သျှမ်းပြည် မြောက်ပိုင်း လားရှိုးမြို့နယ် လားရှိုး – တန့်ယန်းလမ်းခွဲတွင် နေထိုင်သူ အချင်းချင်း စကားများရာမှ အမျိုးသား၏ လည်ပင်း ဓားထိုးခံရကြောင်း သတင်းသိရသည်။
ယမန်နေ့ (မတ် ၃၀) ည ၉ နာရီ ဝန်းကျင်တွင် လားရှိုး – တန့်ယန်း လမ်းခွဲအနီး၌ နေထိုင်သည့် အမျိုးသား တစ်ဦးနှင့် အမျိုးသမီး တစ်ဦးတို့ စကားများရန်ဖြစ်ရာမှ အမျိုးသားဖြစ်သူက လည်ပင်းတွင် ဓားထိုးခံရကာ လားရှိုးဆေးရုံသို့ ပို့ဆောင်ကုသနေရကြောင်း နောင်မွန်လူငယ် ပရဟိတအသင်းထံမှ သိရသည်။
“သူတို့က အဲ့ဒီလမ်းခွဲ (လားရှိုး – တန့်ယန်းလမ်းခွဲ) နားမှာ နေတာ၊ သံတိုသံစတွေ ကောက်တဲ့သူလို့ပြောတယ်၊ ရန်ဖြစ်ပြီး ဓားနဲ့ ထိုးလိုက်တာတဲ့၊ အဲ့ဒီအမျိုးသားရဲ့ လည်ပင်း(လည်စလုပ်)နား ထိုးမိသွားတာ၊ ဒဏ်ရာက တစ်လက်မလောက်တောင်ရှိတယ်၊ ကံကောင်းလို့ မသေတာ၊ လင်မယားတော့ မဟုတ်ဘူးလို့ ပြောတယ်၊ ကျနော်တို့ ဆေးရုံကို ပို့ထားလိုက်တယ်” ဟု နောင်မွန်လူငယ် ပရဟိတအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ထို လားရှိုး – တန့်ယန်း လမ်းခွဲသည် လားရှိုးမြို့နှင့် ၈ မိုင်ဝန်းကျင်ခန့် ကွာဝေးပြီး အသွားအလာပြတ်သည့် နေရာဖြစ်ကြောင်း သိရသည်။
အဆိုပါနေရာသည် ဆိုင်ကယ်လုယက်မှုလည်း မကြာခဏဖြစ်လေ့ရှိပြီး ပြည်သူများ သွားလာရေးအတွက် စိုးရိမ်ရသည့်နေရာဖြစ်ကြောင်း နောင်မွန်ကျေးရွာ ဒေသခံ အမျိုးသားတစ်ဦးက ဆိုသည်။
“အဲ့နားက လူပြတ်တယ်၊ ဆိုင်ကယ် လုခံရတာတွေလည်း ခဏခဏ ကြားနေရတာ၊ ပြီးခဲ့တဲ့ လကလည်း လုခံရသေးတယ်၊ ဆိုင်ကယ်နဲ့ တစ်ယောက်ထဲ၊ နှစ်ယောက်ထဲ ဆိုရင် သိပ်မသွားရဲတော့ဘူး၊ သူတို့က အုပ်စုလိုက် လုတာ၊ တာဝန်ရှိသူတွေ ဖမ်းတာတွေလည်း မကြားမိတော့ ပိုစိုးရိမ်ရတယ်” ဟု အဆိုပါ ဒေသခံ အမျိုးသားက ပြောသည်။
စစ်ကောင်စီ အာဏာသိမ်းပြီးနောက်ပိုင်း သျှမ်းပြည်တွင်း မြို့နယ် အများစုတွင် လုယက်မှု၊ ခိုးယူမှုများ မကြာခဏ ဖြစ်ပွားနေပြီး ပြည်သူများ စိုးရိမ်ထိတ်လန့်မှုဖြင့် နေထိုင်နေရကြောင်း သိရသည်။
Leave a Comments