်စွဲထားသည့် စစ်ကောင်စီတပ်ဖွဲ့တို့ကြောင့် ဒေသခံရွာသားများအနေဖြင့် စားနပ်ရိက္ခာဝယ်ယူမှုများခက်ခဲသည့်အပြင် ကျွဲ၊ နွားကဲ့သို့သော တိရိစ္ဆာန်များကိုလည်း စားကျက်သို့ မလွတ်ရဲကြောင်း သိရသည်။
ထို့အပြင် ပဲယင်တောင်ကျေးရွာမှ ထွက်ပြေးတိမ်းရှောင်နေသည့် ဒေသခံရွာသားများအနေဖြင့် တချို့သော ပြည်သူ့ပိုင်အိမ်များသည် ဖောက်ထွင်းခံရပြီး ပစ္စည်းယူဆောင်ခြင်းများခံနေရကြောင်းလည်း သိရသည်
