သျှမ်းပြည်တောင်ပိုင်း နှင့် အင်းလေး တောင်ပိုင်း တောင်ပေါ်ဒေသရှိ ကရင်နီပြည်မှ စစ်ဘေးရှောင်များသည် ယခုကာလအတွင်း ရေအခက်အခဲ စတင်ကြုံနေရကြောင်း စုံစမ်းသိရသည်။
လက်ရှိတွင် နွေဦးရာသီရောက်လာပြီဖြစ်သဖြင့် တောင်ပေါ်ဒေသနှင့် တွင်းရေကန်ရေများ၊ ရေချောင်းရေအိုင်များ ခမ်းခြောက်လာမှုကြောင့် ရေအခက်အခဲများဖြစ်ပေါ်နေပြီး စစ်ရှောင်များအနေဖြင့် သောက်သုံးရေများကို ဝယ်ယူသုံးစွဲနေရကြောင်း သတင်းသိရသည်။
“အရင်တုန်းက နန်းမယ်ခုံဘက်မှာ ရှောင်နေတုန်းက ဒီအခက်ခဲမရှိဘူး၊ အခု အဲ့နန်းမယ်ခုံကို စကစတွေ တပ်စွဲ ထားတော့ ဒီဘက်ပြောင်းရွှေ့လာရတဲ့ စစ်ရှောင်တွေ ရေအတွက် ခက်ခဲနေရတယ်” ဟု စစ်ရှောင်များကို ကူညီ စောင့်ရှောက်ပေးနေသည့် အသက် ၃၅ နှစ် ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သောက်သုံးရေ ခက်ခဲနေသည့် စစ်ရှောင်ဦးရေ ၅၀၀ ကျော်ဝန်းကျင်ရှိနေပြီး သောက်သုံးရေအတွက် အခက်အခဲများကို ဒေသတွင်း လူမှုကူညီရေးအသင်းများနှင့် ပြင်ပ အလှူရှင်များ စုပေါင်းပြီး ဖြေရှင်းထားသော်လည်း ကြာရှည်အတွက် မလွယ်ကူကြောင်း သတင်းသိရသည်။
“ကြာလာရင်တော့ မလွယ်လောက်ဘူး၊ ရေကို အမြဲတမ်း ချွေတာသုံးနေရတာလည်း မကောင်းဘူး၊ တချို့နေရာမှာ ဖုန်ကထူ ရေကရှားတော့ ရောဂါလဲထူတယ် ရေဝယ်သုံးနေရတယ် အနည်းဆုံး ချက်ပြုတ်ဖို့ နဲ့ အိမ်သာအတွက်ရှိမှ ဖြစ်မှာပါ၊ မဟုတ်ရင် ၀မ်းလျော ၀မ်းပျက် ရောဂါတွေ ထပ်တိုးလာနိုင်ပါတယ်” ဟုလည်း ဒေသခံအမျိုးသား လူငယ်တစ်ဦးက ထပ်လောင်းပြောဆိုထားသည်။
သျှမ်းပြည်အတွင်းသို့ စစ်ရှောင်ရောက်လာသော ကရင်နီစစ်ဘေးရှောင်များအနက်မှ တချို့သည် နေရပ်ပြန်ချင် သော်လည်း စစ်ကောင်စီတို့၏ အကြမ်းဖက် ထိုးစစ်ဆင်မှု၊ ကျေးရွာများ မီးရှို့ဖျက်စီးမှုတို့ကြောင့် ပြန်စရာ နေအိမ်များလည်း မရှိတော့ကြောင်း သတင်းသိရသည်။
