သျှမ်းပြည်မြောက်ပိုင်း သီပေါမြို့နယ် နမ့်ယန်းအုပ်စု ကောင်းဟုန်းကျေးရွာတွင်နေထိုင်သည့် အမျိုးသားတစ်ဦး မြေမြုပ်မိုင်းနင်းမိ သေဆုံးခဲ့ပြီး ကျန်ရစ်သူ မိသားစုဝင်များ စားဝတ်နေရေးအတွက် များစွာ အခက်အခဲ ရှိနေကြောင်း သတင်းသိရသည်။
မတ်လ ၂၆ ရက် မနက် ၆ နာရီကျော်တွင် ကောင်းဟုန်းကျေးရွာမှ စိုင်းဘရွှေ နှင့် တခြားဒေသခံနှစ်ဦးတို့သည် ကောင်းဟုန်းကျေးရွာအပြင်ဘက်ရှိ တောင်ယာ သွားခုတ်ရှင်းလင်းစဥ် စိုင်းဘရွှေ က မိုင်းနင်းမိကာ သေဆုံးသွားကြောင်း သိရသည်။
“သူတို့က တောင်ယာသွားခုတ်တာပေါ့၊ တခြားရွာသားနှစ်ဦးက ယာခင်းတဲနားရှိနေချိန်မှာ စိုင်းဘရွှေက အပေါ့ သွားချင်လို့ ဆိုပြီး ယာခင်းရဲ့ ခြံစည်းရိုးနား ရောက်နေချိန် ပေါက်ကွဲသံကြားရတယ်လို့ပြောတယ်၊ အဲ့နှစ်ယောက်က သွားကြည့်တော့ စိုင်းဘရွှေက အသက်မရှိတော့ဘူး” ဟု ဖြစ်စဥ်များကို သိရသည့် ကောင်းဟုန်းကျေးရွာ သူကြီး က သျှမ်းသံတော်ဆင့်ကို ပြောသည်။
သေဆုံးသူ စိုင်းဘရွှေသည် အသက် ၄၀ နှစ်ရှိ အိမ်ထောင်ဦးစီးတစ်ယောက်ဖြစ်ပြီး လက်ရှိတွင် သူ၏ အမျိုးသမီးနှင့် သားတစ်ယောက်၊ သမီးတစ်ယောက်ကျန်ရှိနေပြီး ရှေ့ဆက် စားဝတ်နေရေးအတွက် များစွာ အခက်အခဲရှိနေကြောင်း သတင်းသိရသည်။
“သူ့မိသားစုက သူ့ကို မှီခိုနေရတာပါ၊ တစ်နေ့လုပ်မှ တစ်နေ့စားရမဲ့ မိသားစုဆိုတော့လည်း အခု သူမရှိတော့ ကျန်ရစ်သူမိသားစုတွေက တော်တော်ကိုခက်ခဲနေတယ်၊ အလှူရှင်တွေရှိလာမယ်ဆိုရင်တော့ သူတို့အတွက် အဆင်ပြေပါလိမ့်မယ်” ဟုလည်း ကောင်းဟုန်းကျေးရွာ သူကြီးက သျှမ်းသံတော်ဆင့်ကို ပြောသည်။
စိုင်းဘရွှေ၏ ရုပ်အလောင်းကို ရွာသူကြီးဦးဆောင်မှုဖြင့် ကျန်ရစ်သူမိသားစုဝင်များနှင့် ရွာသားများ စုပေါင်းပြီး မတ်လ ၂၆ ရက်နေ့ မွန်းလွဲပိုင်းမှာပင် သင်္ဂြိုလ်လိုက်ပြီဖြစ်ကြောင်း သိရသည်။
သီပေါမြို့နယ်အပါအဝင် RCSS/SSA နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားခဲ့သည့် နေရာတော်တော် များများတွင် မြေမြှုပ်မိုင်းများကို အသုံးပြုမှုရှိခဲ့ကြပြီး ပြန်ထွက်ခွာချိန်တွင် မိုင်းများကို ပြန်လည် ရုတ်သိမ်းပေးမှု မရှိသောကြောင့် ပြည်သူများက မြေစာပင်အဖြစ် မိုင်းနင်းမိ ထိခိုက်ဒဏ်ရာရ သေဆုံးမှုများ ရှိနေကြသည်။
ထိုသို့ သေဆုံးမှုများရှိနေသော်လည်း လက်နက်ကိုင်အဖွဲ့အစည်းမှ တာဝန်ယူဖြေရှင်းပေးခြင်းလည်း မရှိကြောင်း သိရသည်။
Leave a Comments