သျှမ်းပြည်အတွင်း ယခုနှစ် ဇန်နဝါရီလနှင့် ဖေဖော်ဝါရီအလ အတွင်း မိုင်းကြောင့် သေဆုံးခဲ့သူ ၉ ဦး နှင့် ထိခိုက်ဒဏ်ရာ ရသူ ၁၅ ဦးထက်မနည်း ရှိခဲ့ကြောင်း စုံစမ်းသိရသည်။

မိုင်းထိသေဆုံးသူများသည် ယခင်က သျှမ်းပြည်မြောက်ပိုင်းတွင်သာ ဖြစ်ပွားခဲ့သော်လည်း လက်နက်ကိုင်တပ် တိုက်ပွဲများ သျှမ်းပြည်တောင်ပိုင်းအထိ ကူးစက်လာပြီးနောက် မိုင်းထိသေဆုံး ၊ ဒဏ်ရာရခဲ့သည့် ပြည်သူများလည်း များပြားလာခဲ့သည်။

“ဒီလိုက တစ်ခါမှ မကြုံဖူးဘူး၊ အရမ်းကို လန့်သွားတယ်၊ ပေါက်ကွဲပြီးတော့ ကျမလည်း သတိမေ့သွားတာ၊ ဘယ်လောက်ကြာသွားမှန်း မသိဘူး၊ သတိပြန်ရလာတော့ မူးနေသေးတယ်၊ ဘေးမှာ ညီမလေးက သတိမရသေးဘူး၊ သူ့ကို နိုးရတယ်၊ ညီမလေးက သွေးတွေ အများကြီးပဲ” ဟု သျှမ်းတောင် ရပ်စောက်မြို့နယ် နောင်ဝိုးကျေးရွာအနီး မိုင်းပေါက်ကွဲမှုကြောင့် ထိခိုက်ဒဏ်ရာ ရရှိခဲ့သူ အသက် (၂၃)နှစ်အရွယ်ရှိ အမျိုးသမီးက သျှမ်းသံတော်ဆင့်ကို ပြောသည်။

သျှမ်းပြည် တောင်ပိုင်းနှင့် မြောက်ပိုင်းအစပ် သီပေါမြို့နယ် နမ့်လန်ဒေသနှင့် ရပ်စောက်မြို့နယ် ကျောက်ဂူတိုက်နယ်ကြား နောင်ဝိုး ကျေးရွာအနီးတွင် ဖေဖော်ဝါရီလအတွင်း မြောက်ပိုင်း မဟာမိတ်တပ်ပေါင်းစု နှင့် RCSS/SSA တပ်တို့ တိုက်ပွဲဖြစ်ပွားခဲ့ပြီးနောက်ပိုင်း မိုင်းနင်းမိကာ သေဆုံးသူ တစ်ဦးနှင့် ထိခိုက်ဒဏ်ရာရသူ ၃ ဦးထိ ရှိခဲ့ကြောင်း သိရသည်။

ထိုဒေသတွင် တိုက်ပွဲဖြစ်ပွားခြင်းနှင့် မိုင်းပေါက်ကွဲခြင်း တကြိမ်တစ်ခါမှ မရှိခဲ့ဖူးကြောင်း ဒေသခံများက ဆိုသည်။

“ပြည်သူတွေ အများစု လုပ်ကိုင်ကြတာကလည်း တောင်ယာစိုက်ပျိုးရေးအလုပ်ပဲ၊ ခုက ပြည်သူတွေ သွားလာတဲ့ တောင်ယာတွေ၊ စိုက်ခြံတွေ၊ တောတောင်အနီးမှာ မိုင်းပေါက်ကွဲတာတွေ ရှိနေတော့ လုပ်ကိုင်စားသောက်ဖို့က စိုးရိမ်နေရပြီ” ဟု ကျောက်မဲ ဒေသခံ သက်ကြီး အမျိုးသားတစ်ဦး က ပြောသည်။

ထို့ကြောင့် သက်ဆိုင်ရာ တပ်ဖွဲ့များနှင့် ကျွမ်းကျင်သူများ မိုင်းများကို အမြန်ဆုံး လာဖြုတ်ပေးစေချင်ကြောင်း၊ ဖြုတ်ရန် မလွယ်ဘူးပါက မိုင်းထောင်ထားသည့် နေရာအနီးနားတွင် အမှတ်အသား လုပ်ပေးရန် ၊ သွားလာ ကန့်သတ်မှုများ လုပ်ထားပေးသင့်ကြောင်းလည်း သျှမ်းပြည်သူများက ပြောသည်။

ကျောက်မဲမြို့နယ်တွင် ယခုနှစ်အတွင်း မိုင်းပေါက်ကွဲမှုကြောင့် သေဆုံးသူ ၃ ဦးနှင့် ဒဏ်ရာ ရသူ (၅)ဦးခန့် ရှိခဲ့ကြောင်း သိရသည်။

ပြီးခဲ့သည့် ဖေဖော်ဝါရီလအတွင်း လားရှိုးမြို့နယ် မိုင်းယော်တိုက်နယ်တွင် ရှော့တိုက် မိုင်းပေါက်ကွဲမှုကြောင့် နေရပ်ပြန် စစ်ရှောင် ၄ ဦး သေဆုံးခဲ့ပြီး ၄ ဦး ဒဏ်ရာ ရရှိခဲ့ကြောင်း သိရသည်။

အလားတူ သီပေါ၊ ကျေးသီး နှင့် မိုင်းကိုင် မြို့နယ်တို့တွင်လည်း မြေမြှုပ်မိုင်းကြောင့် ထိခိုက်ဒဏ်ရာရသူ၊ သေဆုံးသူများ ရှိခဲ့ကြောင်း သိရသည်။

ယခု အချက်လက်များသည် သျှမ်းသံတော်ဆင့်မှ လက်လှမ်းမှီသမျှ ကောက်ယူထားသည့် စာရင်းများသာ ဖြစ်သည်။

မြေမြုပ်မိုင်းအသုံးပြုမှုကို နိုင်ငံတကာမှ ပိတ်ပင်တားဆီးထားသော်လည်း မြန်မာနိုင်ငံတွင် မြေမြုပ်မိုင်း အများဆုံး အသုံးပြုသည့် နိုင်ငံ တနိုင်ငံ ဖြစ်ပြီး သျှမ်းပြည်သည် မြေမြှုပ်မိုင်းကြောင့် ထိခိုက်သေဆုံးမှု အများဆုံး (၂၇%) ထိ ရှိကြောင်း မြေမြှုပ်မိုင်းစောင့်ကြည့်လေ့လာရေးအဖွဲ့ Landmine Monitor ရဲ့ ၂၀၀၇ မှ ၂၀၂၀ ခုနှစ်အထိ မှတ်တမ်းများအရ သိရသည်။