သျှမ်းပြည်တောင်ပိုင်း ကလောမြို့ အင်းပြင်ရွာတွင် ရှိသည့် တပ်မ (၅၅) လက်အောက်ခံ ခမရ ၁၁၂ လုံခြုံရေးကင်းတဲ (ဂိတ်) ဗုံးခွဲတိုက်ခိုက်ခံရပြီး ထိခိုက်ဒဏ်ရာရသည့် စစ်သားများလည်း ရှိနေကြောင်း သတင်းသိရသည်။
ယမန်နေ့ (မတ် ၁၆)ရက် နေ့လည် ၁ နာရီဝန်းကျင် ကလောမြို့ အင်းပြင်ရွာရှိ တပ်မ (၅၅) လက်အောက်ခံ ခမရ ၁၁၂ လုံခြုံရေးကင်းမှ ပေါက်ကွဲသံ ထွက်ပေါ်လာပြီးနောက် ယင်းနေရာမှ စစ်ကားတစ်စီး အရှိန်ပြင်းပြင်း မောင်းထွက်လာကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“နေ့လယ် ၁ နာရီလောက်က ပေါက်ကွဲသံအကျယ်ကြီးကြားလိုက်ရတယ်၊ တစ်ချက်လောက်ပဲ၊ အဲ့ဂိတ်တဲထဲမှာ စောင့်နေတဲ့ စစ်သားတွေ ထိသွားတယ်၊ တစ်ယောက်တော့ ဒဏ်ရာပြင်းလို့ စစ်ဆေးရုံကို အမြန်ပို့ပေးတာတဲ့၊ အရှိန်ပြင်းပြင်းနဲ့ မောင်းထွက်တဲ့ကားတစ်စီးကိုလည်း တွေ့မိတယ်” ဟု အထက်ပါ အမျိုးသားက ပြောသည်။
ယင်းဗုံးခွဲတိုက်ခိုက်မှုကို အောင်ပန်းမြို့ပြပြောက်ကျားတပ်စု (UTF-ABN)က လုပ်ဆောင်ခဲ့ခြင်းဖြစ်ကြောင်း (UTF-ABN)က ၎င်းတို့ page စာမျက်နှာတွင် ထုတ်ပြန်ကြေညာထားသည်။
အောင်ပန်းမြို့ပြပြောက်ကျားတပ်စု (UTF-ABN)ကို ၂၀၂၂ ခုနှစ် ဖေဖော်ဝါရီ ၁၂ ရက်က စတင်ဖွဲ့စည်းခဲ့ခြင်းဖြစ်ပြီး ပြီးခဲ့သည့် မတ် ၁၃ ရက်နေ့ကလည်း အောင်ပန်းလျှပ်စစ်မီတာရုံးကို ဗုံးပစ်တိုက်ခိုက်ခဲ့ကြောင်းလည်း သိရသည်။
Leave a Comments