ကျောက်မဲမြို့နယ်မှ နေရပ်မပြန်နိုင်သေးသည့် စစ်ဘေးရှောင်များမှာ သက်ကြီးရွယ်အို၊ အမျိုးသမီးနှင့် ကလေးငယ် အများစုသာ ဖြစ်ပြီး နေရပ်ပြန်နိုင်ဖို့ကိုလည်း မျှော်လင့်နေကြကြောင်း စစ်ရှောင်ကူညီသူများထံမှ သိရသည်။
“ပြန်တော့မယ်လို့ ပြောတယ်၊ ဘယ်နေ့ ပြန်မလဲတော့ သေချာ မသိသေးဘူး၊ ခုချိန်ပြန်သွားလည်း ရွာမှာ အိမ်အလွတ်ပဲ ရှိတာ၊ ပြန်ရောက်ရင် စားဖို့ သောက်ဖို့တွေ လိုတယ်၊ ရွာမှာ ဘာအလုပ်မှ သိပ်မရှိတော့ဘူး၊ လက်ဖက်ခူးချိန်ကလည်း သိပ်မကျန်တော့ဘူး” ဟု ကျောက်မဲ သျှမ်းစာပေနှင့် ယဥ်ကျေးမှုအသင်း ဥက္ကဌ လုံးလျန်းဟန်က သျှမ်းသံတော်ဆင့်ကို ပြောသည်။
စစ်ရှောင်များအနေဖြင့် နေရပ်ပြန်သွားလျှင်လည်း အလုပ်လက်မဲ့ဖြစ်နေသဖြင့် စားသောက်ရန် လိုအပ်နေသေးကြောင်း၊ ထို့ပြင် ရွာထိပြန်ချိန်တွင်လည်း ကားငှားရမှာြဖစ်ကာ ဓာတ်ဆီစျေးကလည်း တက်နေသည့်အတွက် ကုန်ကျစရိတ်လည်း များနိုင်ကြောင်း လုံးလျန်းဟန် က ပြောသည်။
ထိုစစ်ရှောင်များသည် ပြီးခဲ့သည့် နှစ်ကုန်ပိုင်းကတည်းက တိုင်းရင်းသားလက်နက်ကိုင်တပ်အချင်းချင်း ထိတွေ့တိုက်ပွဲကြောင့် ထွက်ပြေးတိမ်းရှောင်ခဲ့သူများဖြစ်ပြီး ယနေ့အချိန်ထိ နေရပ်မပြန်နိုင်သေးဘဲ စစ်ရှောင်စခန်းနှင့် ဆွေမျိုးအိမ်များတွင် နေထိုင်နေကြကြောင်း သိရသည်။
သျှမ်းပြည် မြောက်ပိုင်း ကျောက်မဲမြို့နယ်တွင် ရောက်ရှိခိုလှုံနေသည့် စစ်ဘေးရှောင်ပြည်သူများ နေရပ်ပြန်နိုင်ရန်နှင့် နေရပ်ပြန်စဉ် စားသောက်နိုင်ရန်အတွက် စားနပ်ရိက္ခာများ လိုအပ်နေကြောင်း သိရသည်။
မြောက်ပိုင်းမဟာမိတ်တပ်ပေါင်းစု ထိန်းချုပ်နယ်မြေထဲ ပါဝင်သည့် ကျောက်မဲမြို့နယ်မှ စစ်ရှောင်တချို့ နေရပ်ပြန်သွားစဉ် ရွာအတွင်း ဝင်ခွင့်မရသည့် ဖြစ်ရပ်များ ကြုံခဲ့ရပြီး ထိုပြဿနာအား သျှမ်းပြည် တိုးတက်ရေးပါတီ သျှမ်းပြည် တပ်မတော် (SSPP/SSA) မှ ကူညီဖြေရှင်းပေးရန် တောင်းဆိုမှုများလည်း ရှိသည်ဟု စစ်ရှောင်ကူညီသူများထံမှ သိရသည်။
“သူတို့နေရပ် ပြန်နိုင်ဖို့အတွက် ဆိုတာက ကျနော်တို့တွေလည်း လုပ်ပေးခဲ့ပါတယ်။ နားလည်ပါတယ်။ ကျနော်တို့ ထိန်းချုပ်တဲ့ နယ်မြေထဲမှာရှိတယ် ဆိုရင်တော့ ချိတ်ဆက်မှုတွေ ရှိရမယ်။ ဆက်သွယ်ပြီး ကူညီကြတာပေါ့။ ပြည်သူတွေရဲ့ အခက်ခဲဟာ ကျနော်တို့ရဲ့ အခက်ခဲပဲ။ ကျနော်တို့ရဲ့ အခက်ခဲကလည်း ပြည်သူတွေရဲ့ အခက်ခဲပဲ။ ဒါပေမယ့် တချို့နေရာမှာက ပြင်ပ ပရောဂတွေ ရှိနေလား ဆိုတာတော့ ကျနော်လည်း မပြောတတ်ဘူး” ဟု (SSPP/SSA) မှ ဗိုလ်မှူး ဖုန်းဟန် က သျှမ်းသံတော်ဆင့်ကို ပြောသည်။
ထိုစစ်ရှောင်များသည် ကျောက်မဲမြို့နယ် သျှမ်းစာပေနှင့်ယဉ်ကျေးမှု စစ်ရှောင်စခန်း၊ ရပ်ကွက် ၈ ဓမ္မာရုံ၊ မိုင်းတင်းကျေးရွာအုပ်စုအတွင်း နှင့် မိုင်းငေါ့မြို့တို့တွင် စစ်ရှောင်ခိုလှုံနေကြတာဖြစ်ပြီး လူဦးရေ (၄၀၀)ဝန်းကျင် ရှိနေကြောင်း သိရသည်။
ထို့အပြင် မြို့ပေါ် ၊ အခြားကျေးရွာနှင့် ဆွေမျိုးအိမ်များတွင် ခိုလှုံနေကြသည့် စစ်ဘေးရှောင်များလည်း ကျန်ရှိနေသေးကြောင်း စစ်ရှောင်ကူညီသူများထံမှ သိရသည်။
