စစ်အုပ်စု ကျင်းပမည့် ရွေးကောက်ပွဲ တတိယပိုင်းတွင် ပါဝင်နေသည့် ကျောက်မဲ၊ သီပေါ၊ မက်မန်းနှင့် ဖယ်ခုံမြို့နယ်များရှိ ရွေးကောက်ပွဲ မကျင်းပနိုင်သည့် နယ်မြေစာရင်းကို ပြည်ထောင်စုရွေးကောက်ပွဲကော်မရှင် UEC မှ ထပ်မံထုတ်ပြန်လိုက်သည်။

ယမန်နေ့ (ဒီဇင်ဘာလ ၂၇ ရက်) ညပိုင်းတွင် ရွေးကောက်ပွဲ တတိယပိုင်းထဲ ပါဝင်နေသည့် သျှမ်းပြည်မှ ကျောက်မဲ၊ သီပေါ၊ မက်မန်းနှင့် ဖယ်ခုံမြို့နယ်များရှိ ရပ်ကွက် (၁၁) ခု၊ ကျေးရွာအုပ်စု (၁၄၂) အုပ်စုကို ရွေးကောက်ပွဲ မကျင်းပနိုင်သည့် နယ်မြေများအဖြစ် စစ်ကော်မရှင်လက်အောက်ခံ UEC ဘက်မှ ထပ်မံထုတ်ပြန်ခဲ့သည်။

ပြီးခဲ့သည့် အောက်တိုဘာလတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထံမှ စစ်ကော်မရှင်တပ် ပြန်လည်တိုက်ခိုက် ထိန်းချုပ်ခဲ့သည့် ကျောက်မဲမြို့နှင့် သီပေါမြို့တွင် မြို့ပေါ်ရပ်ကွက်နှင့် အနီးအနား ကျေးရွာအုပ်စုများ၌သာ ရွေးကောက်ပွဲကျင်းပမည့် အခြေအနေဖြစ်ကြောင်း ဒေသခံများက ပြောသည်။

“ကျောက်မဲကတော့ မြို့ပေါ်နဲ့ ပိန္နဲကုန်းရယ်၊ ကျောက်မဲကြီးရယ် အဲ့လောက်ပဲ ကြားတယ်။ မြို့နားက နောက်ထပ်နှစ်ရွာ တိုးတယ်လို့တော့ ပြောပေမယ့် ဘယ်နားလဲ မသိဘူး၊ မြို့ပေါ်ကွက်ကွက်ပဲ လုပ်မှာထင်တယ်။ အဲ့လောက်နည်းလို့ဆိုပြီး ကိုယ်စားလှယ်လောင်းတစ်ဦးက စာတင်ပြီး တောင်းထားတာ ရွေး/ကော်ဘက်က အကြောင်းမပြန်ဘူးလို့တော့ ကြားတယ်” ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောဆိုသည်။

ကျောက်မဲနှင့် သီပေါမြို့နယ်တွင် ရွေးကောက်ပွဲ မကျင်းပနိုင်သည့် နယ်မြေများထဲ ကျေးရွာအုပ်စု (၁၀၀) ကျော်ဖြင့် အများဆုံးဖြစ်ပြီး TNLA ဆက်လက်ထိန်းချုပ်ထားသည့် မိုင်းငေါ့မြို့နှင့် မိုင်းလုံမြို့ပေါ်မှ ရပ်ကွက် (၁၁) ခုလည်း ပါဝင်သည်။

အဆိုပါ ကျောက်မဲနှင့် သီပေါမြို့နယ် မဲဆန္ဒနယ်များတွင် ဝင်ရောက်ယှဉ်ပြိုင်ရန် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) နှစ်ပါတီသာ ကိုယ်စားလှယ်လောင်းစာရင်း တင်သွင်းထားသည်။

