သျှမ်းပြည်မြောက်ပိုင်း နောင်ချိုမြို့နယ်တွင် စစ်ကောင်စီတပ်ဖွဲ့နှင့် အမှတ် (၅၀၉) တပ်ရင်း ပြည်သူ့ကာကွယ်ရေး တပ်ဖွဲ့တို့ ၂ရက်ဆက်တိုက် တိုက်ပွဲဖြစ်ပွားပြီး စစ်ကောင်စီဘက်မှ အများအပြား သေဆုံးခဲ့ကြောင်း စုံစမ်း သိရသည်။
အဆိုပါ တိုက်ပွဲသည် စစ်ကောင်စီ တပ်ဖွဲ့ နှင့် (NUG)၏ ကာကွယ်ရေးဝန်ကြီးဌာန လက်အောက်ရှိ မြောက်ပိုင်းတိုင်း စစ်ဌာနချုပ် အမှတ် (၅၀၉)တပ်ရင်း ပြည်သူ့ကာကွယ်ရေးတပ်ဖွဲ့ တို့ ဖြစ်ပွားခဲ့သည်။
ပြီးခဲ့သည့် မတ်လ ၁၃ ရက်နေ့ နောင်ချိုမြို့နယ် ခဲမွန်ကျေးရွာအနီးတွင် ရှိသည့် Mytel (မိုင်တဲ) တာဝါတိုင်ကို အမှတ် (၅၀၉) တပ်ရင်းမှ ဖောက်ခွဲဖျက်စီးမှု ပြုလုပ်ပြီးနောက် စစ်ကောင်စီတို့က ထိုးစစ်ဆင်လာရာ ထိတွေ့တိုက်ပွဲများမှ တိုက်ပွဲပြင်းထန်သွားကြောင်း သိရသည်။
ထိုတိုက်ပွဲသည် မတ် ၁၃ ရက်နှင့် ၁၄ ရက်တွင် တိုက်ပွဲဖြစ်ပွားခဲ့ပြီး၊ စစ်ကောင်စီဘက်မှ စစ်ကြောင်းမှူး အပါအဝင် အယောက် (၅၀) ဝန်းကျင် သေဆုံးကြောင်းလည်း အမှတ် (၅၀၉)တပ်ရင်း ပြည်သူ့ကာကွယ်ရေးတပ်ဖွဲ့ ဝင် တစ်ဦးက သျှမ်းသံတော်ဆင့်ကို ပြောသည်။
“ကျနော်တို့ နောင်ချိုမြို့မှာရှိတဲ့ ဖုန်းတွေကို အသံဖမ်း ခိုးနားထောင်တဲ့တိုင်ကို ပထမဆုံး ဖောက်ခွဲခဲ့ပါတယ်။ အဲ့နောက်မှာ ကျနော်တို့ဘက်ကို လက်နက်ကြီးတွေနဲ့ ဆက်တိုက်ပစ်ပြီး တက်လာပါတယ်။ ကျနော်တို့ဘက်က မိုင်းဆွဲတာတွေရယ် အပြန်အလှန် ပစ်ခတ်တာရယ်ကြောင့် စစ်ကောင်စီဘက်က (၅၀)နီးပါး ကျဆုံးခဲ့ပါတယ်” ဟု ပြည်သူ့ကာကွယ်ရေးတပ်ဖွဲ့ ဝင် တစ်ဦးက သျှမ်းသံတော်ဆင့်ကို ပြောသည်။
ထို့အပြင် မတ် ၁၄ ရက်တွင် စစ်ကောင်စီဘက်မှ လေယာဉ် (၂)စီး လာရောက်ပြီး ဗုံးကြဲခဲ့ကြောင်း သိရသည်။
“အဲ့ မတ် ၁၃ ရက်နေ့တည်းမှာ ပစ်ခတ်သံတွေ ပေါက်ကွဲသံတွေ သုံးခါလောက်ကြားနေရတယ်၊ နေ့ခင်းပိုင်း ၂ နာရီ လောက်ကနေစပြီးတော့ လေယာဥ်ပျံအသံတွေ စကြားလာရတာ၊ စစ်ကောင်စီတွေဘက်က လေယာဥ်နဲ့ သုံးပြီး PDF တွေကို လိုက်တိုက်တယ်လို့ ယူဆပါတယ်” ဟု နောင်ချိုမြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ တိုက်ပွဲတွင် ပြည်သူ့ကာကွယ်ရေးတပ်မတော်၊ မြောက်ပိုင်းတိုင်းစစ်ဌာနချုပ်၊ အမှတ် (၅၀၉) တပ်ရင်းမှ PDF ရဲဘော်များ ထိခိုက်ကျဆုံးခြင်းမရှိကြောင်း သိရသည်။
တိုက်ပွဲအတွင်း စစ်ကောင်စီဘက်မှ အများအပြားသေဆုံးသဖြင့် ရဟတ်ယာဉ် (၂)စီး အကူအညီခေါ်ကာ ရဟတ်ယာဉ်ပေါ်မှ ဗုံးသီးအလုံး (၃၀)ခန့် ကြဲချခြင်း စက်သေနတ်များဖြင့် ပစ်ခတ်တိုက်ခိုက်ခြင်းများ ပြုလုပ်ခဲ့ကြောင်း သိရသည်။
