သျှမ်းပြည် ကျိုင်းတုံခရိုင် ကျိုင်းတုံမြို့နယ် အမှတ် (၆) အခြေခံ ပညာမူလတန်းကျောင်းမှ ကလေးငယ်ကို ရိုက်နှက်သည့် ကျောင်းအုပ်ဆရာမကြီးကို တာဝန်မှ ရပ်ဆိုင်းရန် ကလေး၏ မိဘများက တောင်းဆိုနေကြောင်း သိရသည်။

.

ဖြစ်စဥ်မှာ ပြီးခဲ့သည့် သြဂုတ်လ (၁၈) ရက်တွင် ကျောင်းသား /သူများ လက်သည်း ညှပ်/မညှပ်ကို ကျောင်းအုပ်ဆရာမကြီးမှ စစ်ဆေးရာ G – 4 မှ ကျောင်းသူ တစ်ဦးသည် လက်သည်းမညှပ်ခဲ့သည်ဟုဆိုကာ ကျောင်းအုပ်ဆရာမကြီးမှ ဦးခေါင်းကို ရိုက်လိုက်ခြင်း ဖြစ်ကြောင်း သိရသည်။

ဦးခေါင်းကို ရိုက်နှက်သည့် ကလေးငယ်၏ မိဘမှ ကျောင်းအုပ်ကြီး ထံသို့ ဖြစ်စဥ်ကို သွားရောက်မေးမြန်းရာ ခိုက်ရန်ဖြစ်ပွားသည့်အထိ ဖြစ်ရကြောင်း ရိုက်နှက်ခံရသည့် ကလေးတဦး၏ မိဘဖြစ်သူ သျှမ်းသံတော်ဆင့်ကို ပြောသည်။

“လက်သည်း မညှပ်ခဲ့လို့ ရိုက်လိုက်တယ် ဆိုတာ မဖြစ်နိုင်ပါဘူး၊ ကျမကိုယ်တိုင် ကြာသပတေးနေ့ ညနေပိုင်း ကတည်းက ညှပ်ပေးခဲ့တာလေ၊ သောကြာနေ့ ညနေကျောင်းဆင်းလာပြီး သူ့အဖေက ရေချိုးပေးနေတဲ့အချိန် ဦးခေါင်းကို မထိနဲ့ နာတယ်ပြောလို့ အကြောင်းရင်းကို အတင်းမေးတော့မှ ဆရာမကြီး ရိုက်တာလို့ ပြောပြတယ်။ အဲ့ကြောင့် ကျမတို့က ဆရာမကြီးဆီကို အကြောင်းရင်း သွားမေးတာ၊ ဆရာမကြီးက နင်တို့ကလေး ခေါင်းကွဲသွားလား ဆိုပြီး ရိုင်းရိုင်းစိုင်းစိုင်း ပြန်ပြောတယ်” ဟု ရိုက်နှက်ခံရသည့် ကျောင်းသူ၏ မိဘက သျှမ်းသံတော်ဆင့်ကို ပြောသည်။

ဦးခေါင်းရိုက်ခံရသည့် ကလေးငယ်၏ မိဘများ ကျောင်းအုပ်ဆရာမကြီးထံ ရောက်သွားစဥ်တွင် ဆရာမကြီး မှ တာဝန်ယူမှု/တာဝန်ခံမှု မရှိသည့်အပြင် ဆရာမကြီး၏ သားဖြစ်သူ နှစ်ယောက်ပါ ကျောင်းသူ၏ မိဘ များကို အော်ဟစ်ကြိမ်းမောင်းခဲ့သည့်အတွက် ကိုယ်ထိလက်ရောက် ကျူးလွန်မှုလည်း ရှိခဲ့ကြောင်း အထက်ပါ ကျောင်းသူမိဘက သျှမ်းသံတော်ဆင့်ကို ဆက်ပြောသည်။

“ကျမတို့နဲ့ အတူပါသွားတဲ့ ကျမတို့ရဲ့ မောင်လေးပေါ့နော်။ အပြန်အလှန် စကားများနေတဲ့ အချိန်သူ့သား (ကျောင်းအုပ်ဆရာမကြီး၏ သားအငယ်) နဲ့ ဝင်လုံးလိုက်တာ အဲ့တစ်ယောက်ရဲ့ ဦးခေါင်းပေါက်သွားတယ်၊ သူတို့ကလည်း တုတ်ကြီးကိုင်ပြီး သတ်၊ သေအောင်သတ် ဆိုပြီး ပြောနေကြလို့လေ။” ဟု ကျောင်းသူ၏ မိဘက သျှမ်းသံတော်ဆင့်ကို ဆက်ပြောသည်။

