သျှမ်းပြည် တောင်ပိုင်း စစ်ကောင်စီက ဖမ်းဆီးထားသည့် သာမာန်အရပ်သားနှင့် ပရဟိတလူငယ်များကို စစ်ကောင်စီက ထောင်ဒဏ်နှစ်ရှည်ချမှတ်လိုက်ကြောင်း စုံစမ်းသိရှိရသည်။
ဧပြီလ (၄)ရက်တွင် ဒေသတွင်း ပရဟိတလုပ်သည့် ကိုအောင်ဆန်း၊ ကိုအောင်မြင့်ထွန်း နှင့် မယမင်းဖွေးတို့ကို ထောင်ဒဏ်နှစ်ရှည်ချမှတ်လိုက်ကြောင်း သိရသည်။
“သူတို့ကို ထောင်ဒဏ် နှစ်ရှည်ချမှတ်လိုက်တာ။ ကိုအောင်ဆန်း ကို (၁၉)နှစ်၊ ကိုအိန်ဒ ကို (၁၈)နှစ်၊ မယမင်းဖွေး ကို (၁၅)နှစ်စီ ချမှတ်လိုက်တာ။ သူတို့အားလုံးကို မတရားအသင်းဆက်သွယ်မှုနဲ့ဆိုပြီးတော့ အမိန့်ချ ထောင်ဒဏ်ချမှတ်လိုက်တာ” ဟု ၄င်းထောင်ဒဏ်ချခံရသူများနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
လက်ရှိ ထို (၃)ဦးကို စစ်ကောင်စီက တောင်လေးလုံးထောင်သို့ ပို့ဆောင်လိုက်ပြီဖြစ်ကြောင်း သိရသည်။
ကိုအောင်ဆန်းသည် တောင်ရိုး အထောက်အကူပြု အဖွဲ့ဝင်ဖြစ်ပြီး ၎င်းကို စစ်ကောင်စီက စက်တင်ဘာ ၂၄ ရက်နေ့က လာရောက်ဖမ်းဆီးသွားပြီး PDF နှင့် အဆက်အသွယ် ရှိသည် ဟု စွတ်စွဲပြီး ဖမ်းဆီးသွားသည်။
အလားတူ ကိုအောင်မြင့်ထွန်း နှင့် မယမင်းဖွေး တို့သည် စက်တင်ဘာ (၂၅)ရက် အောင်ပန်းမြို့နယ် အတွင်းတွင် ဖမ်းဆီးခံခဲ့ရပြီး ၎င်းတို့ (၂)ဦးကိုလည်း PDF တပ်ဖွဲ့ဝင်များကို ငွေကြေးထောက်ပံ့မှုကြောင့် ဖမ်းဆီးခဲ့ကြောင်း သိရသည်။
ကိုအောင်မြင့်ထွန်း သည် သဘာဝပတ်ဝန်းကျင် ထိန်းသိမ်းရေးအဖွဲ့ကို တည်ထောင်ခဲ့သူဖြစ်ပြီး PDF တပ်ဖွဲ့နှင့် အဆက်အသွယ် ပြုလုပ်မှု မရှိပေ။
“သူက သဘာဝပတ်ဝန်းကျင်ထိန်းသိမ်းတာကို အဓိကလုပ်တာ။ စစ်ကောင်စီတို့က လာဖမ်းသွားပြီးတော့ သူတို့ကို PDF ကို ထောက်ပံ့တယ်လို့ ပြောပြီး ဖမ်းသွားတာပဲ။ တကယ်တော့ သူက အဲလိုမျိုး ထောက်ပံ့တာ လုပ်နေမယ်လို့တော့ ကျနော်မထင်ဘူး။ အဲလိုမျိုးလုပ်တာမျိုး မရှိဘူး” ဟု ကိုအောင်မြင့်ထွန်း ၏ ဆွေမျိုးဖြစ်သူက ပြောသည်။
ထို့ပြင် မယမင်းဖွေး ကိုလည်း တောင်ရိုးအထောက်အကူပြုအဖွဲ့ဝင် တစ်ဦးဖြစ်ပြီး ဒေသတွင်း ပညာပိုင်းကို လိုက်လံကူညီပေးသူတစ်ဦးဖြစ်ကြောင်း သိရသည်။
အဆိုပါ (၃)ဦးလုံးကို ဖမ်းဆီးသွားပြီး (၆)လအကြာ တရားရုံးတွင် တရားရင်ဆိုင်ခဲ့ရပြီးနောက် ဧပြီလ ၄ ရက်တွင် ၄င်းတို့ကို နှစ်ရှည် ထောင်ဒဏ်ချမှတ်လိုက်သည်။
စစ်ကောင်စီ အုပ်စု အနေဖြင့် စစ်အာဏာသိမ်းပြီးနောက် အပြစ်မဲ့ ပြည်သူများနှင့် လူမှုအဖွဲ့အစည်းလုပ်ဆောင်နေသူများကို ဖမ်းဆီးချုပ်နှောင်မှုများပြုလုပ်ခြင်း၊ သတ်ဖြတ်ခြင်းတို့ကို ပြုလုပ်နေသည်။
Leave a Comments