သျှမ်းပြည်မြောက်ပိုင်း မူဆယ်မြို့တွင် အမျိုးသမီးငယ်တစ်ဦး သတ်ဖြတ်ခံရကြောင်း စုံစမ်းသိရသည်။

အဆိုပါ သတ်ဖြတ်ခံရသည့် အမျိုးသမီးသည် အသက် (၂၄)နှစ်အရွယ်ရှိပြီး ယမန်နေ့ (မတ်လ ၁၂)ရက် မနက်ပိုင်း ၆ နာရီဝန်းကျင်တွင် ကားဝယ်လိုသည်ဟု ဖုန်းဆက်ပြောဆိုလာသူနှင့် ချိန်းဆိုမှုရှိရာသို့ ထွက်သွားပြီး သတ်ဖြတ်ခံရကြောင်း သျှမ်းသံတော်ဆင့်ကို ပြောသည်။

သတ်ခံရသည့် အမျိုးသမီးသည် အွန်လိုင်း လူမှုကွန်ရက်စာမျက်နှာပေါ် သူမ၏ အကောင့်တွင် ကားရောင်းဝယ်လုပ်နေသည့်သူတစ်ဦးဖြစ်သည်။

“ အဲ့နေ့ ည ၆ နာရီလောက်မှာ ကားဝယ်မယ်ဆိုပြီး ဖုန်းဆက်ချိန်းတဲ့နေရာသွားအုံးမယ်ဆိုပြီးတော့ သူ့မိသားစုကို ပြောပြီးထွက်သွားတာ၊ တစ်ညလုံးလည်း ပြန်မလာဘူး၊ မနက်ရောက်တော့ မူဆယ်မြို့ သုဿန်ထဲမှာ သူမရဲ့ သေဆုံးအလောင်းကို တွေ့တာပဲ ” ဟု မူဆယ်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

အဆိုပါ အမျိုးသမီး၏ ရုပ်အလောင်းကို ပြည်သူတစ်ဦးက တွေ့ရှိအကြောင်းကြားလာခြင်းဖြစ်ပြီး မိသားစုဝင်နှင့် ဆွေမျိုးများ သွားရောက်ချိန်တွင် မျက်နှာတစ်ခုလုံး တိပ်ဖြင့်ပတ်ထားပြီး ညိုမဲနေသည့် ဒဏ်ရာများကို ခန္ဓာကိုယ်အနှံ့ တွေ့ရှိရကြောင်းနှင့် အတွင်းခံ ဘောင်းဘီလည်း ချွတ်လျက် တွေ့ရှိကြောင်း သိရသည်။

မူဆယ်မြို့တွင် စစ်အာဏာသိမ်းပြီးနောက် လောင်းကစားများ၊ မူးယစ်ဆေးဝါးများ ပေါများကာ နေ့စဉ်နေ့တိုင်း လုယက်မှု၊ ဓားပြတိုက်မှုများ ရှိနေကြောင်း သိရသည်။

“ မူဆယ်ကလည်း အမျိုးသမီးတွေမကဘူး၊ အမျိုးသားတွေရာ ကလေးသူငယ်တွေရော မလုံခြုံတာမျိုး နေ့တိုင်း ကြားနေရတယ်၊ လောင်းကစားဝိုင်းတွေရော မူးယစ်ဆေးတွေရော များလာတာကြောင့် ကျမတို့မြို့ရဲ့ တည်ငြိမ်အေးချမ်းမှုတွေလည်း ပျက်ပြားကုန်တာပေါ့ ” ဟု အထက်ပါ အမျိုးသမီးက ပြောဆိုထားသည်။

လက်ရှိ မူဆယ်မြို့တွင်းအခြေအနေသည် အမျိုးသမီးများအနေဖြင့် အပြင်သို့တစ်ယောက်တည်းသွားလာခြင်း မပြုရဲသည့်အပြင် နေအိမ်တွင်းတစ်ယောက်တည်း နေထိုင်ရန်လည်း ကြောက်လန့်နေကြောင်း ဒေသခံများက သျှမ်းသံတော်ဆင့်ကို ပြောသည်။

“ဒီလိုအခြေအနေမှာ အပြင်သွားဖို့မပြောနဲ့ ကိုယ့်အိမ်ထဲမှာနေတာတောင် မလုံခြုံတော့ဘူး၊ ဘယ်နားသွားသွား စိုးရိမ်နေရတယ်၊ မိန်းမတစ်ယောက်အနေနဲ့ ကိုယ့်စိတ်ကြိုက်သွားလာလို့ မရတော့ဘူး၊ အဲ့လိုအခွင့်အရေးတွေ ဆုံးရှုံးနေရတယ်၊ တချို့ဆို မြို့ပြောင်းဖို့တောင် စဥ်းစားနေကြတယ်၊ မြို့က လုံခြုံမှုမရှိဘူးလို့ ယူဆတဲ့အတွက် ကြောင့်လေ” ဟု ၎င်းက ပြောသည်။

လက်ရှိ မူဆယ်မြို့တွင်းနေ ပြည်သူများသည် ကိုယ့်လုံခြုံရေးအတွက် ကိုယ့်ကိုယ်သာ အားကိုးနေရပြီး တရားဥပဒေနှင့် သက်ဆိုင်ရာအဖွဲ့အစည်းများမှ အကာအကွယ်ပေးမှုကင်းမဲ့နေသည်ဟု ညှီးထွားပြောဆိုမှုများ ရှိနေကြောင်းလည်း သိရသည်။

မူဆယ်မြို့သည် မြန်မာ – တရုတ်နယ်စပ် ကုန်သွယ်ရေးမြို့တစ်ခုဖြစ်ပြီး တိုင်းရင်းသားလက်နက်ကိုင်တပ်ဖွဲ့များ၊ စစ်ကောင်စီနှင့် ၎င်း၏ လက်အောက်ခံတပ်ဖွဲ့များ သွားလာလှုပ်ရှားသည့် ဒေသဖြစ်ပြီး တရားခံမပေါ်သည့် ဥပဒေမဲ့ လုပ်ရပ်များ မကြာခနဖြစ်ပေါ်သည့် ဒေသလည်း ဖြစ်သည်