သျှမ်းပြည်အရှေ့ပိုင်း ကျိုင်းတုံမြို့တွင် မြို့နယ်အုပ်ချုပ်ရေးမှူးမှ ကန့်သတ်ထားသည့် ၁၃မျဉ်းစောင်း မှတ်ပုံတင်ကိုင်ဆောင်သူတချို့သည် မြို့နယ်ထောက်ခံစာ လက်မှတ်ပါမှသာ သွားလာခွင့်ပြုမည်ဟု စုံစမ်းသိရသည်။

ဒီဇင်ဘာလ ဒုတိယပတ်မှ စတင်၍ ကျိုင်းတုံမြို့တွင် မြို့နယ်အုပ်ချုပ်ရေးမှူး ကန့်သတ်ထားသည့် ၁၃မျဉ်းစောင်း မှတ်ပုံတင်ကိုင်ဆောင်သူ ကချင်၊ ကိုးကန့်၊ ရခိုင်နှင့် တအာင်း(ပလောင်) လူမျိုးတို့သည် မြို့နယ်အုပ်ချုပ်ရေးမှူး ထောက်ခံချက် လက်မှတ်ပါမှသာ မြို့ပြင်နှင့် မြို့တွင်းရှိ စားသောက်ဆိုင်များတွင် သွားလာနိုင်မည်ဟု ကျိုင်းတုံဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သိတာတော့ မနေ့ကမှ သိရတာ အုပ်ချုပ်ရေးမှူးက သူတို့ကန့်သတ်ထားတဲ့ ၁၃/မှတ်ပုံတင် ကချင်၊ ကိုးကန့်၊ ရခိုင်နဲ့ ပလောင်လူမျိုးတွေဆိုရင် ထောက်ခံစာပါမှ မြို့ပြင်နဲ့ စားသောက်ဆိုင်တွေမှာ သွားလို့ရမယ်တဲ့။ ကိုယ့်မြို့ကိုတောင် အလည်အပတ်လုပ်လို့ မရတော့တဲ့ သဘောလားပေါ့။ ဘာရည်ရွယ်ချက်ရှိနေလဲတော့ မပြောတတ်ဘူး”ဟု ၎င်းဒေသခံ အမျိုးသမီးက ပြောသည်။

ထို့အပြင် ပြီးခဲ့သည့် အောက်တိုဘာလတွင်လည်း နိုင်ငံသားမှတ်ပုံတင် ၁၃ မျဉ်းစောင်း ကိုင်ဆောင်သည့် တအာင်း(ပလောင်)လူမျိုးနှင့် ကိုးကန့်လူမျိုးများကို ကျိုင်းတုံ-မိုင်းလား လမ်းမကြီးပေါ်ရှိ ဝမ်တာပင်းဂိတ်တွင် မိုင်းလားမြို့ဘက်သို့ လုံးဝဖြတ်သွားလာခွင့် မပြုကြောင်း သိရသည်။

ယခုလို ၁၃/မှတ်ပုံတင်ကိုင်ဆောင်သူ ကချင်၊ ကိုးကန့်၊ ရခိုင်နှင့် တအာင်း(ပလောင်) လူမျိုးများကို ကန့်သတ်ထားခြင်းသည် ၎င်းဝမ်တာပင်းဂိတ်မှ မိုင်းလားမြို့ဘက်သို့ သွားလာခွင့် မရှိစေနိုင်ရန် ဆက်စပ်မှု ရှိမည်ဟု ယူဆကြောင်း ဒေသခံ အမျိုးသား တစ်ဦးက ပြောသည်။

“အခုလို ထပ်မံကန့်သတ်တာက အရင်လက ဝမ်တာပင်းဂိတ်ကို မှတ်ပုံတင် ၁၃ မျဉ်းစောင်း ကိုင်ဆောင်တဲ့ ပလောင်လူမျိုးနဲ့ ကိုးကန့်လူမျိုးကို မိုင်းလားဘက်သို့ သွားခွင့်မရှိအောင် ဆက်စပ်မှု ရှိနိုင်တယ်လို့ မြင်မိတယ်။ အဲဘက်ကို အရမ်းခိုးဝင်တာ များတော့ တင်းကြပ်လိုက်တဲ့ ပုံစံ ဖြစ်နေတယ် ”ဟု ၎င်းအမျိုးသားက သျှမ်းသံတော်ဆင့်ကို ပြောသည်။

အခြားတဘက်တွင် သျှမ်းပြည်အရှေ့ပိုင်း တာချီလိတ်မြို့နယ်တွင် ကျင်းပပြုလုပ်မည့် မိုင်းဖုန်းဆရာတော်၏ မွေးနေ့မင်္ဂလာပွဲတော်သို့ လာရောက် ဖူးမျှော် ပူဇော်ကြမည့် မိဘပြည်သူများ ထောက်ခံစာ ယူလာကြရန်နှင့် စစ်ဆေးရေးဂိတ်ရှိ သက်ဆိုင်ရာ တာဝန်ရှိသူများက ခွင့်ပြုပေးရန် ပန်ကြားထားကြောင်း သျှမ်းပြည်အရှေ့ပိုင်း သံဃာ့နာယက ဥက္ကဋ္ဌ အရှင်ဉာဏသီရိမှ မိန့်ကြားထားသည်။

အလုပ်သင် သတင်းထောက် နန်းဆိုင်ခမ်း ရေးသားသည်။