သျှမ်းပြည်မြောက်ပိုင်း မူဆယ်ခရိုင် မုံးပေါ်တိုက်နယ်အတွင်း စစ်ကောင်စီ နှင့် ကိုးကန့်တပ်မတော် (MNDAA)တို့ ယနေ့ တိုက်ပွဲဖြစ်ပွားကြောင်း စုံစမ်းသိရှိရသည်။
ယနေ့ ဧပြီ (၄)ရက် နေ့လည် ၁၂ နာရီဝန်းကျင်မှ လက်ရှိသတင်းရေးသားချိန်ထိ နှစ်ဖက်တပ်များ တိုက်ပွဲပြင်းထန်ခဲ့ကြောင်း သိရှိရသည်။
“မနေ့က ကိုးကန့်တပ်က ဆုတ်ခဲ့ရတယ်။ ဒီနေ့တော့ ကိုးကန့်ဘက်က စစ်ကောင်စီကို ပြန်လာတိုက်တယ်။ ခု ကောင်းမက်ခီနုတ် မှာပဲ တိုက်ပွဲပြင်းထန်နေတယ်” ဟု မုံးပေါ်ဒေသခံ အမျိုးသား တစ်ဦးက ပြောသည်။
ယမန်နေ့ ဧပြီ (၃)ရက်က မုံးပေါ်တိုက်နယ် နောင်ခမ်းကျေးရွာအနီး နေ့လည် (၂)နာရီမှ ညနေ (၅)နာရီခွဲထိ တိုက်ပွဲဖြစ်ပွားခဲ့ပြီး ကိုးကန့်တပ်မတော် (MNDAA)မှ တပ်ဆုတ်ခွာခဲ့ရကြောင်း နောင်ခမ်းကျေးရွာ ဒေသခံတစ်ဦးက သျှမ်းသံတော်ဆင့် ကို ပြောသည်။
“ကောင်းမက်ခီနုတ် ဆိုတာ ကိုးကန့်တပ်တွေ စခန်းချတဲ့နေရာဖြစ်တယ်။ တိုက်ပွဲက အဲ့ဒီနီးနားမှာဖြစ်ပြီးတော့ စစ်ကောင်စီဘက်က အဲ့ဒီကုန်းကို လက်နက်ကြီးတွေနဲ့ ပစ်တယ်။ကိုးကန့်တပ်တွေတော့ ဆုတ်သွားခဲ့ပြီ” ဟု နောင်ခမ်းကျေးရွာခံ အမျိုးသား တစ်ဦးက ပြောသည်။
တိုက်ပွဲအတွင်း မန့်ပိန်းကျေးရွာ နှင့် ဝမ်ကတ်ကျေးရွာမှ ဒေသခံတချို့ ထွက်ပြေးတိမ်းရှောင်ခဲ့ရကြောင်း မုံးပေါ်ဒေသခံ အမျိုးသားတစ်ဦးက ပြောသည်။
စစ်ကောင်စီလက်အောက်ခံ တပ်မ (၉၉) တပ်ရင်း (၄၀၂) နှင့် ကိုးကန့်တပ်မတော် (MNDAA) တို့ တိုက်ပွဲဖြစ်ပွားခဲ့ပြီး ပြီးခဲ့သည့် မတ်လ နောက်ဆုံးပတ်ကလည်း KIA နှင့် စစ်ကောင်စီ တို့ တိုက်ပွဲဖြစ်ပွားခဲ့သည်။
