သျှမ်းပြည်တောင်ပိုင်း ရွာငံမြို့နယ် အလယ်ချောင်ကျေးရွာသို့ အလည်ရောက်နေသည့် အမျိုးသားတစ်ဦး အသတ်ခံလိုက်ရကြောင်း သတင်းသိရသည်။
ဖြစ်စဥ်မှာ ပြီးခဲ့သည့် မတ်လ ၂၉ ရက် ည ၉ နာရီဝန်းကျင်အချိန်တွင် အလယ်ချောင်ကျေးရွာ အနောက်ကုန်း ရပ်ကွက်ရှိ နေအိမ်တစ်ခုသို့ အလည်ရောက်ရှိနေသည့် စစ်တပ်သတင်းပေး ဟု နာမည်ထွက်နေသည့် အမျိုးသား တစ်ဦး အသတ်ခံရကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“သူ့နာမည်က ကိုညီထွေးလို့ ခေါ်တယ်၊ သူက ရွာမရပ်ကွက်ဘက်မှာနေတာ ဒီဘက်ကို (အနောက်ကုန်းရပ်ကွက်) သူ့မိတ်ဆွေအိမ်လာလည်ရင်းနဲ့အသတ်ခံလိုက်ရတာ၊ စစ်တပ်ကို မကြာခဏသတင်းပေးလေ့ရှိလို့ တစ်ရွာလုံးက သူ့ကိုကြောက်နေရတယ်၊ သူသွားလည်တဲ့အိမ်ကလည်း သူ့လိုပဲ စစ်တပ်နဲ့ ဆက်သွယ်မှုရှိတယ်” ဟု အလယ်ချောင်ကျေးရွာမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကိုညီထွေးသည် ဓားဖြင့် အချက်ပေါင်းများစွာ ထိုးသတ်ခံရပြီး နေရာတွင်ပင် ပွဲချင်းပြီး သေဆုံးခဲ့ကြောင်းလည်း ဒေသခံများက ပြောသည်။
ဖြစ်စဥ်များဖြစ်ပွားပြီး ခဏအကြာတွင် စစ်ကားများက ကျေးရွာအတွင်းသို့ ရောက်ရှိလာပြီး ဆေးရုံကားမှ အလောင်းကို လာရောက်သယ်ဆောင်သွားကြောင်း သတင်းသိရသည်။
“ဖြစ်စဥ်ဖြစ်သွားပြီးနောက် သိပ်မကြာဘူး စစ်သားတွေ ရောက်လာတယ်၊ အိမ်ရှင်လင်မယားကိုလည်း စစ်ကောင်စီက ဖမ်းသွားတယ်၊ အလောင်းကိုတော့ ဆေးရုံကားလာသယ်သွားတာ တွေ့ရတယ်” ဟု အထက်ပါ အမျိုးသားက ဆက်လက်ပြောပြသည်။
ကိုညီထွေးသည် အလယ်ချောင်ကျေးရွာအတွင်း PDF နှင့် ဆက်စပ်ပတ်သက်သူများရှိသည်ဟု စစ်တပ်ကို သတင်းပေးသူဖြစ်ပြီး ၎င်းကို ရွာငံမြို့ပြပြောက်ကျားတပ်ဖွဲ့(YUG) နှင့် တောင်ကြီးမြို့ ပြည်သူ့ကာကွယ်ရေးတပ်ဖွဲ့ (TPDF) ပူးပေါင်းတပ်ဖွဲ့ တပ်ခွဲ (၄)မှ သုတ်သင်ရှင်းလင်းခဲ့ကြောင်း သိရပါသည်။
စစ်တပ်သတင်းပေးဟု နာမည်ထွက်နေသူ ကိုညီထွေး အသတ်ခံရခြင်းနှင့် ပတ်သက်ပြီး ရွာငံမြို့ ပြပြောက်ကျား တပ်ဖွဲ့(YUG) နှင့် တောင်ကြီးမြို့ ပြည်သူ့ကာကွယ်ရေး တပ်ဖွဲ့ (TPDF) ပူးပေါင်းတပ်ဖွဲ့ တို့ကို ကြိုးစားဆက်သွယ်သော်လည်း အဆက်အသွယ် မရရှိခဲ့ပေ။
လက်ရှိ ရွာငံမြို့နယ်အတွင်းတွင် စစ်ကောင်စီ အင်အား ၁၀၀ ဝန်းကျင်ခန့်က ထပ်မံရောက်ရှိလာပြီး အလယ်ချောင်ကျေးရွာအပါအဝင် တချို့သော ကျေးရွာများနှင့် နေရာတော်တော်များတွင် ဖြန့်ကျက်နေရာယူထားပြီး စစ်ဆေးမှုများပြုလုပ်နေကြောင်း ဒေသခံများက ပြောသည်။
Leave a Comments