သျှမ်းပြည်မြောက်ပိုင်း သီပေါမြို့မှ KBZ ဘဏ်ကို ဓားပြတိုက်ဟုယူဆထားသည့် လူငယ်တစ်စုကို ဖမ်းဆီးရမိပြီ ဖြစ်ကြောင်း သီပေါဒေသခံများထံမှ သတင်းသိရသည်။
ပြီးခဲ့သည့် ဖေဖော်ဝါရီလ ၂၈ ရက်နေ့ မွန်းလွဲပိုင်းအချိန်တွင် ဖြစ်သွားတဲ့ သီပေါ KBZ ဘဏ် ဓားပြတိုက်မှုမှ ပါဝင်သူ လူငယ် ၆ ဦးကို ဖမ်းဆီးရမိပြီဖြစ်ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“စုစုပေါင်း လူငယ် ၆ ဦးပါ၊ ဓါးပြတိုက်မှုဖြစ်ကတည်းက ဒီနယ်ထဲရှိနေတဲ့ တိုင်းရင်းသားလက်နက်ကိုင်တွေနဲ့ တခြားဒေသက ရဲတွေကိုလည်း သတင်းအချက်အလက်တွေပို့ထားပြီး တွေ့ရှိရင် အကြောင်းကြားပေးဖို့ အကူ အညီတောင်းထားတာ ဆိုတော့ အခုတော့ အားလုံးကို ဖမ်းမိသွားပြီလို့ ကြားတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
အဆိုပါ KBZ ဘဏ်အားဓားပြတိုက်ယူသည့် လူငယ်များကို မန္တလေးမြို့တွင် ဖမ်းဆီးရမိခြင်းဖြစ်ပြီး အဆိုပါ လူငယ် ၆ ဦးအနက်မှ နောင်ချိုနေ လူငယ် ၃ ဦး၊ နမ့်ဆန်မြို့မှ ၁ ဦး၊ မန္တလေးမြို့မှ ၁ ဦးနှင့် တန့်ဆည်မြို့မှ ၁ ဦးဖြစ်ကြပြီး အမျိုးသား ၄ ဦးနှင့် အမျိုးသမီး ၂ ဦး ပါဝင်ကြောင်းလည်း သိရသည်။
“သူတို့တွေကို မနေ့က (မတ် ၆ ရက်) နေ့မှာ မန္တလေးမြို့မှာ ဖမ်းမိတယ်လို့ ကြားပါတယ်၊ တပြိုင်တည်းတော့ မဟုတ်ဘူး၊ တဆင့်ချင်းဖမ်းမိတာ၊ ကျောက်မဲကို ပို့လာပြီလို့ သတင်းကြားတယ်၊ သီပေါကို တစ်ဆင့် ပြန်ပို့ရမှာ ပေါ့၊ ဒီလူငယ်တွေအားလုံးကို သီပေါမြို့မှာပဲ တရားစွဲဆိုခြင်းတွေ လုပ်မှာပါ” ဟု အထက်ပါပုဂ္ဂိုလ်က ဆက်လက် ပြောပြထားသည်။
ဓားပြတိုက်ယူစဥ်တွင် ငွေကျပ်သိန်းပေါင်း ၁၉၀၀ ကျော် ယူဆောင်သွားသည်ဟု သတင်းများ ထွက်ပေါ်လာ သော်လည်း လက်ရှိ ပြန်လည်ဖမ်းဆီးရမိစဥ်မှာတော့ ငွေကျပ်သိန်း ၁၁၀၀ ကျော်နှင့်ဖမ်းဆီးရမိကြောင်းလည်း သိရသည်။
သီပေါမြို့တွင် ပြီးခဲသည့် ၂၀၂၁ ခုနှစ်အတွင်းမှာလည်း ရွှေဆိုင်ဓားပြတိုက်ယူမှု ဖြစ်ပွားခဲ့ပြီး တရားခံများကို တိုင်းရင်းသားလက်နက်ကိုင်တပ်ဖွဲ့၏ အကူအညီဖြင့် ဖမ်းဆီးရမိခဲ့ကြောင်း သတင်းသိရသည်။
သီပေါမြို့နယ်အတွင်းတွင် စစ်ကောင်စီတပ်ဖွဲ့အပြင် တိုင်းရင်းသားလက်နက်ကိုင်များဖြစ်ကြသည့် SSPP/SSA၊ RCSS/SSA၊ TNLA တို့လည်း သွားလာလှုပ်ရှားမှုများ ရှိနေသည်။
Leave a Comments