သျှမ်းပြည်မြောက်ပိုင်း မုံးကိုးမြို့နယ်အတွင်း ရောက်ရှိနေသည့် စစ်ရှောင် ၈၀၀ ကျော်အတွက် စားနပ်ရိက္ခာများ အရေးပေါ်လိုအပ်နေကြောင်း သတင်းသိရသည်။
မုံးကိုးမြို့ပေါ်ရှိ စစ်ဘေးရှောင်စခန်းများတွင်ရောက်ရှိလာသည့် ကျေးရွာ ၇ ရွာမှ ဒေသခံများအတွက် ဆန် နှင့် စားနပ်ရိက္ခာများပြတ်လပ်နေပြီး ကူညီထောက်ပံ့မှုအရေးပေါ်လိုအပ်နေကြောင်း စစ်ရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“မုံးကိုးမြို့က ဘာသာရေးကျောင်းတွေ၊ ဘုန်းကြီးကျောင်းတွေမှာ ရှိနေတဲ့ စစ်ရှောင်တွေက စုစုပေါင်း ၈၀၀ ကျော်ရှိပါတယ်၊ အခု အဲ့နေရာက စစ်ရှောင်စခန်းတိုင်းလိုလို ရိက္ခာတွေက ပြတ်နေတယ်၊ တချို့ရက်တွေမှာဆို တစ်နေ့ကို ထမင်းနှစ်နပ်ပဲ စားနေကြရတယ်တဲ့” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
မုံးကိုးမြို့ပေါ်ရှိ စစ်ဘေးရှောင်များအတွက် စားနပ်ရိက္ခာများ ပို့ဆောင်ပေးရန်အတွက် ကားလမ်းတစ်လျှောက်တွင် စစ်ကောင်စီစစ်ဆေးရေးဂိတ်များက တားမြစ်စစ်ဆေးမှုများ၊ ဆဲဆိုမှုများ ရှိနေသည့်အတွက်ကြောင့် တချို့ ပရဟိတသမားနှင့် အလှူရှင်များကလည်း သွားလာရန် ကြောက်လန့်နေကြောင်း သိရသည်။
“ပြီးခဲ့တဲ့ မတ်လ ၂၆ ရက်နေ့မှာ ကျနော်တို့ ပရဟိတသမားတွေနဲ့ အလှူရှင်တွေပေါင်းပြီး မုံးကိုးကစစ်ရှောင်တွေ အတွက် ရိက္ခာအနည်းငယ်သွားပို့ပေးခဲ့ပါတယ်၊ အဲ့ဒီမှာ လမ်းမှာရှိတဲ့ စစ်ကောင်စီစစ်ဆေးရေးဂိတ်က စစ်သားတွေက ကျနော်တို့ကို ဆဲတယ်ဗျ၊ ပြီးတော့ ကားတွေကို တစ်စီးပြီးတစ်စီးစစ်တယ်၊ ပစ္စည်းတွေ မိုးကာတွေဆိုလည်း သေချာပြန်မလုပ်ပေးဘူး” ဟု ကိုယ်တွေ့ကြုံရသည့် ပရဟိတသမားတစ်ဦးက သျှမ်းသံတော်ဆင့်ကို ပြောသည်။
လက်ရှိ မုံးကိုးမြို့ပေါ်ရှိ စစ်ရှောင်စခန်းထဲသို့ ကြံစိုက်ခင်းလုပ်ကိုင်သည့် ဒေသခံများလည်း အလုပ်မဖြစ်သည့်အတွက် စားဝတ်နေရေးခက်ခဲကာ လာရောက်မှီခိုနေရသည်။
“ဒီဘက်က ဒေသခံအများစုက ကြံစိုက်ကြတာများပါတယ်၊ ဒါပေမဲ့ အခုက တရုတ်ဘက်ကလည်း ပိတ်ထားတယ်၊ ပြီးတော့ ဒေသတွင်း ရောင်းဝယ်မှုကလည်း အဲ့လောက်ထိမဟုတ်တော့ ဒီကြံတောင်သူတွေလည်း ခက်ခဲပြီး ဒီစစ်ရှောင်စခန်းမှာ လာမှီခိုတာ၊ အများစုတော့ ကချင်ရယ်၊ တအာန်း (ပလောင်) လူမျိုးဖြစ်တယ်” ဟု မုံးကိုးမြို့ပေါ်မှ ဒေသခံတစ်ဦးက သျှမ်းသံတော်ဆင့်ကို ပြောသည်။
မုံးကိုးမြို့ ဒေသအတွင်းတွင် ပြီးခဲ့သည့် ၂၀၂၁ ခုနှစ် ဩဂုတ် လကုန်ပိုင်းမှစတင်ပြီး ယနေ့ချိန်ထိ စစ်ကောင်စီ တပ်ဖွဲ့နှင့် ကိုးကန့် MNDAA တပ်ဖွဲ့တို့အကြား တိုက်ပွဲ ပြင်းထန်ခဲ့သောကြောင့် ဒေသခံ ကျေးရွာ ၇ ရွာမှ ပြည်သူ ၈၀၀ ခန့်က မုံးကိုးမြို့ပေါ်ရှိ ဘာသာရေး ဘုရားကျောင်းနှင့် ဘုန်းကြီးကျောင်းများတွင် ယနေ့အချိန်ထိ ထွက်ပြေး တိမ်းရှောင်နေရခြင်းဖြစ်သည်။