ယင်းကဲ့သို့ ဖြစ်စဥ် နှင့် ပတ်သက်ပြီး ကျောင်းသူကို ကျောင်းအုပ်ဆရာမကြီး ရိုက်မိခြင်း အမှန်ဖြစ်ကြောင်း အ.မ.က (၆) ကျောင်းဆရာမကြီး၏ သားအကြီးဖြစ်သူ အ.ထ.က (၃) မှ အထက်တန်းပြ ဆရာ ဦးရဲမင်းအောင်က သျှမ်းသံတော်ဆင့်ကို ပြောသည်။

“ကျနော့်အမေ အဲ့ကလေးမကို ရိုက်နှက်မိတာ မှန်ပါတယ်၊ ဒါပေမဲ့ အားသုံးပြီး ရိုက်လိုက်တာ မဟုတ်ပါဘူး၊ နည်းနည်းပုတ်လိုက်တာပါ၊ ဒါပေမဲ့ အဲ့ကလေးမက ဆရာမကြီးရိုက်တာ ဦးခေါင်းနာနေတယ်၊ ခေါင်းလည်း မူးတယ်၊ နေ့တိုင်းလိုလို အရိုက်ခံရတယ်ဆိုပြီးတော့ ရဲဆီမှာ ထွက်ဆိုထားတာ၊ ကျနော့် အမေက ကျောင်းအုပ်ဆရာမကြီး သူအဓိက သင်တာက G – 5 / အဲ့ကလေးမက G – 4 ဘယ်ကနေ ဘယ်လိုလုပ်ပြီး အဲ့ကလေးကို နေ့တိုင်းရိုက်နိုင်မှာတုန်း” ဟု ကျောင်းဆရာမကြီး၏ သားအကြီးဖြစ်သူ အ.ထ.က (၃) မှ အထက်တန်းပြ ဆရာ ဦးရဲမင်းအောင်က သျှမ်းသံတော်ဆင့်ကို ပြောသည်။

လက်ရှိတွင် ရိုက်နှက်ခံရမှုကြောင့် ဦးခေါင်းပေါက်သွားသည့် ကျောင်းအုပ်ဆရာမကြီး၏ သားအငယ် ဖြစ်သူသည် ဆေးရုံမှ ဆေးထည့်ထားကြောင်းလည်း သိရသည်။

ထို့အပြင် ကျောင်းအုပ်ကြီး ရိုက်နှက်သည့် ကလေးငယ်၏ ဦးခေါင်းကိုလည်း ဓာတ်မှန်ရိုက်ထားလျက်ရှိကြောင်း နှင့် လက်ရှိတွင် ကျောင်းသားမိဘများက တိုင်ချက် ဖွင့်ထားသည်။

“ရိုက်ခံရတာ ကျမတို့ ကလေးပဲ မဟုတ်ပါဘူး၊ ကျမတို့ နဲ့ ကျောင်းအုပ်ကြီး ပြဿနာဖြစ်တော့ တခြား ကလေး မိဘတွေလည်း လာပြောကြတယ်၊ သူတို့ ကလေးလည်း ရိုက်ခံရတယ်ပေါ့၊ အဲ့ကြောင့် အခု ကျမတို့ ကျောင်းသား/သူ မိဘ ၂၀ ကျော် စုပေါင်းလက်မှတ်နဲ့ တိုင်ချက်ဖွင့်ထားတယ်၊ ပညာရေးမှူးရုံး ကိုလည်း တိုင်ထားတယ်၊ ဒီကျောင်းအုပ်ကြီးကို ပြောင်းရင် ပြောင်း မပြောင်းရင် တာဝန်က ရပ်ပေးပါ” ဟု အထက်ပါ မိဘက သျှမ်းသံတော်ဆင့်ကို ဆက်ပြောသည်။

အမက (၆) ကျောင်းအုပ်ဆရာမကြီး၏ နာမည်သည် ဒေါ်လှလှထွေး ဖြစ်ပြီး ယခင်ချိန်တွင် ကျိုင်းတုံ အမှတ် (၄) အ.လ.ကကျောင်း၌ တာဝန်ထမ်းဆောင်ခဲ့ဖူးကြောင်း သိရသည်။

အာဏာသိမ်းမှုကြောင့် ဖြစ်ပေါ်လာသည့် နိုင်ငံရေး ရှုပ်ထွေးမှုနောက်ဆက်တွဲကြောင့် ပညာရေး ကဏ္ဍလည်း ထိခိုက်လာကြောင်း ပြည်သူများက ပြောဆို ဝေဖန်နေကြသည်။