သျှမ်းပြည် အရှေ့ ပိုင်း မိုင်းလားမြို့မှ တဆင့် တရုတ်နယ်စပ်သို့ သွားရောက် ရောင်းချမည့် ငှက်ပျောသီးများ ပုတ်သိုးမှုရှိသဖြင့် စွန့်ပစ်ခဲ့ရကြောင်း စုံစမ်းသိရှိရသည်။

ကိုဗစ် – ၁၉ ကူးစက်ရောဂါကြောင့် တရုတ်နယ်စပ်ဂိတ် ပိတ်ခဲ့ကာ ကချင်ပြည်နယ်တွင် စိုက်ပျိုးသည့် ငှက်ပျောသီးများသည် သျှမ်းပြည် တောင်ပိုင်းမှ တဆင့် တရုတ်နယ်စပ် အထူးဒေသ (၄) မိုင်းလားဘက်သို့ လှည့်ရောင်းချရန် သယ်လာစဉ် လမ်းတဝက်တွင် ပုတ်သိုးမှုဖြစ်ပွားခဲ့ပြီး စွန့်ပစ်ခဲ့ရကြောင်း သိရသည်။

“ဒီငှက်ပျောသီးတွေက ကျိုင်းတုံမြို့မှာ လာခံနေတာ။ ပုတ်သိုးသွားမှာဆိုလို့ တချို့က ဈေးပေါပေါနဲ့ ရောင်းပေး နေကြရတာ။ ကားကြီးတွေအများကြီး မြို့အဝင်လမ်းဘေးမှာ ချပြီးတော့ ရောင်းနေကြတာ။ တရုတ်ဘက်က နယ်စပ်ဂိတ်တွေ မဖွင့်ပေးတော့ သူတို့ အထဲမှာသွားမရောင်းရကြဘူး။ တချို့ဆိုရင် မရောင်းရဘဲ လွှင့်ပစ်နေရတာ” ဟု ကျိုင်းတုံမြို့‌ ဒေသခံ အမျိုးသားတစ်ဦးက ပြောသည်။

ထိုငှက်ပျောသီးသယ်ဆောင်လာသည့် ကားများသည် သျှမ်းပြည် အရှေ့ပိုင်း မိုင်းယောင်းမြို့ထိသာ သွားလို့ရပြီး၊ တရုတ်နယ်စပ် အထူးဒေသ (၄) မိုင်းလားမြို့လည်း ကိုဗစ် – ၁၉ကြောင့် အဝင်ပိတ်ထားသည့်အတွက် ကားသမားများ အခက်ကြုံနေကြောင်း သိရသည်။

“ကျနော်တို့ ငှက်ပျောကားက မိုင်းယောင်းထိပဲ သွားလို့ရတာ။ မိုင်းလားထိဝင်ခွင့်မရဘူး။ မိုင်းလားဘက်ကလည်း အဝင်ပိတ်ထားတယ်။ တစ်ခြားလမ်း မိုင်းယုတွေဘက်ကလည်း ပိတ်ထားတယ်။ ကျနော်တို့ အတွက်တော့ တော်တော်လေးအရှုံးပေါ်တယ်။ မျှော်လင့်ချက်နဲ့ လာရောင်းကျတာလေ။ အခုတော့ မရောင်းရဘူး။ တချို့ လွှင့်ပစ်ရတယ်။ ရှုံးတယ်။ အရမ်းရှုံးတယ်” ဟု ကုန်သည်တစ်ဦးက ပြောသည်။

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေးအခြေနေနှင့် ကိုဗစ် ၁၉ အခြေနေတွေကြောင့် တရုတ်နိုင်ငံဘက်မှ ကုန်တင်ပို့မှုကို ရပ်တန့်ထားလိုက်ပြီး မြန်မာနိုင်ငံတွင်းရှိ စိုက်ပျိုးရေးပြည်သူများအတွက် စားဝတ်နေရေး တစ်ရက်ပြီးတစ်ရက် ပိုခက်ခဲလာခဲ့ကြောင်း သိရသည်။