သျှမ်းပြည်တောင်ပိုင်း ပင်လုံမြို့ ရပ်ကွက် (၄) အတွင်းရှိ နေအိမ်တလုံးတွင် ယနေ့ (မတ် ၂၅)ရက် နေ့လည်ပိုင်းတွင် မီးလောင်မှု ဖြစ်ပွားခဲ့ကြောင်း စုံစမ်းသိရှိရသည်။
“လူထိခိုက်တာတွေတော့ မရှိဘူး။ အိမ်ကတော့ အကုန်ပါသွားတယ်။ တစ်အိမ်လုံးဆုံးရှုံးသွားတာ။ ဘာကြောင့် လောင်တာလဲတော့ မသိရသေးဘူး” ဟု ပင်လုံမြို့ ဒေသခံ အမျိုးသားတစ်ဦးက ပြောသည်။
အဆိုပါ အိမ်မီးလောင်မှုကြောင့် ဘေးအိမ်ပါ မီးကူးသွားကြောင်းသိရသည်။
“ ဘေးအိမ်ကလည်း မီးနည်းနည်းလောင်သွားတယ်။ မီးကို အချိန်မှီ ငြိမ်းသွားနိုင်လို့ပေါ့။ ဒါမှ မဟုတ်ရင်တော့ အကုန်ပါသွားနိုင်တယ်” ဟု အထက်ပါ မျက်မြင်တွေ့ခဲ့သည့် အမျိုးသားက ပြောသည်။
ယခု နွေဦးရာသီပိုင်းတွင် သျှမ်းပြည်အတွင်းရှိ မြို့နယ်တော်တော်များများ မကြာခဏ မီးလောင်းမှု ဖြစ်ပွားခဲ့ကြောင်း သိရသည်။
အလားတူ မတ်လ ၂၂ ရက်နေ့ သျှမ်းပြည်အရှေ့ပိုင်း မိုင်းခုတ်မြို့နယ်အတွင်းရှိ နေအိမ် ၂၄ လုံးမီးလောင်သွားခဲ့ကြောင်း သိရသည်။