စစ်ကော်မရှင်သည် တော်လှန်ရေးအင်အားစုများ အားကောင်းရာဒေသနှင့် တိုက်ပွဲဖြစ်ပွားရာဒေသတွင်နေထိုင်သည့် ပြည်သူများ ကို မှတ်ပုံတင်နံပါတ်အလိုက် ခရီးသွားလာခွင့် တင်းကြပ်စွာ ကန့်သတ်လာနေကြောင်း ခရီးသည်များနှင့် ယာဉ်လိုင်းလက်မှတ်အရောင်းဌာနများထံမှ သိရသည်။

အထူးသဖြင့် ၁၃မျဉ်းစောင်း များဖြစ်ကြသော သျှမ်းပြည်မြောက်ပိုင်းရှိ ကျောက်မဲ၊ လားရှိုး၊ နမ္မတူ၊ သီပေါ၊ ကုန်းကြမ်း မြို့နယ်များ၊ ၉မျဉ်းစောင်း ဖြစ်သည့် မန္တလေးတိုင်းရှိ မိုးကုတ်မြို့၊ ၅မျဉ်းစောင်း များဖြစ်ကြသော စစ်ကိုင်းတိုင်းရှိ မုံရွာ၊ ရွှေဘို၊ မြောင် မြို့နယ်များ၊ ၈မျဉ်းစောင်း ဖြစ်သည့် မကွေးတိုင်း မြို့နယ်များနှင့် ၁၁မျဉ်းစောင်း ဖြစ်သည့် ရခိုင်ပြည်ရှိ မြို့နယ်များအားလုံး ခရီးသွားလာရာတွင် ရပ်ကွက်နှင့် ရဲစခန်းထောက်ခံစာများ မဖြစ်မနေ တင်ပြရမည်ဖြစ်ကြောင်း သိရသည်။

အဆိုပါမှတ်ပုံတင်ကိုင်ဆောင်သူများအနေဖြင့် ခရီးသွားလာရာတွင် ရပ်ကွက်နှင့် ရဲစခန်းထောက်ခံစာများကို တစ်ပတ်ကြိုတင် ပြုလုပ်ရမည်ဖြစ်ပြီး ထောက်ခံစာမပါဝင်ပါက အဝေးပြေးကားလက်မှတ် ရောင်းချပေးမည် မဟုတ်ကြောင်း ယာဉ်လိုင်းလက်မှတ်အရောင်းဌာနများက အသိပေးလာခြင်း ဖြစ်သည်။

“ကျမတို့ ရွာပြန်ဖို့ ကားလက်မှတ်ဖြတ်တာတောင် မှတ်ပုံတင် အရင်တောင်းတာ။ ရခိုင်က တစ်ယောက်ဆိုလည်း နေရပ်ပြန်လို့မရဘူး။ လမ်းမှာ ရခိုင်တွေဆို အရမ်းစစ်လို့ အဖမ်းခံရမှာကြောက်တာ” ဟု ခရီးသွားလာရန် အခက်အခဲတွေ့နေသည့် ရွာငံမြို့နယ်ဒေသခံတစ်ဦးက သျှမ်းသံတော်ဆင့်ကို ပြောသည်။

ယာဉ်လိုင်းများ၏ ပြောပြချက်အရ လမ်းခရီးရှိ စစ်ကော်မရှင် စစ်ဆေးရေးဂိတ်များတွင် အဆိုပါဒေသမှ ခရီးသည်များကို ပစ်မှတ်ထား စစ်ဆေးမေးမြန်းခြင်း၊ ငွေကြေးအဆမတန် တောင်းခံခြင်းများ ပြုလုပ်လေ့ရှိပြီး ပြဿနာများ ဖြစ်ပေါ်ပါက ယာဉ်လိုင်းများပါ တာဝန်ယူဖြေရှင်းပေးရသည့်အတွက် ယခုကဲ့သို့ လက်မှတ်မရောင်းမီ ထောက်ခံစာများ ကြိုတင်စစ်ဆေးရခြင်း ဖြစ်ကြောင်း ဆိုသည်။

လက်ရှိတွင် ခရီးသွားလာခွင့် ကန့်သတ်ချက်များကြောင့် အရေးပေါ် ကျန်းမာရေးကိစ္စဖြင့် ခရီးသွားမည့်သူများ၊ စီးပွားရေးသမားများနှင့် ကျောင်းသားလူငယ်များမှာ အခက်အခဲကြုံတွေ့နေရကြောင်း သိရသည်။

“မိဘတွေ နေမကောင်းလို့ အိမ်ပြန်မယ်ဆိုရင် လမ်းမှာရစ်တာနဲ့ ကားသမားတွေမတင်ရဲတာနဲ့ဆို ပြန်လို့ရမှာမဟုတ်ဘူး။ မိဘတွေ နေမကောင်းလို့ ပြန်ချင်ရင်တောင် ဒီသတ်မှတ်ချက်နဲ့ဆိုရင် အသက်မှီမှာ မဟုတ်ဘူး” ဟု အထက်ပါဒေသခံတစ်ဦးက ထပ်လောင်းပြောသည်။

ယခုကဲ့သို့ မှတ်ပုံတင်နံပါတ်အလိုက် ကန့်သတ်ခြင်းသည် နိုင်ငံသားတစ်ဦး၏ လွတ်လပ်စွာ သွားလာခွင့်ကို ပေါ်ပေါ်ထင်ထင် ချိုးဖောက်ခြင်းဖြစ်သလို စစ်ကော်မရှင်တပ်၏ စစ်ဆေးရေးဂိတ်များတွင် ငွေညှစ်မှုများ ပိုမိုလုပ်ဆောင်နိုင်ရန် လမ်းဖွင့်ပေးလိုက်သလို ဖြစ်နေကြောင်း ဒေသခံများက ဝေဖန်နေကြသည်။

“သာမန် ပြည်သူတွေအတွက် လုံခြုံရေးနဲ့ အခြေခံလွတ်လပ်မှုကတော့ ဘယ်နေရာမှာမှ အားမခံချက်မရှိပါဘူး။ အခုလို မှတ်ပုံတင်နံပါတ်အလိုက် ကန့်သတ်လိုက်တော့ ငွေညှစ်ဖို့ ခေါင်းစဉ်ဖြစ်သွားတာပေါ့” ဟု ခရီးသွားလာရန် အခက်အခဲကြုံတွေ့ရသည့် လားရှိုးမြို့ခံတစ်ဦးကလည်း သျှမ်းသံတော်ဆင့်ကို ပြောသည်။

ခရီးသွားလိုသူများအနေဖြင့် ထောက်ခံစာများ ရယူရာတွင် အချိန်ကြန့်ကြာမှုရှိနိုင်သည့်အတွက် အနည်းဆုံး တစ်ပတ်ကြိုတင် ပြင်ဆင်ကြရန်လည်း ယာဉ်လိုင်းများက တိုက်တွန်းထားသည်။