သျှမ်းပြည်မြောက်ပိုင်း သိန္နီမြို့နယ်အတွင်းရှိ တိုင်းရင်းသားလက်နက်ကိုင်များ တပ်သားသစ် စုဆောင်းမှုကြောင့် ပြည်သူများ မြို့ထဲသို့ ထွက်ပြေးတိမ်းရှောင်နေကြရကြောင်း စုံစမ်းသိရှိရသည်။
သိန္နီမြို့နယ်အတွင်းရှိ ကျေးရွာများမှ အိမ်ထောင်စု တစ်စုတွင် အမျိုးသား (၂)ဦးအထက်ရှိလျှင် လက်နက်ကိုင်တပ်များက စစ်သားစုဆောင်းသဖြင့် တစ်ချို့ အိမ်ထောင်စုတွင် သားယောက်ျားလေးအား သင်္ကန်းဝတ်ပေးခြင်း၊ တစ်ချို့အိမ်ထောင်စုမှာ သားယောကျာ်းလေးကို ပြည်ပနိုင်ငံသို့ စေလွှတ်ခဲ့ကြောင်း သိရှိရသည်။
“ခုချိန်တော့ တပ်သားသစ်တွေ ပြင်းပြင်းထန်ထန်ကောက်နေတဲ့ချိန်ဖြစ်တယ်။ မိသားစုထဲ ယောကျာ်းလေး ၁ ဦးထဲ ရှိတဲ့သူတွေလည်း ကြောက်ရတယ်။ မြောက်ပိုင်းမဟာမိတ်တပ်ဖွဲ့တွေကောက်တယ်။ သျှမ်းရွာတွေဆို သျှမ်းတွေကောက်တယ်။ တခြားတိုင်းရင်းသားရွာတွေဆို တခြားတိုင်းရင်းသားလက်နက်ကိုင်တွေကောက်တယ်” ဟု အသက် (၄၀) ဝန်းကျင် သိန္နီဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
တပ်သားသစ်စုဆောင်းမှုကြောင့် ရွာခံများ သိန္နီမြို့တွင်းရှိ ဆွေမျိုးများအိမ်သော်လည်းကောင်း၊ တတ်နိုင်သည့် မိသားစုများလည်း မြို့ထဲ မြေကွက်လာဝယ်ပြီး နေအိမ်အသစ်များ ဆောက်လုပ်နေထိုင်သူများလည်းရှိကြောင်း သိန္နီမြို့ ဒေသခံ အမျိုးသမီးတစ်ဦးက ပြောသည်။
“ခုချိန်ထိ ကောက်နေတုန်း။ တစ်ချို့လည်း အမျိုးအိမ်တွေမှာ နေတယ်။ တစ်ချို့လည်း မြို့တွေမှာ အိမ်တွေ လာဆောက်ပြီးနေကြတယ်။ အဲ့လို အစုလိုက် ထွက်ပြေးတာတော့ မဟုတ်ဘူး။ တစ်ချို့ရွာတွေတော့ ထွက်ပြေးလို့မရဘူး။ ထွက်ပြေးရင် အိမ်တွေ သိမ်းမယ်ဆိုတာတွေ အဲ့လိုတွေ စည်းကမ်းရှိထားတယ်။ တစ်ရွာ နဲ့ တစ်ရွာတော့ မတူဘူး” ဟု ဒေသခံ အမျိုးသမီးတစ်ဦး က ပြောသည်။
သိန္နီမြို့နယ်အတွင်းရှိ ကျေးရွာများအားလုံးနီးပါး တိုင်းရင်းသားလက်နက်ကိုင်များ စစ်သားစုဆောင်းမှုများကြောင့် ရွာခံများ မြို့ပေါ်သို့ ထွက်ပြေးတိမ်းရှောင်လာသည့်အတွက် မြေ စျေးကွက်တွေလည်း အနည်းငယ် တက်နေကြောင်း သိန္နီမြို့ခံ အမျိုးသမီး တစ်ဦးက ပြောသည်။
သိန္နီမြို့နယ်သည် မြောက်ပိုင်းမဟာမိတ်တပ်များဖြစ်ကြသော သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) ၊ ကချင်လွတ်မြောက်ရေးတပ်မတော် (KIA) ၊ တအာင်း(ပလောင်) လွတ်မြောက်ရေးတပ်မတော် (TNLA) ၊ ကိုးကန့်တပ်မတော် (MNDAA) နှင့် စစ်ကောင်စီ တပ်ဖွဲ့ လှုပ်ရှားသည့် နယ်မြေဖြစ်ကြောင်း သိရသည်။
Leave a Comments