သျှမ်းပြည်မြောက်ပိုင်း တန့်ယန်းမြို့တွင် ယမန်နေ့ (မတ်လ ၉)ရက် ည ၁၀ နာရီဝန်းကျင်တွင် မီးလောင်မှုဖြစ်ပွားခဲ့ပြီး အသက် (၁၈)နှစ် အရွယ် အမျိုးသမီးတစ်ဦး သေဆုံးသွားကြောင်း စုံစမ်းသိရှိရသည်။
ယမန်နေ့က တန့်ယန်းမြို့နယ် ရပ်ကွက် (၃) ဈေးဟောင်းတွင် နေအိမ် (၄)လုံး မီးလောင်သွားပြီး အမျိုးသမီးတစ်ဦး အိပ်ပျော်နေစဉ် မီးထဲပါသွားကာ သေဆုံးသွားကြောင်း တန့်ယန်းမြို့ မီးသတ်တပ်ဖွဲ့ဝင်တစ်ဦးက ပြောသည်။
“ ဟုတ်ပါတယ်။ မနေ့က မီးလောင်ပြီး အမျိုးသမီးတစ်ဦး မီးထဲပါသွားပြီး သေဆုံးသွားတယ်။ သူမက အိပ်ပျော်နေတယ်တဲ့၊ အဲ့ချိန်မှာ မီးလောင်သွားတာ။ သူ့အသက်က (၁၈)နှစ်ပဲ ရှိသေးတယ် ” ဟု မီးသတ်တပ်ဖွဲ့ဝင်က ပြောသည်။
ထိုမီးလောင်မှုသည် မည်သည့်ကိစ္စကြောင့် မီးလောင်မှု ဖြစ်ပွားခဲ့သည်ကို မသိရှိရသေးကြောင်း တန့်ယန်းမြို့ မီးသတ်တပ်ဖွဲ့က ပြောသည်။
အဆိုပါ မီးလောင်မှုသည် တန့်ယန်းမြို့တွင် ပထမဆုံးအကြိမ် မီးလောင်မှု အကြီးအကျယ် ဖြစ်ခဲ့သည့်အပြင် ယခုကာလတွင် စစ်ကောင်စီက လျှပ်စစ်မီးများကို မကြာခဏ ဖြတ်တောက်တာကြောင့် ပြည်သူများက ဖယောင်းတိုင်ကို ပိုမိုအသုံးပြုနေကြရသည်။
“ ဘာကြောင့်လောင်လဲတော့ အတိအကျ မပြောနိုင်သေးဘူး။ မနေ့က မီးလောင်မှုကတော့ အများကြီးဆုံးရှုံးရတယ်။ နေအိမ် (၄) လုံးလောက် လောင်သွားတယ်။ ၁ နာရီ အကြာ ငြိမ်းလိုက်မှ မီးသေသွားတယ်။ ဒီနေ့ မနက် သွားကြည့်တာတောင် မီးက အကုန်မသေသေးဘူး။ လျှပ်စစ်မီးလည်း ပျက်တယ်လေ။ အဲတော့ ဖယောင်းတိုင်တွေ အများစုဝယ်သုံးနေရတာဆိုတော့ အဲကြောင့်ပဲ ဖြစ်မလား မသိရဘူး” ဟု တန့်ယန်းမြို့ ဒေသခံ အမျိုးသားတစ်ဦးက ပြောသည်။
သျှမ်းပြည်အတွင်းရှိ မြို့နယ်များတွင် မီးကို ပုံမှန်မရရှိတော့တာကြောင့် ပြည်သူများက အခက်ခဲများစွာရှိနေပြီး၊ ယမန်နေ့ တန့်ယန်းမြို့ မီးလောင်မှုအပြီး ည ၁၁ နာရီဝန်းကျင်မှ လျှပ်စစ်မီး ပြန်လာကြောင်း ဒေသခံများက ပြောသည်။
အလားတူ မတ်လ ၂ ရက်နေ့က မိုင်းယော်တိုက်နယ် ပန်လော့ကျေးရွာအတွင်းရှိ နေအိမ် (၃)လုံးလည်း မီးလောင်မှု ဖြစ်ပွားခဲ့ပြီး သားအဖ (၂)ဦး သေဆုံးသွားကြောင်း သိရသည်။
