သျှမ်းပြည် မြောက်ပိုင်းနှင့် တောင်ပိုင်းအစပ် မိုင်းရယ် – ကျေးသီး ကြား စစ်ကောင်စီ စစ်ဆေးရေဂိတ်တွင် ခရီးသွားပြည်သူများထံ အတင်းအဓမ္မ ငွေတောင်းခံနေကြောင်း သတင်းသိရသည်။
မိုင်းရယ် – ကျေးသီး လမ်းပိုင်းတွင် စစ်ကောင်စီ စစ်ဆေးဂိတ် (၄)ခု ရှိပြီး ထိုဂိတ်များတွင် ကားသမားများသည် တစ်စီးလျှင် ငွေကျပ် ၁၀၀၀ ခန့် ပေးဆောင်နေရကြောင်း ကားသမားအသိုင်းအ၀န်းက သျှမ်းသံတော်ဆင့်ကို ပြောသည်။
“ကျနော်တို့က လားရှိုးဘက်ခရီးသွားတာ ကျေးသီးမြို့အလွန်မှာရှိတဲ့ ပထမစစ်ဆေးရေးဂိတ်မှာ ၁၀၀၀ ကျပ် ပေးရတယ်၊ အဲ့လိုစစ်ဆေးရေးဂိတ်တွေထဲ မိုင်းရယ်မြို့ နယ်စပ်နားရှိတဲ့ စစ်ဆေးရေးဂိတ်က အဆိုးဆုံးပဲ၊ ကျနော်တို့ကို သေနတ်ပြပြီး ပိုက်ဆံတောင်းတာ” ဟု ကိုယ်တိုင်ကြုံတွေ့ရသည့် ကျေးသီးမြို့နယ်မှ အသက် ၂၀ ကျော် စိုင်းယီ က သျှမ်းသံတော်ဆင့်ကို ပြောသည်။
မိုင်းရယ်မြို့နယ်အဝင် ခိုလောင်း (ဒေသအခေါ်) စစ်ဆေးရေးဂိတ်တွင် ဂိတ်စောင့် စစ်ကောင်စီတပ်သား၏ သေနတ်ပြ ခြိမ်းခြောက် ပိုက်ဆံတောင်းခြင်းကို ခံရကြောင်း စိုင်းယီက ပြောသည်။
“ပိုက်ဆံသုံးထောင်တောင်းတာကို ကျနော်က နှစ်ထောင်ပေးလို့ရမလား ပြောလိုက်လို့ သေနတ်ပြပြီး လေမရှည်နဲ့ လို့ ပြောတယ်၊ ပြီးတော့ ကားပေါ်ကအကုန်ဆင်းခိုင်းပြီးတော့ သူတို့စစ်ဆေးတာခံရတယ်၊ ပိုက်ဆံမပေးရင် မဖြတ်ရလို့ ပေးလိုက်ရတယ်၊ ကျန်တဲ့စစ်ဆေးရေးဂိတ် ၃ ခုမှာတော့ ၁၀၀၀ စီ ပေးလိုက်ရတယ်” ဟု စိုင်းယီက ဆိုသည်။
ထို မိုင်းရယ် – ကျေးသီး လမ်းပိုင်းရှိ စစ်ကောင်စီ စစ်ဆေးရေးဂိတ်စောင့် စစ်သားများသည် လုံခြုံရေးကို အလေးမထားသည့်အပြင် ပိုက်ဆံရယူခြင်းများသာ လုပ်ဆောင်နေကြောင်းလည်း မိုင်းရယ်မြို့မှ ကျေးသီးသို့ ခရီးသွားရင်း ကြုံတွေ့ရသူ လူလတ်ပိုင်းအရွယ် အမျိုးသားတစ်ဦးကလည်း သျှမ်းသံတော်ဆင့်ကို ပြောသည်။
“အရင်တုန်းက ကျနော် ဒီလမ်းကို ဖြတ်သွားဖြတ်လာလုပ်ရင် သူတို့ရဲ့ စာရွက်စာတမ်းဖိုးဆိုပြီး ၂၀၀ ကနေ ၅၀၀ အမြဲတမ်းပေးဖြစ်တယ်၊ အဲ့တုန်းက သူတို့လည်း ပေးသလောက်ပဲယူတယ်၊ အမှန်ဆို သူတို့က ဒီလမ်းရဲ့ လမ်းသွား လမ်းလာပြည်သူတွေရဲ့ လုံခြုံရေးကို တာဝန်ယူရမယ်၊ ဒါပေမဲ့ အခုက ပိုက်ဆံရဖို့ပဲ လုပ်နေတယ်” ဟု အထက်ပါ ပုဂ္ဂိုလ်က ပြောသည်။
မိုင်းရယ် – ကျေးသီး လမ်းကြောရှိ စစ်ကောင်စီစစ်ဆေးရေးဂိတ်များမှ စစ်သားများသည် စကားပြောကြမ်းတမ်းခြင်း၊ လက်နက်ပြ ခြိမ်းခြောက်ခြင်းတို့ ပြုမူနေသည့်အတွက် အဆိုပါ လမ်းကြောင်းကို အမျိုးသမီးချည်း သွားရန် မသင့်ကြောင့်လည်း အထက်ပါ ပုဂ္ဂိုလ်များက မှတ်ချက်ပြု ပြောဆိုကြသည်။
စစ်အာဏာသိမ်းပြီးနောက် သျှမ်းပြည်အတွင်းရှိ စစ်ကောင်စီ စစ်ဆေးရေးဂိတ်များတွင် ခရီးသည်များကို အတင်းအဓမ္မ ငွေကြေး ကောက်ယူမှုပြုလာကြောင်း သိရသည်။
