သျှမ်းပြည်မြောက်ပိုင်း ကွတ်ခိုင်မြို့ တရုတ်သင်္ချိုင်းကုန်းထဲတွင် အသက် ၉ နှစ်အရွယ် ကလေးငယ်တစ်ဦး အပါအဝင် လူငယ်အလောင်း (၂)လောင်းကို တွေ့ရှိရကြောင်း သတင်းသိရသည်။
“မတ်လ ၂၁ ရက်နေ့မှာ တရုတ်သင်္ချိုင်းထဲ ကလေးအလောင်းနှစ်လောင်း တွေ့ရပါတယ်၊ နှစ်ယောက်လုံးက မိဘတွေ လူပျောက်ကြေညာထားတဲ့ သူတွေ ဖြစ်တယ်၊ တစ်ခုကျတော့ ပြန်ပေးဆွဲခံရတဲ့ ကလေးငယ်ရဲ့ အလောင်းပေါ့” ဟု ကွတ်ခိုင်မြို့မှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကွတ်ခိုင်မြို့ အမှတ် ၆ ရက်ကွက်တွင် မိဘများနှင့် အတူနေထိုင်သည့် ကလေးငယ်တစ်ဦး ပျောက်ဆုံးပြီး ၃ ရက်အကြာ အမည်မသိအဖွဲ့အစည်းတစ်ခုမှ ဖုန်းဆက်လာကာ ကလေးကို ပြန်လိုချင်ပါက ပိုက်ဆံကျပ်သိန်း ၃၀၀၀ နှင့် လာရောက်ရွေးယူရန် ခြိမ်းခြောက်တောင်းဆိုခဲ့ကြောင်း ကလေးငယ်၏ မိဘနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
“ကလေးက ပျောက်သွားတော့ မိဘတွေက တွေ့ရှိရင် အကြောင်းကြားပေးဖို့ ဖုန်းနံပါတ်နဲ့ ဝီချက်နဲ့လိုင်းပေါ်မှာ လူပျောက်တင်တယ်လေ၊ အဲ့လိုနဲ့ ၃ ရက်မြောက်တဲ့နေ့မှာ ဝီချက်ကနေ ကလေးကို ပြန်လိုချင်ရင် ပိုက်ဆံ သိန်း ၃၀၀၀ နဲ့ သူတို့ညွှန်းတဲ့ နေရာကို လာပေးပါလို့ပြောတယ်၊ ဝီချက်ကနေ ကလေးရဲ့အသံဖိုင်ကိုရလို့ မိဘတွေက ပိုက်ဆံ ၁၀၀၀ အရင်သွားပေးပေမဲ့ ကလေးကို မလွတ်ပေးဘူး” ဟု နီးစပ်သူက သျှမ်းသံတော်ဆင့်ကို ပြောသည်။
ကလေး၏ မိဘများက ပိုက်ဆံ သိန်း ၁၀၀၀ ကျပ်ကို ပြန်ပေးဆွဲသူတို့ ချိန်းဆိုထားသည့် သင်္ချိုင်းအနီးသွားရောက် ပေးစဥ်မှာလည်း ကလေးနဲ့ ဖုန်းပြောခွင့် ခဏသာရရှိပြီး နောက်ထပ် သိန်း ၅၀၀ လာပေးပါက ကလေးနဲ့ တွေ့ခွင့် ပေးမည်ဟု ပြန်ပေးဆွဲသူတို့က ပြောဆိုကြောင်းလည်း အထက်ပါ ပုဂ္ဂိုလ်က ပြောသည်။
“အဲ့ သိန်း ၅၀၀ ထပ်မပေးနိုင်ခင်မှာပဲ သူတို့ငွေသွားပေးရတဲ့နေရာမှာ လူတစ်ဦးကို မင်္ကာလို့ လိုက်ရင်းကနေ ပြန်ပေးဆွဲတဲ့အဖွဲ့ဝင်ရဲ့ မိသားစုဝင်ကိုသိပြီး ဖမ်းထားတယ်၊ အပြန်အလှန်ပြန်လူလဲမယ်ပေါ့၊ ဒါပေမဲ့ သူတို့က မလဲဘူးတဲ့ ဖုန်းဆက်ပြောလာတယ်၊ သူ့မိဘကိုထိလို့ ကလေးလည်းသေရမယ်ဆိုပြီး ဖုန်းကိုပိတ်လိုက်တယ်၊ အဲ့ဒီနောက်ပိုင်း ဘာအဆက်အသွယ်မှ မရဘဲ မတ်လ ၂၁ ရက်နေ့မှာတော့ တရုတ်သင်္ချိုင်းထဲမှာ ကလေး အလောင်းတွေ့ရတာပဲ” ဟု ၎င်းက ပြောသည်။
မတ်လ ၁၇ ရက်နေ့တွင် အမေဖြစ်သူနှင့် စကားများပြီး နေအိမ်မှ ပျောက်သွားသည့် အသက် ၁၉ နှစ်ဝန်းကျင် အမျိုးသားတစ်ဦး အလောင်းကို တရုတ်သင်္ချိုင်းတွင် တွေ့ရှိကြောင်း သတင်းကြားရာမှ သွားရောက် ကြည့်ရှုရာ ကလေးငယ်၏ အလောင်းကိုပါ တွေ့ရှိရခြင်းဖြစ်ကြောင်း သတင်းသိရသည်။
“ဂိမ်းဆော့လွန်းလို့ မအေဖြစ်သူက ဆူတော့ စကားများပြီး အိမ်ကနေ ထွက်သွားတာ ၁၇ ရက်နေ့ကတည်းကတဲ့၊ သူ့အသက်က ၁၉ နှစ်လောက်ရှိတယ်၊ သင်္ချိုင်းကုန်းထဲမှာ ကြိုးဆွဲချပြီး သေနေတဲ့အနေအထားတော့တွေ့ရတယ်၊ သူ့ဘာသာသူလုပ်တာလား တခြားအဖွဲ့ကလုပ်တာလားတော့ မသိရသေးဘူး၊ နှစ်ယောက်လုံးကို မနေ့ကပဲ မီးသဂြိုလ်လိုက်တယ်” ဟု ကွတ်ခိုင်မြို့မှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ လူငယ်နှစ်ယောက်၏ ရုပ်အလောင်းကို သက်ဆိုင်ရာ တာဝန်ရှိသူများနှင့် ပရဟိတအဖွဲ့ဝင်များ ဆွေမျိုးများက သွားရောက်သယ်ယူခဲ့ပြီး ယမန်နေ့ မတ်လ ၂၂ ရက်နေ့တွင် မီးသဂြိုလ်လိုက်ကြောင်း သတင်းသိရသည်။
စစ်ကောင်စီ အာဏာသိမ်းပြီးနောက်ပိုင်း ကွတ်ခိုင်မြို့အတွင်း လောင်းကစားဝိုင်းများ၊ မူးယစ်ဆေးဝါးများ ပေါများလာပြီး ဒေသတွင်း မလုံခြုံမှုများနှင့် တရားဥပဒေများ အကာအကွယ်များလည်း ကင်းမဲ့နေကြောင်း ဒေသခံများက ပြောဆိုနေကြသည်။
