သျှမ်းပြည်တောင်ပိုင်း ရွာငံမြို့နယ်တွင် စစ်တပ်သတင်းပေးဟု နာမည်ထွက်နေသည့် အမျိုးသားတစ်ဦး အသတ်ခံရပြီး ပစ်ခတ်မှုများ ဖြစ်ပွားသွားကြောင်း သတင်းသိရသည်။
ယမန်နေ့ (မတ်လ ၂၀ ရက်) ည ၁၀ နာရီဝန်းကျင်မှစတင်ကာ ရွာငံမြို့နယ် ပဲရင်းတောင်ကျေးရွာရှိ စစ်တပ်သတင်ပေးဟု နာမည်ထွက်နေသည့် ဦးစိုးမြင့် ၏ နေအိမ် တိုက်ခိုက်ခံရပြီးနောက် ပစ်ခတ်သံများ အဆက်မပြတ်ထွက်လာကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့က သူ့(ဦးစိုးမြင့်) ထပ်မံတိုက်ခိုက်ခံရတယ်၊ မီးရှို့တာပေါ့၊ အိမ်ကပြာကျလုနီးနီးဖြစ်သွားပါတယ်၊ စစ်သား တွေလည်း ရွာထဲရှိနေတော့ ပစ်ခတ်သံတွေထွက်လာတယ်၊ ပစ်ခတ်မှုက နာရီဝက်ကျော်ကျော်လောက်ရှိမယ်၊ ဦးစိုးမြင့်က သေသွားတယ်၊ သူ့မိသားစုဝင် တချို့ ဒဏ်ရာရတာရှိတယ်” ဟု လူငယ်တစ်ဦးက သျှမ်းသံတော်ဆင့်ကို ပြောသည်။
ဦးစိုးမြင့်သည် စစ်တပ်သတင်းပေးနေသူဟု နာမည်ထွက်နေပြီး၊ လွန်ခဲ့သည့် မတ် ၁၈ ရက်တွင်လည်း တိုက်ခိုက်ခံခဲ့ရသေးကာ ယခုအခါ ဒုတိယအကြိမ် တိုက်ခိုက်ခံရစဥ်တွင် သေဆုံးသွားကြောင်း ဒေသခံများက ပြောသည်။
ဦးစိုးမြင့် အသက်ရှင်စဥ်ကာလတွင် ဒေသအတွင်းမှ ၎င်းအမြင်မကြည်သူများနှင့် တချို့သော အပြစ်မရှိသည့် ရွာသား များအား PDF နှင့် ဆက်စပ်သည်ဟု စွပ်စွဲကာ စစ်တပ်ဖမ်းဆီးရန် သတင်းပေးလေ့ရှိကြောင်းလည်း ဒေသခံများ ပြောပြချက်အရ သိရသည်။
ယမန်နေ့ည ဖြစ်ပွားသည့် ပစ်ခတ်မှုများကြောင့် ပဲရင်းတောင်ကျေးရွာမှ ဒေသခံတချို့ တောထဲသို့ထွက်ပြေး တိမ်းရှောင်နေကြရပြီး ယနေ့ မနက်အချိန်တွင် တချို့က ရွာထဲပြန်ဝင်ကြသော်လည်း တချို့က တောထဲမှာ ကျန်ရှိ နေသေးကြောင်း ဒေသခံအမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။
“ဘာမှ အပြစ်မရှိလည်း ဖမ်းနေကြတယ်ဆိုတော့ ပဲရင်းတောင်ကျေးရွာမှမဟုတ်ဘူး ရွာငံမြို့နယ် နေရာတော်တော်များများမှာ စစ်ကောင်စီတပ်သားတွေ၊ စစ်တပ်သတင်းပေးတွေကို ကြောက်ပြီး ရွာသားတချို့က တောထဲ ရှောင်ပုန်းနေရတာမျိုးရှိတယ်၊ မနေ့ညက ပစ်ခတ်မှုဖြစ်သွားတဲ့ ပဲရင်းတောင်က ရွာသားတွေကတော့ တိုက်ပွဲတွေ ဖြစ်လာမှာကို ကြောက်လို့ တချို့က ရွာထဲပြန်မဝင်ရဲဘူး” ဟု ၎င်းလူငယ်က ပြောသည်။
လက်ရှိ ရွာငံမြို့နယ်အတွင်းတွင် စစ်ကောင်စီအင်အားအများအပြား ရောက်ရှိနေပြီး ယမန်နေ့က ဖြစ်သွားသည့် ပဲရင်းတောင်ကျေးရွာမှ ပစ်ခတ်မှုအပြီး ဒေသခံများ ထွက်ပြေးတိမ်းရှောင်နေရကြောင်း သိရသည်။
ယနေ့ နံနက် ၉ နာရီဝန်းကျင်အချိန်တွင်လည်း ရွာငံမြို့နယ်အတွင်းသို့ လက်နက်ကိုင်ဆောင်ထားသည့် စစ်ကောင်စီ တပ်သားများ အပြည့်တင်ဆောင်လာသည့် စစ်ကား ၇ စီး ဝင်ရောက်လာကြောင်းလည်း ဒေသခံများက ပြောသည်။
Leave a Comments