သျှမ်းပြည် မြောက်ပိုင်း ကျောက်မဲမြို့နယ်ရှိ စစ်ဘေးရှောင်စခန်းများတွင် စစ်ရှောင် (၄၀၀) ခန့်ကျန်ရှိပြီး၊ ထိုထဲတွင် သက်ကြီးရွယ်အိုများ၊ အမျိုးသမီးများ နှင့် ကလေးငယ်များသာ အများစု ဖြစ်ကြောင်း စုံစမ်း သိရသည်။
ပြီးခဲ့သည့် နှစ်လယ်ပိုင်းကတည်းက ကျောက်မဲမြို့နယ်အတွင်း တိုင်းရင်းသားလက်နက်ကိုင်တပ်အချင်းချင်း တိုက်ပွဲဖြစ်ပွားမှုကြောင့် ထွက်ပြေးတိမ်းရှောင်လာကာ နေရပ်မပြန်နိုင်သေးသည့် စစ်ရှောင်ပြည်သူလည်း များစွာ ကျန်ရှိနေဆဲဖြစ်ပြီး အခြားမြို့များသို့ အလုပ်သွားလုပ်ကြသူများလည်းရှိနေကြောင်း စစ်ရှောင်ကူညီသူထံမှ သိရသည်။
“အများစုက လူကြီးပိုင်းရယ်၊ အမျိုးသမီးနဲ့ ကလေးတွေပဲကျန်တယ်။ တချို့က တခြားမြို့ကို သွားပြီး အလုပ်သွားလုပ်ကြတယ်။ ဖားကန့်ဘက်သွားတာရော၊ တရုတ်ပြည်ဘက်သွားတာရောရှိတယ်။ တချို့က မြို့ထဲမှာ သူတို့ အသိတွေဆီကနေ အလုပ်တွေ လုပ်နေကြတာ။ နေရပ်ပြန်သွားတာတော့ မဟုတ်ဘူး” ဟု ကျောက်မဲ သျှမ်းစာပေနှင့် ယဉ်ကျေးမှု အသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။
ကျောက်မဲမြို့နယ်အတွင်း နေရပ်မပြန်သေးသည့် စစ်ဘေးရှောင်များမှာ ဟူးစွန်၊ တွန်ဟိတ်၊ ခြုံးသစ်၊ ခြုံးဟောင်း၊ ဟိန်းဝိုး ကျေးရွာတို့မှ အပါအဝင် အခြားကျေးရွာများမှ စစ်ရှောင်လာသည့် ပြည်သူများလည်း နေရပ်မပြန်နိုင်သေးကြောင်း သိရသည်။
အဆိုပါ စစ်ဘေးရှောင်များ နေရပ်ပြန်ချိန်တွင် လုံခြုံစိတ်ချရမှု ရှိဖို့အတွက် နယ်မြေထိန်းချုပ်ထားသည့် လက်နက်ကိုင်အဖွဲ့နှင့် ယခုလ အစောပိုင်းက တွေ့ဆုံမှု ပြုလုပ်ခဲ့သေးကြောင်း သိရသည်။
“သူတို့နေရပ် ပြန်နိုင်ဖို့အတွက် ဆိုတာက ကျနော်တို့တွေလည်း လုပ်ပေးခဲ့ပါတယ်။ နားလည်ပါတယ်။ ကျနော်တို့ ထိန်းချုပ်တဲ့ နယ်မြေထဲမှာ ရှိတယ် ဆိုရင်တော့ ချိတ်ဆက်မှုတွေ ရှိရမယ်။ ဆက်သွယ်ပြီး ကူညီကြတာပေါ့။ ပြည်သူတွေရဲ့ အခက်ခဲဟာ ကျနော်တို့ရဲ့ အခက်ခဲပဲ။ ကျနော်တို့ရဲ့ အခက်ခဲကလည်း ပြည်သူတွေရဲ့ အခက်ခဲပဲ။ ဒါပေမယ့် တချို့နေရာမှာက ပြင်ပ ပရောဂတွေ ရှိနေလား ဆိုတာတော့ ကျနော်လည်း မပြောတတ်ဘူး” ဟု (SSPP/SSA) မှ ဗိုလ်မှူး ဖုန်းဟန် က သျှမ်းသံတော်ဆင့်ကို ပြောသည်။
ထိုစစ်ရှောင်များသည် ကျောက်မဲမြို့နယ် သျှမ်းစာပေနှင့် ယဉ်ကျေးမှု စစ်ရှောင်စခန်း၊ ရပ်ကွက် ၈ ဓမ္မာရုံ၊ မိုင်းတင်းကျေးရွာအုပ်စုအတွင်း နှင့် မိုင်းငေါ့မြို့တို့တွင် စစ်ရှောင်ခိုလှုံနေကြတာဖြစ်ပြီး လူဦးရေ (၄၀၀)ဝန်းကျင် ကျန်ရှိနေဆဲ ဖြစ်ကြောင်း သိရသည်။
Leave a Comments