သျှမ်းပြည်တောင်ပိုင်း ရွာငံမြို့နယ် ပဲယင်တောင်ကျေးရွာမှ ထွက်ပြေးတိမ်းရှောင်နေသည့် ပြည်သူများကို အိမ်ပြန်လာရန် စစ်ကောင်စီတို့က ပြောဆိုခြိမ်းခြောက်ကြောင်း စုံစမ်းသိရသည်။
ရွာငံမြို့ရှိ ပဲယင်တောင်ကျေးရွာအတွင်းသို့ မတ် ၂၄ ရက်တွင် စစ်ကောင်စီတပ်သားများရောက်ရှိလာပြီး ထွက်ပြေးတိမ်းရှောင်နေသည့် ရွာသားများ အိမ်ပြန်လာကြရန်နှင့် တစ်ပတ်အတွင်းမရောက်ရှိပါက လူမရှိသည့် နေအိမ်များကို သိမ်းယူမည်ဟု ခြိမ်းခြောက်ပြောဆိုသွားကြောင်း ထွက်ပြေးတိမ်းရှောင်နေသည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်သားတွေက ကျနော်တို့လို တိမ်းရှောင်နေတဲ့သူတွေ ကျေးရွာထဲ ပြန်လာနေဖို့ အမိန့်လာပေးပါတယ်၊ တကယ်လို့ မလာရင် လူမရှိတဲ့ နေအိမ်တွေကို ပိတ်သိမ်းပစ်မယ်လို့ ပြောသွားတယ်တဲ့၊ ကျနော်တို့လည်း ပြန်ချင်ပါတယ်၊ ဒါပေမဲ့ အဖမ်းခံရမှာလည်း ကြောက်တယ်” ဟု အထက်ပါ အမျိုးသားတစ်ဦးက ပြောသည်။
စစ်ကောင်စီတပ်သားတို့၏ ရမ်းသမ်းပစ်ခတ်မှုနှင့် ဒလန်သတင်းပေးမှုအတိုင်း ဖမ်းဆီးမှုများ အဆက်မပြတ်ရှိနေ သည့်အတွက် ဒေသခံများလည်း ကြောက်လန့်ကာ ထွက်ပြေးတိမ်းရှောင်နေရခြင်းဖြစ်ပြီး လက်ရှိတွင် အိမ်ပြန်ချင် သော်လည်း ဖမ်းဆီးခံရမှာ ကြောက်သောကြောင့် မပြန်ရဲကြောင်း သိရသည်။
စစ်ကောင်စီတပ်သားတို့၏ ခြိမ်းခြောက်ပြောဆိုမှုများထွက်လာပြီးသည့်နောက် မတ်လ ၂၇ ရက် ည ၈ နာရီခွဲ ဝန်းကျင်အချိန်တွင် ရွာငံမြို့နယ် အင်တောကျေးရွာရှိ စစ်တပ်ပိုင် Mytel တာဝါတိုင်တစ်ခု ဖျက်ဆီးခံလိုက်ရကြောင်း သတင်းသိရသည်။
“အဲ့ညက ပေါက်ကွဲသံ ၄ ချက်ကြားလိုက်ရတယ်၊ Mytel (မိုင်တဲ)တာဝါတိုင် ဖျက်ဆီးခံရမှန်း မနေ့က နံနက်ပိုင်းမှာ သိရတာ၊ အခုချိန်ထိ ဘယ်အဖွဲ့အစည်းရဲ့ လက်ချက်မှန်းတော့ မသိရဘူး” ဟု အင်တောကျေးရွာ အနီးပတ်ဝန်းကျင်မှ ရွာသားတစ်ဦးက သျှမ်းသံတော်ဆင့်ကို ပြောသည်။
မိုင်တဲတာဝါတိုင် ဖျက်စီးခံရမှုကြောင့် လက်ရှိတွင် အင်တောကျေးရွာအတွင်းနှင့် အနီးတဝိုက်တွင် စစ်ကောင်စီတပ်သားများက လှည့်ကင်းများနှင့် ကင်းပုံးများချထားကြောင်း သိရသည်။
