သျှမ်းပြည်မြောက်ပိုင်း သီပေါမြို့နယ် နမ့်လန်မြို့ပတ်ဝန်းကျင်အတွင်း ယခု မတ်လ ပထမ ပတ်တွင် မိုင်းနင်းမိမှုကြောင့် ထိခိုက်လူနာ (၇)ဦး ရှိကြောင်း စုံစမ်းသိရှိရသည်။
အဆိုပါ မိုင်းနင်းမိမှုကြောင့် (၇)ဦး ဒဏ်ရာပြင်းထန်စွာရရှိခဲ့ပြီး ယမန်နေ့ မတ်လ ၈ ရက်နေ့က တစ်ဦးသေဆုံးသွားကြောင်း နမ့်လန်ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ ဒီတစ်ပတ်ထဲမှာပဲ (၇)ယောက်လောက် မိုင်းနင်းမိတာ။ တစ်ယောက်သေသွားတယ်။ မနေ့ မနက်က သေသွားတာ။ ကျန်တဲ့သူတွေတော့ ဆေးရုံတွေမှာ ဆေးကုသနေကြတယ်” ဟု နမ့်လန်မြို့ ဒေသခံ အမျိုးသား တစ်ဦးက ပြောသည်။
နမ့်လန်မြို့တွင် တိုင်းရင်းသားလက်နက်ကိုင် အချင်းချင်း တိုက်ပွဲ ရပ်တန့်သွားပြီးနောက်ပိုင်း မိုင်းနင်းမိသည့် ပြည်သူများ ပိုများပြားလာကြောင်း သိရသည်။
ထို့အပြင် တိုက်ပွဲ ငြိမ်သက်သွားသော်လည်း လက်နက်ကိုင်တပ်ဖွဲ့များက မြေမြှုပ်မိုင်းများကို ပြန်လည် လာရောက်ဖြေရှင်း ရုတ်သိမ်းပေးတာမရှိသည့်အပြင် ပြည်သူအများစု သွားလာလှုပ်ရှားသည့် နေရာများတွင် မိုင်းကို ထောင်ထားလျက်ရှိကြောင်း သိရသည်။
“ မိုင်းကတော့ သူတို့တိုက်ပွဲဖြစ်ပြီးတဲ့ နောက်ပိုင်းဘဲ နင်းမိကြတာ။ ပြန်လာရုတ်သိမ်းတာလည်း မရှိဘူး။ မိုင်းထောင်ထားတဲ့ နေရာတွေကလည်း ပြည်သူတွေ သွားလာရှာဖွေစားသောက်တဲ့နေရာတွေဖြစ်တယ်။ တော်တော်လေးကို များတယ်” ဟု အသက် ၃၀ ကျော် ဒေသခံအမျိုးသားက ပြောသည်။
မြေမြှုပ်မိုင်းကြောင့် ပြည်သူများ သွားလာရာတွင် စိတ်ပူနေကြရသည့် အပြင်၊ စားဝတ်နေရေးအတွက် ရှာဖွေစားသောက်ရာတွင်လည်း ပြည်သူများ အခက်ခဲများစွာရှိလာနေကြောင်း သိရသည်။
“ ပြည်သူတွေအတွက် အပြင်သွားလာဖို့ ခက်ခဲတာပေါ့။ မိုင်းနင်းမိမှာကြောက်ကြရတယ်လေ။ စားဝတ်နေရေးအတွက်လည်း ခက်ခဲလာတယ်။ ခြံတွေ၊ လယ်တွေ သွားဖို့လည်း မသွားရဲတော့ဘူး။ မိုင်းကလည်း ပြည်သူတွေ အများသွားလာတဲ့နေရာမှာဘဲ ထောင်ထားတယ်လေ” ဟု ၎င်းက ဆိုသည်။
နမ့်လန်မြို့တွင် တိုက်ပွဲ မဖြစ်ပွားသည်မှာ ၂ လကျော်ကြာခဲ့ပြီဖြစ်ကြောင်း သိရသည်။ သို့သော် တိုက်ပွဲငြိမ်သက်သွားပြီးနောက် ယနေ့ မတ်လ ၉ ရက်နေ့အထိ မိုင်းနင်းမိလူနာ ၂၀ ကျော်နှင့် သေဆုံးသူ ၄ ဦး ရှိကြောင်း သိရသည်။
Leave a Comments