သျှမ်းပြည်အတွက် အမျိုးသားလွှတ်တော် မဲဆန္ဒနယ် အမှတ်(၁) အဖြစ် သတ်မှတ်ထားသည့် ‘ဝ’ဒေသတွင် ‘ဝ’အမျိုးသားပါတီ (WNP) မှ ကိုယ်စားလှယ်လောင်းတစ်ဦးတည်း ပြိုင်ဘက်မရှိ အမည်စာရင်း တင်သွင်းထားကြောင်း ပြည်ထောင်စုရွေးကောက်ပွဲကော်မရှင် UEC မှ ကြေညာထားသည်။

အလားတူ ‘ဝ’ဒေသ ရုံးစိုက်ရာမြို့အဖြစ် စက်တင်ဘာလအတွင်း ပြောင်းလဲသတ်မှတ်ခဲ့သည့် မက်မန်းမြို့နယ် ပြည်သူ့လွှတ်တော် မဲဆန္ဒနယ်အတွက်လည်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ကိုယ်စားလှယ်လောင်း တစ်ဦးတည်း ပြိုင်ဘက်မရှိ တင်သွင်းထားပြီး ရွေးကောက်ပွဲမပြိုင်ခင် အနိုင်ရနေသည်။

စစ်ကော်မရှင် ကျင်းပပြုလုပ်နေသည့် ရွေးကောက်ပွဲကို ‘ဝ’ပြည် သွေးစည်းညီညွတ်ရေးပါတီ UWSP/UWSA မှ အားပေးထောက်ခံကြောင်း ‘ဝ’ပြင်ပဆက်ဆံရေးတာဝန်ခံ ဦးညီရမ်းမှ NCA (၁၀) နှစ်ပြည့် အခမ်းအနားတွင် မီဒီယာများကို ဖြေကြားခဲ့သော်လည်း မြေပြင်လက်တွေ့တွင် UWSA ထိန်းချုပ်ထားသည့် မြို့နယ်များတွင် ရွေးကောက်ပွဲ ကျင်းပခွင့်ပြုခြင်း မရှိပေ။

မြန်မာနိုင်ငံတဝှမ်း မြို့နယ်စုစုပေါင်း (၃၃၀) ထဲတွင် ရွေးကောက်ပွဲကျင်းပနိုင်သည့် မြို့နယ်မှာ (၂၆၅) မြို့နယ်သာ ရှိပြီး ထိုထဲတွင် ရွေးကောက်ပွဲ မကျင်းပနိုင်သည့် နယ်မြေအဖြစ် ရပ်ကွက် (၂၂၃) ခု၊ ကျေးရွာအုပ်စု (၃၇၇၂) စုတို့ ပါဝင်ပြီး၊ ရွေးကောက်ပွဲ လုံးဝ မကျင်းပနိုင်သည်မှာ (၆၅) မြို့နယ်အထိ ရှိသည်။

ထိုထဲတွင် သျှမ်းပြည် (၅၅) မြို့နယ်မှ ရွေးကောက်ပွဲ ပထမပိုင်း၌ (၁၂) မြို့နယ်၊ ဒုတိယပိုင်း၌ (၁၇) မြို့နယ်နှင့် တတိယပိုင်းတွင် (၉) မြို့နယ်တို့တွင် ရွေးကောက်ပွဲ ကျင်းပနိုင်ပြီး ကျန် (၁၇) မြို့နယ်တွင် ရွေးကောက်ပွဲ ကျင်းပနိုင်ခြင်း မရှိပါ။

ရွေးကောက်ပွဲ ပထမပိုင်းနှင့် ဒုတိယပိုင်းတို့တွင် သျှမ်းပြည်အတွင်းရှိ မြို့နယ် ၁၁ ခုမှ ရပ်ကွက် ၁၇ ခုနှင့် ကျေးရွာအုပ်စု ၁၉၅ စု၊ စုစုပေါင်း နေရာ ၂၁၂ ခုတို့တွင် ရွေးကောက်ပွဲ ကျင်းပရန် အခြေအနေ မရှိကြောင်း ပြီးခဲ့သည့် ဒီဇင်ဘာလ (၅) ရက်တွင် UEC မှ ထုတ်ပြန်ထားသည်။